MATTHIEU 23

1Na pekoni, Jésus atene tënë na gba ti azo nga na adisiple ti lo, atene: 2“Kua ti awafango-ndia na ti afarizien ayeke ti fa nda ti Ndia ti Moïse na azo. 3Tongaso ala, adisiple, ala ma atënë so ala yeke fa! Ala sara ye so kue ala hunda na ala; me ala sara ye tongana ti ala pepe, ngbanga ti so ye so ala yeke fa, ala sara ye alingbi na ni pepe. 4Ala kanga nengo kungba si ala zia ni na li ti azo; me ala wani, ala ye ti ndu kungba ni na maboko ti ala kete pepe. 5Ye so kue awafango-ye ni ayeke sara, ala yeke sara ni gi titene azo abaa ala. Tongaso, ala yeke sara titene ya ti akete kete bozo ti poro so ala su tënë ti Nzapa si azia na ya ni so akono, kamba so ala leke na yanga ti bongo ti ala aga kota 6Ala ye ti duti gi na akozo ngende na ya ti amatanga, ala ye ti duti na ndö ti akozo ngende so ayeke na ya ti ada ti sambelango Nzapa. 7Ala ye titene azo abara ala na ndo so azo abongbi daa si airi ala ‘Wafango-ye’. 8Me ti ala azo ti mbi, ayeke nzoni ala yeda titene azo airi ala ‘Wafango-ye’ pepe, ngbanga ti so ala kue ayeke a-ita si Wafango-ye na ala ayeke gi oko. 9Ala iri mbeni zo ti ndö ti sese so ‘Babâ’ pepe, ngbanga ti so ala yeke gi na Babâ oko so ayeke na yayu. 10Ala yeda titene azo airi ala ‘Makonzi’ pepe, ngbanga ti so ala yeke gi na Makonzi oko so ayeke Mesii. 11Zo so ayeke kota zo na popo ti ala, ayeke nzoni lo ga zo ti sarango kua na ala. 12Zo so asara tere ti lo tongana kota zo, fade a yeke sara si lo ga kete zo. Zo so asara tere ti lo tongana kete zo, fade a yeke sara si lo ga kota zo.” 13“Mawa na ala, awafango-ndia, ala na afarizien! Tënë ti yanga ti ala ayeke nde na sarango ye ti ala! Ala kanga lege ti Kodro-gbia ti yayu na azo. Ala wani aye ti li na ya ti Kodro-gbia ti yayu ni pepe, me ala yeke kanga lege ni na azo so aye ti li daa. [ 14“Mawa na ala, awafango-ndia, ala na afarizien! Tënë ti yanga ti ala ayeke nde na sarango ye ti ala! Ala yeke ro aye kue ti ya ti da ti awali-mua si ala yeke sara ayongoro sambela titene azo abaa ala. Fade a yeke fâ ngbanga na li ti ala ngangu mingi!] 15“Mawa na ala, awafango-ndia, ala na afarizien! Tënë ti yanga ti ala ayeke nde na sarango ye ti ala! Ala yeke tambula na ndo kue, na ndö ti sese wala na ndö ti akota ngu-ingo titene ala wara mbeni zo oko so alingbi ti mu peko ti ala. Tongana zo ni amu peko ti ala awe, ala sara si lo lingbi na ngbanga ti ndo so wâ ayeke gbi daa lakue; ala sara si lo lingbi na ni fani use ahon ala. 16“Mawa na ala, ala awaziba so ayeke fa lege na amba ti ala! Ala yeke tene: ‘Zo so adeba na iri ti kota da ti Nzapa, so ayeke senge; me tongana lo deba na iri ti lôro so ayeke na ya ti kota da ti Nzapa ni, andaa lo kanga tere ti lo awe.’ 17Abuba zo, ala awaziba so! Na popo ti lôro na kota da ti Nzapa, nyen laa ayeke kota nyen? Lôro wala kota da ti Nzapa so asara si lôro ni aga ye ti Nzapa so? 18Ala kiri atene na azo: ‘Tongana mbeni zo adeba na iri ti gbalaka, so ayeke senge; me tongana lo deba na iri ti sandaga so ayeke na ndö ti gbalaka ni, andaa lo kanga tere ti lo awe.’ 19Ala awaziba so! Na popo ti sandaga na gbalaka so ayeke sara titene sandaga ni aga ye ti Nzapa so, nyen laa ayeke kota nyen? 20Zo so adeba na iri ti gbalaka, andaa lo deba gi na iri ti gbalaka ni pepe, me na iri ti aye so kue ayeke na ndö ni. 21Zo so adeba na iri ti kota da ti Nzapa, andaa lo deba gi na iri ti kota da ti Nzapa pepe, me na iri ti Nzapa so ayeke na ya ti da ni. 22Zo so adeba na iri ti yayu, andaa lo deba na iri ti mbata ti Gbia Nzapa nga na iri ti Nzapa so aduti na ndö ni. 23“Mawa na ala, awafango-ndia, ala na afarizien! Tënë ti yanga ti ala ayeke nde na sarango ye ti ala! Ala yeke mu dime ti aye ti ala, ataa akete kete ye ti yaka ti ala; me kota tënë ti Ndia, ala baa ni gi tongana senge ye na le ti ala. Kota tënë ti Ndia ni ayeke sarango ye ti mbirimbiri, bango mawa ti azo, ngbango na lege ti tënë ti Nzapa. Ye so ala lingbi fade ti sara ni laa, me ala zia pepe ti sara tanga ti aye ni. 24Ala awaziba so ayeke fa lege na amba ti ala so! Ala yeke sara ye kue ti kanga lege na akete ngungu ti ti na ya ti ngu so ala yeke nyon, me ala yeke mene zambala so ati na ya ti ngu ni! 25“Mawa na ala, awafango-ndia, ala na afarizien! Tënë ti yanga ti ala ayeke nde na sarango ye ti ala! Ala yeke sukula tere ti akopo na asembe ti ala, me na ya ti akopo na asembe ni, gi aye ti nzi na aye ti kota be laa asi singo daa. 26Mo farizien, so mo yeke waziba so! Sukula ya ti kopo ti mo kozoni si fade peko ni nga avuru! 27“Mawa na ala, awafango-ndia, ala na afarizien! Tënë ti yanga ti ala ayeke nde na sarango ye ti ala! Ala kpa gi adu ti kuâ so azo aleke ndö ni na mbamba. Ndö ni ayeke pendere, me na ya ni, abio na afungo ye nde nde asi singo daa. 28Ala nga, ala yeke tongaso. Na le ti azo, ala kpa azo ti mbirimbiri, me be ti ala ayeke nde si siokpari asi singo daa. 29“Mawa na ala, awafango-ndia, ala na afarizien! Tënë ti yanga ti ala ayeke nde na sarango ye ti ala! Ala yeke leke adu ti kuâ ti awayanga-Nzapa, ala yeke leke aye ti pendere na ndö ti adu ti kuâ ti azo ti mbirimbiri. 30Na pekoni, ala tene: ‘Tongana e yeke ando na ngoi ti akotara ti e, ka e yeda ti bongbi na ala ti fâ awayanga-Nzapa pepe.’ 31So ti fa atene, ala wani ahinga atene, ala yeke ahale ti azo so afâ ando awayanga-Nzapa so. 32Nzoni! Ala ngba gi daa ma! Ala hunzi kua so akotara ti ala ato nda ti sarango ni ando so ma! 33Ala angbo, ala asioni mara ti ngbo! Fade ala yeke sara tongana nyen ti kpe ngbanga so ayeke ku ala na ndo so wâ ayeke gbi daa lakue so? 34Ndani laa, mbi yeke tokua na ala awayanga-Nzapa, azo ti ndara na awafango-ndia. Ala, afarizien na awafango-ndia, ala yeke fâ ande ambeni si ala yeke fâ ambeni na ndö ti keke ti kroa. Ala yeke pika ambeni na fimbo na ya ti ada ti sambelango Nzapa ti ala si ala yeke tumba peko ti ala na ya ti agbata oko oko kue. 35Tongaso, fade ngbanga ti mene ti azo ti mbirimbiri so kue ala fâ ala so ayeke kiri na li ti ala. Kozo zo so a fâ lo ayeke Abel, zo ti mbirimbiri. Tanga ti zo ni ayeke Zakarii, molenge ti Barashii; a fâ ando lo na popo ti ndo so ayeke nzoni kue na ti gbalaka ti sandaga, na kota da ti Nzapa. 36Mbi tene na ala taa-tënë: fade ngbanga ti ye so kue ayeke ti na li ti azo ti fadeso!” 37“Jérusalem! Jérusalem! Mo so mo yeke fâ awayanga-Nzapa; azo so Nzapa atokua ala na mo, mo bo ala na têne ti fâ ala. Lege mingi, mbi ye fade ti bongbi azo ti mo na gbe ti mbi tongana ti so mama ti kondo ayeke bongbi amolenge ti lo na gbe ti maboko ti lo, me mo yeda pepe! 38Fade ya ti da ti ala ayeke ngba senge senge. 39Mbi tene na ala so fade ala kiri ti baa mbi pepe ngbii asi na ngoi so ala yeke tene ande, atene: ‘Ayeke nzoni Nzapa asara tufa na ndö ti lo so aga na iri ti Kota Gbia!’ ”

will be added

X\