FILIPE 3

1Tongaso, a-ita ti mbi, na lege ti gango so ala ga oko na Kota Gbia, ayeke nzoni ala duti na ngia. Titene mbi kiri mbi su na ala atënë so mbi tene kozoni awe so, mbi yeke sara ni senge; so si asara titene ala kpengba. 2Ala sara hange na azo ti sarango sioni kua! Ala sara hange na ambo so! Ala sara hange na azo so afâ mbirimbiri ganza pepe so! 3E so, e yeke voro Nzapa na lege ti Yingo ti lo si e yeke gonda tere ti e ndali ti gango so e ga oko na Jésus Christ so, e laa e fâ mbirimbiri ganza; e yeke zia be ti e na ndö ti e wani pepe. 4Mbi nga, mbi lingbi fade ti zia be ti mbi na ndö ti mbi wani. Tongana mbeni zo atene na be ti lo atene, ni lingbi ti zia be ti ni na ndö ti ni wani, mbi hon zo ni so mingi. 5Mbi yeke taa zo ti mara ti Israel, zo ti mara ti Benjamin, akotara ti mbi kue ayeke azuife. Lango miombe na peko ti so a du mbi, a fâ mbi na ganza. Na lege ti batango ndia, mbi yeke taa farizien. 6Na lege ti sarango kua ti Nzapa, mbi mu ando be ti mbi kue daa si mbi sara pasi na azo ti Eglize mingi. Na lege ti batango ndia ti ga mbirimbiri na legeni, zo ayeke wara mbeni tënë ti bi na li ti mbi pepe. 7Me aye so kue mbi yeke wara nzoni ando daa, mbi baa ni fadeso tongana buba ye ndali ti Christ. 8Biani, mbi baa aye so kue ayeke abuba ye tongana mbi haka ni na hingango Jésus Christ, Kota Gbia ti mbi. Ti hinga Jésus ayeke nzoni ahon ye kue. Ndali ti lo laa mbi zia aye ti mbi kue abuba; mbi baa aye ni kue tongana zende titene mbi wara Christ 9si mbi na lo e ga oko. Batango ndia ti ga mbirimbiri, so laa amu lege na mbi ti ga oko na Christ pepe, me mbi ga oko na Christ na lege ti mabe. Nzapa laa ayeke mu na zo lege ti gango mbirimbiri tongana zo ni ama na be. 10Ye so mbi ye, ayeke ti hinga Christ, lo na ngangu so azingo lo na kuâ, ti baa pasi legeoko na lo si mbi ga tongana lo na ndembe ti kuâ ti lo. 11Tongaso, ye so mbi zia be ti mbi ti ku ayeke so: mbi nga, fade mbi yeke zingo na kuâ. 12So ti tene, mbi de ti si na nda ti lege ni pepe wala mbi de ti ga nzoni kue pepe. Me mbi ngba ti kpe loro, mbi yeke sara kue ti gue ti gbu ye so ayeke ku mbi, ngbanga ti so Jésus Christ wani agbu mbi awe. 13A-ita, mbi hinga mbi tene, mbi de ti gbu ye ni pepe; me ye oko so agbu be ti mbi ayeke so: mbi ye ti girisa ye so ayeke na peko ti mbi ti gi gi ye so ayeke na li ni. 14Mbi yeke kpe loro ngangu ti si na nda ti lege ni, ti wara nzoni ye so Nzapa airi e ti wara ni na yayu, na lege ti gango so e ga oko na Jésus Christ. 15E so kue e ga akangba na lege ti aye ti Yingo, ayeke nzoni tënë ti be ti e kue aga gi oko. Tongana mbeni tënë ayeke daa si tënë ti be ti ala ague nde, fade Nzapa ayeke zi le ti ala na ndö ni. 16Me gi ye oko: e ngba ti tambula gi na lege so e tambula daa ngbii asi fadeso! 17A-ita ti mbi, ala mu tapande ti mbi. Le ti ala angba na ndö ti tapande ti azo so ayeke sara ye alingbi na ti so ala baa e na sarango ni. 18Mbi tene tënë so na ala lege mingi kozoni awe; laso mbi kiri ti tene na ala na ngu ti le: ambeni zo mingi ayeke daa so sarango ye ti ala afa so ala ke tënë ti keke ti kroa ti Christ awe. 19Lege ti kuâ laa ala yeke gue daa so. Nzapa ti ala ayeke gi ya ti ala, ye so ayeke zia kamene na le ti azo ni so, ala yeke wara ti ala gonda daa. Ala zia be ti ala kue gi na ndö ti aye ti dunia so. 20Ti e, kodro ti e ayeke na yayu. E yeke ku titene Kota Gbia ti e Jésus Christ, lo so lo yeke Wasongo e alondo na yayu, aga. 21Lo laa lo yeke mu tere ti e so ayeke tere ti pasi ti sara ni alingbi na tere ti lo ti gonda. Lo yeke sara tongaso na lege ti ngangu so lo yeke na ni ti sara si aye kue aduti na gbe ti komandema ti lo.

will be added

X\