AYE SO NZAPA AFA 17

1Tongaso, mbeni ange oko na popo ti a-ange mbarambara so ayeke na akopo mbarambara so, aga na tere ti mbi si lo tene na mbi: “Ga, mbi yeke fa na mo lege so a yeke fâ ande ngbanga na li ti kota wali-ndumba, lo so lo yeke kota gbata so a leke ni na tere ti akota ngu so. 2Agbia ti sese asara aye ti ndumba na lo; azo ti dunia kue anyon vin ti aye ti ndumba ti lo si ayeke sara ala.” 3Yingo ti Nzapa agbu mbi si ange ni amu mbi ague na mbi na benyama. Mbi baa mbeni wali kâ, lo yeke duti na ndö ti mbeni bengba nyama. A su a-iri ti zongango Nzapa na tere ti nyama ni kue; ali ti nyama ni ayeke mbarambara si adidi ti lo ayeke baleoko. 4Wali ni ayu pendere bengba bongo so ayeke za zango; lo yu aye ti pendere so a sara na lôro, na atêne ti ngangu ngere nga na alenge. Lo gbu mbeni kopo so a sara na lôro na maboko ti lo; ya ti kopo ni asi singo na aye ti sioni so zo alingbi ti baa na le ti lo fani use pepe, so ti tene aye ti ndumba so lo yeke sara.. 5Na ndö ti le ti lo, a su mbeni iri so nda ni angba na hondengo ni: “Kota Babilone, mama ti awali-ndumba, na ti aye ti sioni kue ti ndö ti sese so zo alingbi ti baa na le ti lo fani use pepe.” 6Mbi baa wali ni, lo nyon mene ti azo ti Nzapa na mene ti azo so a fâ ala, ngbanga ti so ala mu peko ti Jésus. Mene ni ayeke sara lo tongana samba. So mbi baa lo tongaso, li ti mbi kue akpe. 7Tongaso, ange ni atene na mbi: “Li ti mo akpe ngbanga ti nyen?” Mbi yeke fa na mo nda ti ye so angba na hondengo ni nga na nda ti tënë ti wali so, na ti nyama so ali ti lo ayeke mbarambara, adidi ti lo ayeke baleoko si lo yeke yo wali ni so. 8Nyama so mo baa lo so ayeke ando na fini, me lo yeke na fini mbeni pepe. Lo yeke londo ande na ya ti kota du so alinda mingi si lo yeke sigigi titene a buba lo biani biani. Fade li ti azo ti sese ayeke kpe na bango nyama ni, so ti tene azo so, ngbene ye so dunia abaa gigi, iri ti ala ayeke na ya ti mbeti pepe, mbeti so a su iri ti azo so ayeke na taa fini daa. Biani, nyama ni ayeke ando na fini, me fadeso lo yeke na fini mbeni pepe; fade lo yeke kiri ti ga. 9“So ngoi titene zo ahinga ndo si aduti na ndara laa. Ali mbarambara so ayeke ahoto mbarambara so wali ni ayeke lango daa. Ali mbarambara so ayeke nga agbia mbarambara: 10agbia oku na popo ti ala ati awe, omene gbia ni ayeke le-gbia fadeso; mbarambara gbia ni ade ti ga pepe, me tongana lo ga ande, lo yeke ninga gi kete. 11Nyama so ayeke ando na fini si lo de na fini mbeni pepe so, ayeke nga mbeni gbia ti miombe ni. Lo yeke oko ti agbia mbarambara so, lo yeke gue ti lo titene a buba lo biani. 12“Adidi baleoko so mo baa so ayeke agbia baleoko so ade ti ko na ndö ti mbata ti gbia pepe. Me fade a yeke mu na ala ngangu ti sara komandema tongana agbia na ya ti ngbonga oko, ala na nyama ni. 13Ala baleoko kue, tënë ti be ti ala ayeke gi oko: ala mu komandema ti ala na ngangu ti ala na nyama ni. 14Fade ala yeke tiri na Molenge ti Taba, me Molenge ti Taba ayeke hon ndö ti ala, ngbanga ti so lo yeke Kota Gbia ti akota gbia si lo yeke Gbia ti agbia. Lo na azo so lo iri ala, lo soro ala si ala yeke azo ti lo, ala yeke hon ndö ti agbia baleoko so.” 15Ange ni akiri atene na mbi: “Angu so mo baa so si wali-ndumba ni ayeke lango na tere ni so, ayeke azo ti akodro nde nde, azo gbani gbani, azo ti amara nde nde na azo ti ayanga ti kodro nde nde. 16Adidi baleoko so mo baa so, ala na nyama ni ayeke ke ande wali-ndumba ni. Fade ala yeke mu aye so kue lo yeke na ni si ala yeke zia lo tere ti lo senge, ala yeke te kasa ti tere ti lo si ala yeke gbi lo na wâ. 17Biani, Nzapa azia na be ti ala titene ala sara gi ye so lo wani aye. Fade tënë ti be ti ala ayeke gi oko, ala yeke mu komandema ti ala na nyama ni ngbii ye kue asi alingbi na tënë ti Nzapa. 18“Wali so mo baa lo so ayeke kota gbata so ayeke na komandema na ndö ti agbia ti sese so.”

will be added

X\