AYE SO NZAPA AFA 21

1Na pekoni, mbi baa fini yayu na fini sese. Kozo yayu na kozo sese ahon awe si kota ngu-ingo ayeke daa mbeni pepe. 2Mbi baa gbata so ayeke nde si ayeke nzoni kue, fini Jérusalem, so alondo na yayu na tere ti Nzapa si ayeke zu ti ga. Gbata ni aleke tere ti lo tongana mbeni wali so aye ti mu koli na fini ni si ayu aye ti pendere ti yamba na koli ti lo. 3Mbi ma mbeni kota go so alondo na mbage ti mbata ti gbia ni, atene: “Fadeso, da so Nzapa aduti daa asi na popo ti azo awe! Lo yeke sara kodro na ala, ala yeke duti amara ti lo. Lo wani, lo yeke duti na ala, lo yeke duti Nzapa ti ala. 4Lo yeke mbo ande ngu ti le ti ala kue. Fade kuâ, wala mua, wala toto wala pasi ayeke duti daa mbeni pepe, ngbanga ti so angbene ye kue ahon awe.” 5Na pekoni, lo so ayeke duti na ndö ti mbata ti gbia atene: “Fadeso, mbi mu aye kue, mbi sara na fini ni.” Tongaso, lo tene na mbi: “Su tënë so na mbeti, ngbanga ti so atënë ni ayeke taa-tënë, zo alingbi ti zia be ti lo na ndö ni.” 6Lo kiri lo tene na mbi: “Awe! Mbi yeke Alfa na Omega, mbi yeke tongo nda ti aye kue si mbi yeke kongo nga nda ti aye kue. Zo so nzara ti ngu asara lo, fade mbi yeke mu na lo ngu senge senge, ngu ti li ti ngu so ayeke mu fini na zo. 7Zo so aso benda, fade mbi yeke mu aye so na lo; mbi yeke duti Nzapa ti lo si lo yeke duti molenge ti mbi. 8Me ti azo ti mbeto, azo so azia lege ti mabe, azo ti sarango asioni ye, azo ti fango zo, azo ti sarango aye ti ndumba, azo ti guengo na gbe ti yoro, azo ti vorongo anzapa nde nga na azo ti mvene kue, ye so a leke ti ku na ala ayeke kota le ti wâ ti sufre. So laa ayeke kuâ ti use ni.” 9Mbeni oko ti a-ange mbarambara so agbu akopo mbarambara so tanga ti aye ti sioni mbarambara ayeke daa so, lo ga lo tene na mbi: “Ga, mbi fa na mo wali so Molenge ti Taba aye ti mu lo titene lo ga wali ti lo so.” 10Yingo ti Nzapa agbu mbi si ange ni ague na mbi na ndö ti mbeni kota hoto so ayo na nduzu mingi. Lo fa na mbi gbata so ayeke nde si ayeke nzoni kue, Jérusalem, so alondo na yayu na tere ti Nzapa si ayeke zu na sese. 11Gonda ti Nzapa ayeke za na ya ni. Zango ti ya ti gbata ni akpa zango ti têne ti ngangu ngere si akpa nga mbeni pendere têne so iri ni zaspe so zo ayeke baa ndo na ya ni kue. 12Mbeni kota gbagba so ayo na nduzu mingi angoro gbata ni; ayanga ti gbagba ni ayeke baleoko na use. A-ange baleoko na use ayeke bata ayanga ti gbagba ni. A su iri ti amara baleoko na use ti Israel na ndö ti ayanga ti gbagba ni. 13Ayanga ti gbagba ni ayeke ota na mbage ti To, ota na mbage ti Banga, ota na mbage ti Mbongo, ota na mbage ti Do. 14A leke agere ti gbagba ni na ndö ti têne baleoko na use; a su iri ti awatokua baleoko na use ti Molenge ti Taba na ndö ti atêne ni oko oko. 15Ange so ayeke tene tënë na mbi so agbu mbeni ye ti hakango na ye na maboko ti lo; ye ni akpa sosongo so a leke ni na lôro. Lo ye ti haka gbata ni, ayanga ti gbata ni nga na agbagba ni ti hinga yongo ni. 16Atere ti gbagba ni ayeke osio, yongo ti ala kue alingbi tere. Ange ni amu sosongo ni ti haka na tere ti gbata ni; lo haka ni mbage na mbage alingbi na metere ngbangbo use fani saki baleoko na use: yongo ti tere ti gbata ni mbage na mbage nga na yongo ni na nduzu alingbi tere. 17Ange ni ahaka tere ti gbagba ni na sosongo ni. Lo mu ndambo ti metere, lo haka na yongo ti gbagba ni na nduzu: yongo ni alingbi na ndambo ti metere ni fani ngbangbo oko na baleosio na osio. So lege ti hakango ye ti zo laa.. 18A sara gbagba ni na apendere têne so iri ni zaspe. Ti gbata ni wani, a leke ni na lôro ti nzoni ni so zo ayeke baa ndo na ya ni kue. 19A leke tere ti atêne ti gere ti gbagba ni na amara ti têne nde nde ti ngangu ngere: a leke kozo gere ni na zaspe, use gere ni na safir, ota gere ni na agate, osio gere ni na emerode, 20oku gere ni na oniks, omene gere ni na sardoane, mbarambara gere ni na krizolite, miombe gere ni na berile, gumbaya gere ni na topaze, baleoko gere ni na krizopraze, baleoko na oko gere ni na turkoaze, baleoko na use gere ni na ametiste. 21Ayanga ti gbagba ni baleoko na use kue ayeke alenge baleoko na use. A leke yanga ti gbagba oko na lenge oko, yanga ti gbagba oko na lenge oko. A leke balabala ti ya ti gbata ni na lôro ti nzoni ni so zo ayeke baa ndo na ya ni kue. 22Mbi baa kota da ti Nzapa na ya ti gbata ni pepe, ngbanga ti so kota da ti Nzapa ni ayeke Kota Gbia wani, Nzapa so ngangu ti lo ahon angangu kue, lo na Molenge ti Taba. 23Gbata ni aku titene lâ wala nze asu na ya ni pepe, ngbanga ti so gonda ti Nzapa ayeke su na ya ni si Molenge ti Taba ayeke sara titene ndo ni avuru. 24Amara nde ayeke tambula na ya ti lumiere ti lo, agbia ti sese ayeke ga na amosoro ti ala na ya ni. 25Ayanga ti gbagba ni ayeke ngba na zingo ni lakue, ngbanga ti so fade ndo ayeke vuko na ndo ni so laoko pepe. 26A yeke mu amosoro na aye ti pendere ti amara nde ti ga na ni na ndo so. 27Mbeni ye ti sioni oko ayeke li na ya ti gbata so pepe, ataa zo ti sarango aye ti sioni so zo alingbi ti baa na le ti lo fani use pepe, ataa zo ti mvene, ayeke li daa pepe. Me gi azo so iri ti ala ayeke na ya ti mbeti ti Molenge ti Taba, mbeti so a su iri ti azo so ayeke na taa fini daa, ala laa ayeke li na ya ti gbata ni.

will be added

X\