AYE SO NZAPA AFA 13

1Na pekoni, mbi baa mbeni nyama so alondo na ya ti kota ngu-ingo si ayeke sigigi. Lo yeke na adidi baleoko, ali ti lo ayeke mbarambara. Akpoto ti gbia ayeke na ndö ti adidi ti lo ni oko oko kue; a su airi ti zongango Nzapa na ndö ti li ti lo oko oko kue. 2Nyama so mbi baa lo so akpa ze. Gere ti lo akpa ti urse si yanga ti lo akpa ti bamara. Sioni nyama ni, lo so akpa ngunde so, lo mu na nyama ni ngangu ti lo, mbata ti lo ti gbia nga na kota komandema ti lo. 3Mbeni li ti nyama ni oko awara kota ka; ka ni akpa fade titene lo kui na ni, me ka ni amu. Azo ti sese kue agonda ye ni si ala mu peko ti nyama ni. 4Azo kue avoro sioni nyama so akpa ngunde so, ngbanga ti so lo mu ngangu ti lo na nyama ni. Ala voro nga nyama ni, atene: “Zo wa laa alingbi na nyama so, zo wa? Zo wa laa alingbi ti tiri na lo, zo wa?” 5A mu na nyama ni lege ti tenengo atënë ti baba na atënë ti zongango Nzapa; a mu na lo ngangu ti sarango ye na ya ti nze baleosio na use. 6Lo to nda ti zonga Nzapa, ti zonga iri ti lo, ti zonga ndo so lo yeke duti daa, ti zonga nga ala so kue ayeke duti na yayu. 7A mu na lo lege ti tiri na azo ti Nzapa, ti hon ndö ti ala. A mu na lo komandema na ndö ti azo ti kete mara kue, azo ti akodro kue, azo ti ayanga ti kodro kue na azo ti amara kue. 8Fade azo ti ndö ti sese kue ayeke voro nyama ni. Azo so ayeke voro lo ayeke azo so, ngbene ye so dunia abaa gigi, iri ti ala ayeke na ya ti mbeti pepe, mbeti so a su iri ti azo so ayeke na taa fini daa, mbeti ti Molenge ti Taba so a fâ lo so. 9“Zo so ayeke na mê ti mango ndo, ayeke nzoni lo ma tënë so! 10Zo so a diko lo ndali ti kanga, fade lo yeke gue na kanga; zo so a diko lo titene a fâ lo na yongoro zeme, lo yeke kui kuâ ti yongoro zeme. So ayeke ngoi titene azo ti Nzapa akanga be ti ala si ala ngba na lege ti mabe laa.” 11Na pekoni, mbi baa mbeni nyama nde; lo londo na ya ti sese si lo sigigi. Lo yeke na adidi use so akpa ti molenge ti taba si lo yeke tene tënë tongana sioni nyama so akpa ngunde so. 12Lo yeke sara nga kua na ngangu ti komandema ti kozo nyama ni, nyama so asigigi na ya ti kota ngu-ingo. Nyama so asigigi na ya ti sese ayeke sara kua gi na le ti nyama ti ngu-ingo ni. Lo gbu azo ti ndö ti sese kue na ngangu; lo gbu nga sese ni wani titene ala voro nyama ti ngu-ingo ni; nyama so ayeke na ka so alingbi ti fâ lo si ka ni amu so. 13Nyama so asigigi na ya ti sese asara akota ye ti kpene; lo sara titene wâ alondo na nduzu, ati na sese na le ti azo kue. 14Lo handa azo ti ndö ti sese na lege ti aye ti kpene so lo sara na dawa ti nyama ti kota ngu-ingo; lo sara ni na ngangu so a mu na lo. Lo tene na azo ti leke mbeni limo ndali ti nyama ti kota ngu-ingo so awara ka ti yongoro zeme si lo ngba na fini so. 15A mu ngangu na nyama so asigigi na ya ti sese titene lo tokua pupu na ya ti limo ti nyama so, tongaso si limo ni awara lege ti tene tënë si lo fâ azo so kue ayeke voro lo pepe. 16Nyama ni agbu azo kue na ngangu titene ala wara mbeni nzoroko na ndö ti maboko ti ala ti koli, wala na ndö ti le ti ala, ataa akota zo na akete zo, ataa azo ti mosoro na awayere, ataa angbaa na azo so ayeke angbaa pepe. 17Zo so ayeke na nzoroko so pepe, lo lingbi ti vo ye wala ti ka ye pepe. Nzoroko ni ayeke iri ti nyama ni wala nimoro ti iri ti lo. 18So ngoi ti dutingo na ndara laa. Zo so ahinga ndo alingbi ti hinga nimoro ti nyama ni, ngbanga ti so ayeke nimoro ti iri ti zo. Nimoro ni ayeke ngbangbo omene na baleomene na omene.

will be added

X\