AYE SO NZAPA AFA 20

1Na pekoni, mbi baa mbeni ange so alondo na yayu si ayeke zu; lo gbu na maboko ti lo kerere ti yanga ti kota du so alinda mingi nga na mbeni ngbongboro zingiri. 2Lo gbu sioni nyama so akpa ngunde, so ti tene ngbene ngbo so ayeke Zabolo wala Satan, lo kanga lo na zingiri ni ndali ti ngu saki oko. 3Ange ni abi lo na ya ti kota du ni, lo kanga yanga ni si lo kpo nzoroko na yanga ni titene nyama ni akiri awara lege ti handa amara pepe, ngbii ngu saki oko ni ahunzi si. Na pekoni, alingbi a zi lo ndali ti mbeni kete ngoi. 4Na pekoni, mbi baa ambata ti gbia. Azo so aduti na ndö ni, a mu na ala ngangu ti fâ ngbanga. Mbi baa nga yingo ti ala so azo afâ go ti ala ndali ti so ala sara ye alingbi gi na taa-tënë so Jésus afa nga na tënë ti Nzapa. Ala ke ti voro nyama ni wala limo so akpa nyama ni, ala yeke na nzoroko ti nyama ni na ndö ti le ti ala wala na ndö ti maboko ti ala pepe. Ala kiri na fini si ala na Christ abongbi ale-gbia na ya ti ngu saki oko. 5Atanga ti akuâ ni akiri na fini pepe ngbii ngu saki oko ni ahunzi si. So kozo zingongo ti akuâ laa. 6Ti ala nzoni, ala so ayeke na popo ti akozo kuâ so azingo! Ala yeke ti ala biani azo ti Nzapa, kuâ ti use ni ayeke na ngangu na ndö ti ala pepe. Ala yeke ga awayango-sandaga ti Nzapa na ti Christ si ala na lo ayeke le-gbia na ya ti ngu saki oko. 7Tongana ngu saki oko ni ahunzi awe, fade a yeke zi Satan na ya ti kanga so lo yeke daa. 8Lo yeke hon ti gue ti handa amara so ayeke na ndangoro osio ti sese kue, so ti tene Gog na Magog. Satan ayeke bongbi ala ndali ti bira. Wungo ti ala ayeke tongana wungo ti mbutu ti yanga ti kota ngu-ingo. 9Ala yeke mu ndö ti sese kue si ala yeke ngoro tere ti gbagba so azo ti Nzapa ayeke daa nga na gbata so Nzapa aye ni mingi so. Me mbeni wâ alondo na nduzu, ati si agbi ala kue. 10Zabolo so ahanda azo ni so, a bi lo na le ti kota wâ na sufre, na ndo so nyama ni ayeke daa, lo na nyama so atene mvene atene, ni yeke wayanga-Nzapa so. Fade ala yeke baa pasi bi na lâ, kpu na kpu. 11Na pekoni, mbi kiri mbi baa mbeni kota vuru mbata ti gbia. Mbi baa nga lo so ayeke duti na ndö ni so. Sese na yayu alondo na dawa ti lo, akpe ahon, a kiri a baa ala mbeni pepe. 12Na pekoni, mbi baa akuâ, akete ni na akota ni, ala yeke luti na dawa ti mbata ti gbia ni. A zi abuku si a zi mbeni buku nde: mbeti so a su iri ti azo so ayeke na taa fini daa. A fâ ngbanga na li ti akuâ alingbi na ye so ala sara tongana ti so a su tënë ni na ya ti abuku ni so. 13Kota ngu-ingo asigigi na akuâ so ayeke na ya ti lo. Kuâ na ndo ti akuâ asigigi na akuâ so ayeke na ala si a fâ ngbanga na li ti ala oko oko alingbi gi na ye so ala sara. 14A mu kuâ nga na ndo ti akuâ, a bi ala na le ti kota wâ. Le ti kota wâ ni ayeke kuâ ti use ni. 15Tongana a wara iri ti mbeni zo na ya ti mbeti ni pepe, so ti tene mbeti so a su iri ti azo so ayeke na taa fini daa, a yeke bi lo na le ti kota wâ ni.

will be added

X\