MATTHIEU 25

1“Tongaso tënë ti Kodro-gbia ti yayu ayeke duti ande tongana tënë ti amaseka-wali baleoko so amu alamba ti ala si ala sigigi ti gue na lege ti koli so ague ti mu wali na fini ni. 2Na popo ti ala, ambeni oku ayeke azo ti buba si ambeni oku ayeke azo ti ndara. 3Ala so ayeke azo ti buba amu alamba ti ala, me ala mu mafuta na tere ti ala pepe. 4Ala so ayeke azo ti ndara amu mbeni ngbenda ti mafuta na tere ti ala ndali ti alamba ti ala. 5So koli ni asi hio pepe, ala kue awoko si ala lango. 6Na be ti bi, mbeni zo adekongo, atene: ‘Koli ni ayeke ga-oo! Ala sigigi ague na lege ti lo!’ 7Tongaso amaseka-wali baleoko so kue azingo si ala yeke leke alamba ti ala. 8Ala so ayeke azo ti buba atene na ala ti ndara, atene: ‘Ala tuku na e mbeni mafuta ti ala kete, ngbanga ti so alamba ti e ayeke mingo.’ 9Ala ti ndara akiri tënë na ala: ‘Oko pepe! Mafuta ni ayeke mingi pepe titene alingbi e na ala kue. Ala gue na ndo ti azo ti kango ye, ala vo ti ala.’ 10So amaseka-wali ti buba ague ti vo mafuta ni, koli ni asi. Amaseka-wali so aleke tere ti ala awe si ayeke ku lo so ali na lo na ya ti da ti matanga ni; a kanga yanga ti da ni na ndö ti ala. 11Na pekoni, amaseka-wali ti buba so asi nga si ala iri ndo, atene: ‘Pakara! Pakara! Zi na e yanga ti da!’ 12Me koli ni akiri tënë: ‘Mbi tene na ala taa-tënë: mbi hinga ala oko pepe.’ ” 13Ti hunzi na ni, Jésus atene: “Ala lango pepe, ngbanga ti so ala hinga lango ni wala ngbonga ni pepe!” 14“Tënë ti Kodro-gbia ti yayu ayeke tongana tënë ti mbeni koli so alondo ti gue na mbeni kodro nde: lo iri azo ti kua ti lo si lo mu aye ti lo, lo zia na maboko ti ala. 15Lo mu na mbeni zo ti kua ni ale ti lôro ngbangbo oku; lo mu na use zo ni ale ti lôro ngbangbo use si lo mu na ota zo ni ale ti lôro ngbangbo oko: zo oko oko awara ye alingbi na ngangu ti lo. Na pekoni, koli so amu lege ague. 16Lo so lo wara ale ti lôro ngbangbo oku so ague hio si lo de buze na ni, lo kiri lo wara ambeni le ti lôro ngbangbo oku na ndö ni. 17Lo so lo wara ale ti lôro ngbangbo use so asara nga legeoko tongaso si lo wara ambeni le ti lôro ngbangbo use na ndö ni. 18Me lo so lo wara ale ti lôro ngbangbo oko so ague azi du si lo honde nginza ti makonzi ti lo ni kue daa. 19“Lango mingi na pekoni, makonzi ti azo ti kua so akiri; lo iri ala titene ala ga afa na lo peko ti ye so ala sara na nginza ni. 20Zo ti kua so awara ale ti lôro ngbangbo oku so aga nduru, lo fa ambeni le ti lôro ngbangbo oku so lo wara na ndö ni si lo tene: ‘Kota zo, mo mu na mbi lani ale ti lôro ngbangbo oku. Baa, ambeni le ti lôro ngbangbo oku so mbi wara na ndö ni laa.’ 21Makonzi ti lo atene na lo: ‘So nzoni! Mo yeke nzoni zo ti kua si mo yeke sara ye na legeni! Kete ye so a mu na mo, mo sara kua na ni na legeni; fade mbi yeke zia mo na ndö ti akota ye ti mbi. Ga, mo na makonzi ti mo asara ngia.’ 22Zo ti kua so awara ale ti lôro ngbangbo use so aga nduru si lo tene: ‘Kota zo, mo mu na mbi lani ale ti lôro ngbangbo use. Baa, ambeni le ti lôro ngbangbo use so mbi wara na ndö ni laa.’ 23Makonzi ti lo atene na lo: ‘So nzoni! Mo yeke nzoni zo ti kua si mo yeke sara ye na legeni! Kete ye so a mu na mo, mo sara kua na ni na legeni; fade mbi yeke zia mo na ndö ti akota ye ti mbi. Ga, mo na makonzi ti mo asara ngia.’ 24Zo ti kua so awara ti lo ale ti lôro ngbangbo oko so aga nduru si lo tene: ‘Kota zo, mbi hinga so mo yeke mbeni koli so mo so mingi, mo yeke ko ale ti kobe na ndo so mo lu ale ti kobe daa pepe, mo yeke bongbi ale ti kobe na ndo so mo tuku ale ti kobe daa pepe. 25Mbeto agbu mbi si mbi gue, mbi honde nginza ti mo na ya ti sese. Baa, nginza ti mo laa.’ 26Makonzi ni akiri tënë na lo: ‘Sioni zo ti kua, mo yeke zo ti sopo! Mo hinga mo tene, mbi yeke ko ale ti kobe na ndo so mbi lu kobe daa pepe si mbi yeke bongbi ale ti kobe na ndo so mbi tuku ale ti kobe daa pepe. 27Mo lingbi fade ti zia nginza ti mbi na ndo-kua ti batango nginza titene tongana mbi kiri, mbi wara mbeni kete nginza na ndö ni pepe? 28Ala zi ale ti lôro ngbangbo oko so na maboko ti lo, ala mu na zo so ayeke na ale ti lôro saki oko so, 29ngbanga ti so zo so kue ayeke na ye, fade a kiri amu mbeni na ndö ni na lo si lo yeke na ye ahon ndoni; me zo so ayeke na ye pepe, ataa kete ye so lo yeke na ni, fade a yeke zi na maboko ti lo. 30Ti zo ti kua so ahinga ti sara mbeni nzoni ye oko pepe so, ala bi lo na gigi na ya ti vukongo ndo; kâ, gi toto na tengo pembe.’” 31“Na ndembe so Molenge ti Zo ayeke ga ande na ya ti gonda ti lo na a-ange ti lo kue na tere ti lo, lo yeke duti na ndö ti mbata ti lo ti gbia so ayeke mbata ti gonda. 32Fade a yeke bongbi amara kue na dawa ti lo; lo yeke kangbi popo ti ala tongana ti so wabatango-taba ayeke kangbi popo ti ataba ti lo na angasa ti lo: 33lo yeke zia ataba na mbage ti maboko ti lo ti koli si lo yeke zia angasa na mbage ti maboko ti lo ti wali. 34Tongaso, fade Gbia ni ayeke tene na azo so ayeke na mbage ti maboko ti lo ti koli: ‘Ala ga, ala so Babâ ti mbi asara tufa na ndö ti ala; ala ga awa ti Kodro-gbia ti yayu so lo leke ni ndali ti ala ando, ngbene ye so dunia abaa gigi. 35Biani, nzara asara mbi, ala mu na mbi kobe ti te; nzara ti ngu asara mbi, ala mu na mbi ngu ti nyon; mbi yeke wande, ala yamba mbi na ndo ti ala; 36tere ti mbi ayeke senge, ala yu bongo na mbi; tere ti mbi aso, ala ga abaa mbi; mbi yeke na da ti kanga, ala ga abaa mbi.’ 37Tongaso, fade azo ti mbirimbiri ayeke kiri tënë na lo: ‘Kota Gbia, lawa laa e baa mo na nzara si e mu na mo kobe ti te? Lawa laa e baa mo na nzara ti ngu si e mu na mo ngu ti nyon? 38Lawa laa e baa mo, mo yeke wande si e yamba mo na ndo ti e? Lawa laa tere ti mo ayeke senge si e yu na mo bongo? 39Lawa laa tere ti mo aso wala mo yeke na da ti kanga si e gue e baa mo?’ 40Fade Gbia ni ayeke kiri tënë na ala: ‘Mbi tene na ala taa-tënë: ye so kue ala sara na asenge zo so ayeke a-ita ti mbi, andaa na mbi laa ala sara ni.’ 41“Na pekoni, fade Gbia ni ayeke tene na azo so ayeke na mbage ti maboko ti lo ti wali: ‘Ala hon yongoro na tere ti mbi, ala so Nzapa adeba ala awe so! Ala gue na ya ti kota wâ so ayeke gbi lakue lakue, so a leke ni ndali ti Zabolo na a-ange ti lo. 42Biani, nzara asara mbi, ala mu na mbi kobe ti te pepe; nzara ti ngu asara mbi, ala mu na mbi ngu ti nyon pepe; 43mbi yeke wande, ala yamba mbi na ndo ti ala pepe; tere ti mbi ayeke senge, ala yu na mbi bongo pepe; tere ti mbi aso si mbi yeke na da ti kanga, ala gue abaa mbi pepe.’ 44Fade azo ni ayeke kiri tënë na lo: ‘Kota Gbia, lawa laa nzara ti kobe wala nzara ti ngu asara mo, wala mo yeke wande, wala tere ti mo ayeke senge, wala tere ti mo aso, wala mo yeke na da ti kanga, e baa mo si e ke ti mu na mo maboko?’ 45Fade Gbia ni ayeke kiri tënë na ala: ‘Mbi tene na ala taa-tënë: lakue so ala sara ye so na asenge zo so pepe, andaa ala sara ni nga na mbi pepe.’ 46Fade asioni zo so ayeke gue na ngbanga so angba lakue lakue si azo ti mbirimbiri ayeke gue ti duti na fini so angba lakue lakue.”

will be added

X\