MATTHIEU 16

1Afarizien na asadusien aga nduru na tere ti Jésus; ala ye ti sara si lo ti na ya ti gbanda ti ala. Nilaa ala hunda na lo titene lo sara mbeni ye ti kpene ti fa na ala so Nzapa laa atokua lo. 2Me Jésus akiri tënë na ala: “Na lakui, tongana le ti nduzu abe bengo, ala tene: ‘Kekereke, le ti nduzu ayeke nzoni.’ 3Na ndaperere, tongana le ti nduzu abe si akiri avuko vukongo, ala tene: ‘Fade ngu ayeke pika.’ Ala hinga ti fa nda ti le ti nduzu, me aye so ayeke si fadeso, ala lingbi ti fa nda ni pepe! 4Azo ti fadeso ayeke azo ti sioni, ala yeke ma yanga ti Nzapa pepe! Ala yeke hunda ti baa mbeni ye ti kpene, me fade ala yeke baa mbeni ye ti kpene oko pepe, gi ye ti kpene so asi ando na Jonas so alingbi awe!” Na pekoni, Jésus azia ala na ndo so si lo mu lege, lo hon. 5So adisiple ayeke fâ kota ngu ti gue na mbage ni kâ, ala girisa ti mu mapa. 6Jésus atene na ala: “Ala sara hange! Le ti ala akpengba na mama ti mapa ti afarizien na ti asadusien!” 7Adisiple atene na popo ti ala: “Lo yeke tene tënë so, ngbanga ti so e mu mapa pepe.” 8Jésus ahinga tënë so ala yeke tene na popo ti ala si lo hunda ala, lo tene: “Ala azo ti kete mabe, tënë ti nyen laa ala yeke tene na popo ti ala na ndö ti tënë ti mapa so ala yeke na ni pepe so? 9Ala de ti hinga ndo pepe? Mapa oku so akoli saki oku ate so, ala ro lani tanga ni asi sakpa oke? Ala dabe ti ala na ni pepe? 10Mapa mbarambara so akoli saki osio ate so, ala ro tanga ni asi sakpa oke? Ala dabe ti ala nga na ni pepe? 11Mbi tene fade na ala, mbi tene: ‘Ayeke nzoni le ti ala akpengba na mama ti mapa ti afarizien na ti asadusien!’ Mbi yeke tene tënë ti mapa pepe. Asara tongana nyen si ala ma ya ti tënë ti mbi ni pepe so?” 12Tongaso, adisiple ahinga atene, lo yeke tene tënë na ala titene ala kpe mama ti mapa pepe, me ala kpe fango ye ti afarizien na ti asadusien. 13Jésus asi nduru na sese ti Sezare ti Philippe. Lo hunda adisiple ti lo, lo tene: “Azo ayeke tene Molenge ti Zo ayeke zo wa?” 14Ala kiri tënë na lo: “Ambeni zo atene, mo yeke Jean-Baptiste, ambeni atene, mo yeke Élie si ambeni nga atene, mo yeke Jérémie wala mbeni wayanga-Nzapa.” 15Jésus akiri ahunda ala: “Me ti ala, ala tene mbi yeke zo wa?” 16Simon Pierre akiri tënë: “Mo yeke Mesii, Molenge ti Nzapa so ayeke na fini.” 17Jésus akiri tënë na lo: “Ti mo nzoni Simon, molenge ti Jean! Tënë so mo tene so, zo laa azia ni na yanga ti mo pepe, me Babâ ti mbi so ayeke na yayu laa afa na mo. 18Tongaso mbi tene na mo: mo yeke Pierre. Na ndö ti têne so, mbi yeke leke ande Eglize ti mbi; fade kuâ ayeke na ngangu pepe ti hon ndö ti Eglize ti mbi. 19Mbi yeke mu ande na mo akerere ti yanga ti Kodro-gbia ti yayu. Ye so kue mo yeke gbanzi lege ni na sese ge, fade Nzapa ayeke gbanzi lege ni na yayu kâ. Ye so kue mo yeke zi lege ni na sese ge, fade Nzapa ayeke zi lege ni na yayu kâ.” 20Na pekoni, Jésus amu yanga na adisiple ti lo, atene: “Ala tene na zo pepe atene, mbi yeke Mesii.” 21Ti londo na ndembe ni so, Jésus ato nda ti tene tënë polele na adisiple ti lo, atene: “Alingbi mbi gue na Jérusalem ti baa pasi mingi na maboko ti akangba na akota wayango-sandaga na awafango-ndia. Ala yeke fâ mbi, me na lango ota ni, mbi yeke zingo na kuâ.” 22Pierre amu Jésus, ague na lo yongoro kete si lo to nda ti suku na lo, lo tene: “Kota Gbia, Nzapa abata mo! Ye so mo tene tënë ni so ayeke si na mo pepe!” 23Me Jésus abaa ndo na peko si lo tene na Pierre: “Satan, hon kâ na tere ti mbi! Mo yeke gi ti kinda mbi, ngbanga ti so bango ndo ti mo ayeke tongana ti Nzapa pepe, me ayeke tongana ti zo.” 24Na pekoni, Jésus atene na adisiple ti lo: “Tongana mbeni zo aye ti mu peko ti mbi, ayeke nzoni lo zia ti gbu li ti lo na ndö ti lo wani, lo yo keke ti kroa ti lo si lo mu peko ti mbi. 25Biani, zo so aye ti soo fini ti lo, fade lo yeke girisa ni; me zo so ayeke girisa fini ti lo ndali ti mbi, fade lo yeke kiri ti wara ni. 26Tongana zo awara aye ti dunia so kue si lo girisa fini ti lo, nzoni ye ti nyen laa lo yeke wara na peko ni? Nyen laa zo alingbi ti mu ti vo na fini ti lo? 27Biani, Molenge ti Zo ayeke ga ande na a-ange ti lo na ya ti gonda ti Babâ ti lo. Fade lo yeke futa zo oko oko alingbi na sarango ye ti lo. 28Mbi tene na ala taa-tënë: na popo ti azo so ge so, ambeni ayeke kui pepe ngbii ala baa Molenge ti Zo so ayeke ga ti duti tongana Gbia.”

will be added

X\