AYE SO NZAPA AFA 4

1Na pekoni, mbi baa mbeni ye nde: mbi baa mbeni yanga ti da so azi na yayu. Mbeni go so mbi ma kozoni si atoto tongana tatalita so, atene na mbi: “Mo ma na nduzu ge; fade mbi yeke fa na mo aye so, alingbi asi na pekoni.” 2Gi hio tongaso, Yingo Vuru agbu mbi si mbi baa mbeni mbata ti gbia na yayu, mbeni zo ayeke duti na ndö ni. 3Tere ti lo ayeke za tongana atêne so iri ni zaspe na sardoane. Mbeni kongö angoro tere ti mbata ti gbia ni. Zango ti kongö ni akpa zango ti mbeni têne so iri ni emerode. 4Na tere ti mbata ti gbia ni, ambeni mbata ti gbia baleuse na osio angoro ni kue. Akangba baleuse na osio ayu vuru bongo si ala duti na ndö ti ambata ni. Ala yu akpoto ti gbia so a sara ni na lôro. 5Zango ti bekpa, na ambeni go so atoto ngangu, nga na toto ti bekpa alondo na tere ti mbata ti gbia ni si ayeke sigigi. Akota wâ ti lamba mbarambara ayeke za na dawa ti mbata ti gbia ni; alamba ni ayeke ayingo mbarambara ti Nzapa. 6Na dawa ti mbata ti gbia ni, mbi baa mbeni ye so akpa kota ngu-ingo so ayeke tongana mbeni têne so zo ayeke baa ndo na ya ni kue. Ambeni ye osio so ayeke na fini ayeke luti na tere ti mbata ti gbia ni, angoro ni kue. Ale ti bango na ndo ayeke na tere ti ala kue, ambeni ayeke na dawa ti ala, ambeni ayeke na peko ti ala. 7Kozo ye so ayeke na fini akpa bamara, use ni akpa koli-bagara, ota ni ayeke na le so akpa le ti zo, osio ni akpa ngoalo so ayeke huru. 8Aye osio so ayeke na fini, ala oko oko ayeke na kpangi omene. Ale ti bango na ndo ayeke na tere ti akpangi ni kue, na ya ni nga na gigi. Bi na lâ, ala ngba ti he bia, atene: “Kota Gbia, Nzapa so ngangu ti lo ahon angangu kue, lo yeke nde, lo yeke nde; lo yeke nde si lo yeke nzoni kue! Lo yeke ando, lo yeke laso si lo yeke ga.” 9Aye osio so ayeke na fini so ayeke he bia ti gonda, ti ne, ti mu singila na lo so aduti na ndö ti mbata ti gbia si lo yeke na fini kpu na kpu so. 10So ala he bia ni, akangba baleuse na osio akuku na gbe ti lo so ayeke duti na ndö ti mbata ti gbia ni so. Ala yeke voro lo so lo yeke na fini si ala yeke tuku akpoto ti gbia ti ala na gbe ti lo, ala tene: 11“Kota Gbia, Nzapa ti e, mo lingbi titene azo agonda mo, azo ane mo si asepela mo ndali ti ngangu ti mo. Biani, mo laa mo sara aye kue, mo yeda titene aye ni abaa gigi si ala baa gigi.”

will be added

X\