FILIPE 1

1Mbi Paul, mbi na Timothée, so e yeke azo ti kua ti Jésus Christ laa e tokua mbeti so na azo ti Nzapa so aga oko na Jésus Christ si ala yeke na gbata ti Filipe. E tokua nga mbeti so na azo so ayeke na li ti Eglize, ala na adiakre. 2Ayeke nzoni Nzapa Babâ ti e, lo na Kota Gbia Jésus Christ asara nzoni be na ala si amu na ala siriri! 3Lakue tongana be ti mbi ati na ndö ti ala, mbi yeke mu singila na Nzapa ti mbi. 4Lakue tongana mbi yeke sambela ndali ti ala kue, mbi yeke sambela na ngia na be ti mbi, 5ndali ti so ala mu na mbi maboko, ti londo na lango so mbi to nda ti fango Nzoni Tënë ngbii asi fadeso. 6Mbi hinga biani mbi tene, Nzapa so ato nda ti sara nzoni kua na ya ti fini ti ala, fade lo yeke sara ni ngbii ahunzi na lango ti kiringo ti Jésus Christ. 7So ayeke na legeni titene be ti mbi angba na ndö ti ala, ngbanga ti so tënë ti ala agbu be ti mbi mingi. Biani, ala kue awara nga aye so Nzapa amu na mbi na lege ti nzoni be ti lo, ataa fadeso mbi yeke na da ti kanga, wala na ngoi so mbi yeke lani na da ti kanga pepe si mbi yeke gbu koko ti Nzoni Tënë titene azo ama na be na ni na be ti ala kue. 8Na le ti Nzapa, mbi ye ala kue na be ti mbi oko tongana ti so Jésus Christ aye na ala. 9Mbi yeke sambela titene ndoye so ala yeke na ni akiri ague gi na nduzu na nduzu, tongaso si le ti ala azi si ala hinga nga ye mbirimbiri; 10tongaso si ala hinga ye so ayeke nzoni ahon atanga ni. Tongaso, fade ala yeke ga nzoni kue si na lango ti kiringo ti Christ, mbeni tënë ayeke na li ti ala pepe. 11Fade sarango ye ti mbirimbiri so alondo na Jésus Christ ayeke si singo na ya ti fini ti ala; na lege so laa ala yeke gonda Nzapa si ala yeke sepela lo. 12A-ita, mbi ye titene ala hinga atene, ye so asi na mbi, asara si Nzoni Tënë ague gi guengo na dawa. 13Aturugu ti yangbo ti gbia kue, na azo so kue ayeke ge so ahinga atene, a kanga mbi ndali ti Christ. 14Mingi ti a-ita so abaa mbi na da ti kanga, be ti ala akiri awara ngangu ti zia be ti ala na ndö ti Kota Gbia. Tongaso, ala yeke fa tënë ti Nzapa na mbeto pepe, ala kiri asara ni ahon ti kozoni. 15Mbi hinga so ambeni zo ayeke fa tënë ti Christ gi na kota be wala ti gi na yanga ti mbi; me ambeni ayeke fa tënë ni na nzoni be. 16Ala so ayeke fa tënë ni na nzoni be, ngbanga ti so ala ye mbi si ala hinga atene, Nzapa laa amu mbi titene mbi gbu koko ti Nzoni Tënë. 17Ambeni ayeke fa tënë ni gi ti gi na kota ndo, be ti ala ayeke sioni; ala tene na be ti ala atene, ala yeke sara si pasi ti mbi akiri ahon ndoni na da ti kanga. 18Me so ayeke senge! Ataa ala fa tënë ni na sioni be, wala na nzoni be, kota ye ni ayeke so, ala yeke fa tënë ti Christ! Ndani laa be ti mbi ayeke na ngia! Fade be ti mbi ayeke ngba ti duti na ngia. 19Biani, mbi hinga: fade ye so kue ayeke sara titene mbi soo kuâ ndali ti sambela ti ala nga ndali ti maboko so Yingo ti Jésus Christ ayeke mu na mbi. 20Ndali ti ye so mbi yeke ku si mbi zia be ti mbi ti ku ni, kamene ayeke gbu ande mbi pepe. Me ti londo laso ngbii asi na tanga ti alango kue, ataa mbi kui wala mbi ngba na fini, mbi hinga biani na be ti mbi, mbi tene, dutingo ti mbi ayeke fa ande na azo so Christ ayeke kota mingi. 21Ti mbi, taa fini ayeke Christ si na le ti mbi, kuâ ayeke lege ti warango ye! 22Me tongana ngbango ti mbi na fini na sese so alingbi ti mu na mbi lege ti sara mbeni kua so zo alingbi ti wara ye na peko ni, mbi hinga ye so mbi lingbi ti soro ni pepe. 23Be ti mbi ayeke use use: mbi yeke na nzara ti gue ti duti na tere ti Christ, so laa ayeke nzoni ahon ye kue. 24Me ngbango ti mbi na fini na sese so ayeke sara ande nzoni mingi na ala. 25Mbi hinga biani na be ti mbi so fade mbi yeke ngba na fini, mbi yeke duti nduru na tere ti ala kue ti mu maboko na ala si kua ti ala ague na nduzu, ala duti na mabe na ngia na be ti ala. 26Tongaso, na ngoi so mbi yeke kiri ande na tere ti ala, tere ti ala ayeke nzere mingi ndali ti mbi na lege ti gango so ala ga oko na Jésus Christ. 27Gi ye oko, ayeke nzoni lege ti dutingo ti ala alingbi na ti so Nzoni Tënë ti Christ afa. Tongaso, ataa mbi ga mbi baa ala, ataa mbi ga pepe, me mbi ma atënë ti ala, fade mbi yeke hinga mbi tene, ala ngba ti luti nganganga, tënë ti be ti ala kue ayeke gi oko si ala bongbi oko ti tiri ndali ti mabe so aga na lege ti Nzoni Tënë. 28Ala mu lege na awato ti ala ti zia mbeto na be ti ala oko pepe. So laa ayeke fa atene, lege ti awato ti ala ni ayeke gue na ala na kuâ; me ti ala, azo ti Filipe, ye ni ayeke ga ande ye ti songo ala na kuâ, ngbanga ti so Nzapa laa asara titene ala soo kuâ. 29Nzapa asara nzoni be na ala gi titene ala ma na be na Christ pepe, me ti baa nga pasi ndali ti lo. 30Ala nga atiri gi mara ti bira so ala baa ando mbi na tiringo ni si ala ma atene, mbi ngba ti tiri ni so.

will be added

X\