MATTHIEU 2

1A du Jésus na Betlehem, mbeni gbata ti sese ti Judée, na ngoi ti gbia Herode. Na pekoni, azo ti gingo nda ti atongoro alondo na mbage ti To, ala si na Jérusalem. 2Ala hunda ndo, atene: “Molenge so a du lo titene lo ga gbia ti azuife so ayeke na ndo wa? E baa tongoro ti lo so asigigi na mbage ti To, nilaa e ga ti voro lo.” 3So gbia Herode ama tënë so, li ti lo aga kirikiri, lo na azo ti Jérusalem kue. 4Lo bongbi akota wayango-sandaga na awafango-ndia ti azuife kue si lo hunda ala, lo tene: “A yeke du ande Mesii ni na ndo wa?” 5Ala kiri tënë na lo: “Na Betlehem, mbeni gbata ti sese ti Judée. Baa, wayanga-Nzapa atene tënë na ndö ti lo, atene: 6‘Mo Betlehem, mo so mo yeke na sese ti Juda, mo yeke biani kete kodro pepe na popo ti akota kodro ti Juda, ngbanga ti so, na ya ti mo, fade mbeni gbia ayeke sigigi ti fa lege na azo ti Israel, azo ti Nzapa.’ ” 7Tongaso Herode airi azo ti gingo nda ti atongoro ni na hondengo ni. Lo hunda ala ti hinga mbirimbiri ngoi so tongoro ni asigigi na ni. 8Na pekoni, lo tokua ala na Betlehem si lo tene na ala: “Ala gue agi nda ti tënë ti molenge so nzoni. Tongana ala wara lo, ala ga atene tënë ni na mbi si mbi nga, mbi gue ti voro lo.” 9So ala ma tënë ti gbia so awe, ala mu lege ague. Mo ye ti baa, ala baa tongoro so asigigi na mbage ti To so ala baa ni kozoni so: tongoro ni atambula na dawa ti ala ngbii ague aluti na ndö ti da so molenge ni ayeke daa. 10Be ti azo ti gingo nda ti atongoro ni asi na ngia na bango tongoro ni. 11Ala li na ya ti da ni si ala baa molenge ni na mama ti lo Marie. Ala kuku na sese si ala voro molenge ni. Na pekoni, ala zi ya ti akungba ti ala si ala mu anzoni ye na molenge ni: lôro, dukani na mire. 12Na pekoni, Nzapa atene tënë na ala na ya ti bango-li titene ala kiri na ndo ti Herode pepe. Tongaso, ala mu mbeni lege nde, ala kiri na kodro ti ala. 13Na peko ti so azo ti gingo nda ti atongoro ni amu lege ague awe, mbeni ange ti Kota Gbia asi na Joseph na ya ti bango-li. Lo tene na Joseph: “Londo, mu molenge ni, lo na mama ti lo, ala kpe ague na Ezipte, aduti kâ! Tongana mbi mu yanga na mo ti kiri si mo kiri, ngbanga ti so Herode ayeke gi lege ti fâ molenge ni.” 14Joseph alondo gi na bi ni, lo mu molenge ni, lo na mama ti lo si lo kpe, lo gue na Ezipte. 15Lo ngba kâ ngbii asi na ngoi so Herode akui. Ye ni asi alingbi na tënë so Kota Gbia atene ando na yanga ti wayanga-Nzapa, atene: “Mbi iri molenge ti mbi titene lo sigigi na Ezipte.” 16So Herode ahinga atene, azo ti gingo nda ti atongoro ahanda lo awe, ngonzo agbu lo ngangu mingi. Lo mu yanga titene a fâ akete molenge-koli kue ti gbata ti Betlehem na ti akodro so ayeke nduru na tere ni. A fâ amolenge so ngu ti ala ayeke use na ala so ade awara ngu use pepe. Herode asara ye ni alingbi na tënë so azo ti gingo nda ti atongoro atene na lo na ndö ti lango ti sigingo ti tongoro ni. 17Tongaso, tënë so wayanga-Nzapa Jérémie atene ando, aga taa-tënë; lo tene: 18“A ma mbeni go na kodro ti Rama, toto na demango tere ahon ndoni: Rachel laa ayeke toto amolenge ti lo; lo ke ti ma awango so alingbi ti de be ti lo, ngbanga ti so amolenge ni ayeke daa mbeni pepe.” 19So Herode akui awe, ange ti Kota Gbia asi na Joseph na ya ti bango-li kâ na Ezipte. 20Lo tene na Joseph: “Londo, mu molenge ni, lo na mama ti lo, mo kiri na sese ti Israel, ngbanga ti so ala so agi lege lani ti fâ molenge ni akui awe.” 21Joseph alondo amu molenge ni, lo na mama ti lo si lo kiri na sese ti Israel. 22So Joseph ama atene, Arkelaos aga gbia ti Judée na peko ti babâ ti lo Herode, mbeto ti duti na ya ti kodro ni agbu lo. Na peko ti tënë so Nzapa atene na lo na ya ti bango-li so, lo mu lege, lo gue na sese ti Galile. 23Lo gue lo duti na mbeni gbata so iri ni Nazaret. Ye ni asi tongaso titene tënë ti awayanga-Nzapa aga taa-tënë; ala tene ando, atene: “Fade a yeke iri lo, zo ti Nazaret.”

will be added

X\