AYE SO NZAPA AFA 12

1Mbeni kota ye ti kpene asigigi na le ti nduzu: mbeni wali ayu lâ na tere ti lo tongana bongo, nze ayeke na gbe ti gere ti lo si lo yu na li ti lo mbeni kpoto ti gbia so a leke ni na atongoro baleoko na use. 2Wali ni ayeke na ngo, lo ga nduru ti du molenge awe si lo yeke toto, lo yeke baa pasi na songo ya ti dungo ni. 3Mbeni ye ti kpene nde akiri asigigi na le ti nduzu: mbeni sioni nyama so akpa ngunde, tere ti lo abe tongana wâ, li ti lo ayeke mbarambara, lo yeke na adidi baleoko si lo yu akpoto ti gbia na ali ti lo oko oko kue. 4Atongoro kue ti le ti nduzu, damba ti nyama ni apika tongoro oko na popo ti atongoro ota abi na ndö ti sese. Sioni nyama ni ague aluti na dawa ti wali so aga nduru ti du molenge so, ti ku ti te molenge ni na sigingo ti lo. 5Wali ni adu molenge-koli; molenge-koli so laa ayeke fa lege na amara kue na komandema ti ngangu. A mu molenge so wali ni adu so, a gue na lo na tere ti Nzapa, na tere ti mbata ti lo ti gbia. 6Tongaso, wali ni akpe ague na benyama. Nzapa aleke mbeni ndo kâ ndali ti lo titene a mu na lo kobe na ya ti alango saki oko na ngbangbo use na baleomene. 7Na yayu kâ, mbeni kota bira alondo. Michel na a-ange ti lo atiri na sioni nyama ni. Sioni nyama ni nga amu a-ange ti lo na tere ti lo ti tiri na bira ni. 8Me sioni nyama ni ahon ndö ti Michel na a-ange ti lo pepe. Tongaso, lege titene ala kiri angba na yayu ayeke daa pepe. 9A bi sioni nyama ni na gigi. Lo yeke ngbene ngbo so azo airi lo atene, Zabolo wala Satan, wala zo ti handango azo ti dunia kue. A bi lo na ndö ti sese, lo na a-ange ti lo. 10Na pekoni, mbi ma mbeni kota go so alondo na yayu, atene: “Fadeso ngoi titene Nzapa asoo e asi awe! Fadeso lo fa ngangu ti lo ti gbia awe! Fadeso Mesii ti lo afa so lo yeke na komandema awe! Zo ti bingo tënë na li ti a-ita ti e, lo so lo yeke luti na le ti Nzapa ti bi tënë na li ti ala bi na lâ so, a mu lo na yayu, a bi lo na gigi awe. 11A-ita ti e ni ahon ndö ti lo na lege ti mene ti Molenge ti Taba nga na lege ti taa-tënë so ala fa ni. Ala baa fini ti ala tongana senge ye si ala yeda ti ka tere ti ala na kuâ. 12Ndani laa, ala, yayu na ala so ayeke duti na yayu, ala duti na ngia! Mawa na ala, sese na kota ngu-ingo, ngbanga ti so Zabolo azu na ala kâ awe! Ngonzo agbu lo ngangu, ngbanga ti so ngoi ti lo angba mingi pepe.” 13So sioni nyama ni abaa so a bi lo na ndö ti sese awe, lo to nda ti tumba peko ti wali so adu molenge-koli so. 14Me a mu akpangi use ti kota ngoalo na wali ni titene lo huru na ni, lo gue na benyama. Lo gue na ndo so a leke ndali ti lo titene lo duti yongoro na tere ti sioni nyama ni. Kâ, a yeke mu kobe na wali ni na ya ti ngu ota na ndambo. 15Ngbo ni ade ngu na yanga ti lo na peko ti wali ni si aga tongana kota bale titene amu wali ni ahon na lo. 16Me sese amu maboko na wali ni: sese azi yanga ti lo si amene bale so sioni nyama ni ade ni so. 17Ngonzo ti wâ agbu sioni nyama ni na tere ti wali ni si lo gue ti tiri na tanga ti ahale ti wali ni, ala so asara ye alingbi na andia ti Nzapa si ala bata taa-tënë so Jésus afa. 18Na pekoni, sioni nyama ni ague aluti na ndö ti mbutu ti yanga ti kota ngu-ingo.

will be added

X\