AYE SO NZAPA AFA 14

1Mbi kiri mbi baa ndo, mbi baa Molenge ti Taba so aluti na ndö ti hoto ti Sion. Azo saki ngbangbo oko na baleosio na osio ayeke luti na tere ti lo. Iri ti lo, na ti Babâ ti lo ayeke na ndö ti le ti ala. 2Mbi ma mbeni go so alondo na yayu so ayeke tongana toto ti kota ngu, tongana toto ti bekpa so asungba ngangu. Go so mbi ma ayeke tongana bia ti azo ti pikango kundi. 3Azo so aluti na dawa ti mbata ti gbia, nga na dawa ti aye osio so ayeke na fini nga na akangba so, ala yeke he fini bia. Mbeni zo nde alingbi ti manda bia ni so pepe, gi azo ti sese saki ngbangbo oko na baleosio na osio so Nzapa asoo ala awe. 4Azo ni so abuba tere ti ala pepe na lege ti bongbingo na awali. Ala yeke mu peko ti Molenge ti Taba na ndo so kue lo yeke gue daa. Nzapa asoo ala na popo ti amba ti ala, azo si ala ga tongana akozo nzoni ye so a mu na lo nga na Molenge ti Taba. 5Mbeni tënë ti mvene oko asigigi na yanga ti ala pepe; sioni ye oko ayeke na tere ti ala pepe. 6Na pekoni, mbi baa mbeni ange nde so ayeke huru yongoro kâ na le ti nduzu. Lo yeke na mbeni Nzoni Tënë so ayeke ngba lakue lakue ti fa na azo ti amara kue, azo ti akete mara kue, azo ti ayanga ti kodro kue nga na azo ti akodro kue. Tënë ni ayeke. 7Lo yeke dekongo, lo tene: “Ala kpe mbeto ti Nzapa! Ala gonda lo ndali ti so ndembe titene lo fâ ngbanga na li ti azo alingbi awe. Ala voro lo, lo so lo sara yayu, sese, akota ngu-ingo nga na ali ti ngu!” 8Mbeni use ange aga na peko ti lo si atene: “Lo ti awe! Kota Babilone ati awe! Lo mu ngangu vin ti lo na amara kue titene ala nyon si ala sara asioni ye ti ndumba tongana lo.” 9Mbeni ota ange aga na peko ti ala si lo dekongo, lo tene: “Tongana mbeni zo avoro nyama ni na limo ti nyama ni si lo wara nzoroko ti nyama ni na ndö ti le ti lo wala na ndö ti maboko ti lo, 10fade lo nga, lo yeke nyon vin ti kota ngonzo ti Nzapa. A yeke tuku vin ni na ya ti kopo ti ngonzo ti Nzapa, a yeke tuku ngu daa pepe. Lo yeke baa ande pasi na le ti wâ na sufre, na le ti a-ange ti Nzapa nga na le ti Molenge ti Taba. 11Wâ so ayeke sara pasi na ala, fade guru ni ayeke londo kpu na kpu. Azo so ayeke voro nyama ni na limo ti nyama ni, ala na azo so nzoroko ti iri ti nyama ni ayeke na tere ti ala so, bi na lâ, ala yeke wu tere ti ala pepe.” 12So ngoi titene azo ti Nzapa akanga be ti ala laa, ala so asara ye alingbi na andia ti Nzapa si ala ngba ti zia be ti ala na ndö ti Jésus. 13Mbi kiri mbi ma mbeni go so alondo na yayu, atene: “Su tënë so na mbeti, mo tene: ‘Ti ala nzoni, azo so angba na lege ti kua ti Kota Gbia si ala kui fadeso! Yingo atene: Biani, fade ala yeke wu tere ti ala na peko ti aye so ala sara, ngbanga ti so aye so ala sara ayeke mu peko ti ala.’ ” 14Mbi kiri mbi baa ndo, mbi baa mbeni vuru mbinda. Lo so lo duti na ndö ti mbinda ni akpa zo. Lo yu kpoto ti gbia so a sara ni na lôro, lo gbu mbeni nzenze ti fango na ale ti kobe na maboko ti lo; yanga ti nzenze ni aza mingi. 15Na pekoni, mbeni ange nde alondo na ya ti kota da ti Nzapa asigigi. Lo dekongo ngangu na lo so ayeke duti na ndö ti mbinda so, atene: “Sara kua na nzenze ti mo, fâ ale ti kobe ni, ngbanga ti so ngoi ti fango ni alingbi awe; ale ti kobe ti sese ni abe awe!” 16Tongaso, lo so ayeke duti na ndö ti mbinda ni asara kua na nzenze ti lo na ndö ti sese si a fâ ale ti kobe ti sese ni. 17Na pekoni, mbeni ange nde alondo na ya ti kota da ti Nzapa so ayeke na yayu si asigigi. Lo nga, lo gbu nzenze ti fango na ale ti kobe na maboko ti lo; yanga ti nzenze ni aza mingi. 18Mbeni ange nde alondo na mbage ti gbalaka, asigigi; lo laa lo yeke na komandema na ndö ti wâ. Lo dekongo ngangu na lo so agbu nzenze ti fango na ale ti kobe ni, lo tene: “Sara kua na nzenze ti mo so yanga ni aza mingi so, mo fâ agba ti le ti vinye so ayeke na ndö ti sese so, ngbanga ti so ale ti vinye ni abe awe!” 19Ange ni asara kua na nzenze ti lo ni na ndö ti sese. Lo fâ ale ti vinye ni, lo tuku na ya ti kota du ti petengo vin ti ngonzo ti Nzapa. 20A do ale ni dongo na gere na ya ti du so ayeke na mbage ti gigi ti gbata ni. Mene alondo na ya ti du ni, asigigi, asuku ngbii, tongana mbarata aluti na ya ni, mene ni ayeke gbu lo na yanga ti lo; mene ni amu ndo kue, alingbi na kilometere ngbangbo ota.

will be added

X\