MATTHIEU 14

1Na ndembe ni so, Herode, govoronere ti Galile ama sango ti Jésus; 2lo tene na akota zo ti gbe ti lo, lo tene: “So Jean-Baptiste laa: lo zingo na kuâ si lo kiri na fini awe! Ndani laa lo wara ngangu ti sarango na aye ti kpene.” 3Andaa Herode amu lani yanga na azo titene ala gbu Jean, akanga lo na zingiri si abi lo na da ti kanga. Herode akanga lo ndali ti Herodiade, wali ti ita ti lo Philippe. 4Lo kanga lo, ngbanga ti so Jean atene lani na lo, atene: “Ndia amu lege na mo pepe titene mo mu Herodiade ti ga wali ti mo!” 5Herode aye lani ti fâ lo, me lo kpe mbeto ti azuife, ngbanga ti so ala baa Jean tongana wayanga-Nzapa. 6Na lango ti matanga ti dungo Herode, molenge ti Herodiade ti wali adodo na le ti azo so Herode atisa ala. Lo zia ngia mingi na be ti Herode. 7Nilaa lo deba yanga ti mu na molenge-wali ni ye so kue lo yeke hunda. 8Mama ti molenge-wali ni apusu lo si molenge-wali ni atene na Herode: “Mu na mbi li ti Jean-Baptiste na ya ti kpangbara sembe fafadeso, na ndo so!” 9Vundu agbu be ti gbia ni; me ndali ti so lo deba yanga ti lo na le ti azo so lo tisa ala, lo mu yanga ti mu li ti Jean na lo. 10Lo tokua mbeni zo na da ti kanga ti gue ti fâ li ti Jean-Baptiste. 11Lo zia li ni na ya ti kpangbara sembe, lo ga na ni si lo mu na molenge-wali ni; molenge ni amu ni na mama ti lo. 12Adisiple ti Jean aga amu kuâ ti lo si ala lu ni. Na pekoni, ala gue atene tënë ni na Jésus. 13So Jésus ama tënë so, lo londo na ndo so, lo ko na ya ti ngo si lo gue na mbeni ndo so zo ayeke daa pepe. Gba ti azo ama atene lo hon, ala londo na ya ti agbata nde nde si ala mu peko ti lo na gere. 14So Jésus asigigi na ya ti ngo ni, lo baa gba ti azo; mawa ti ala agbu lo si lo kai kobela ti azo so ayeke na kobela. 15So lâ akui awe, adisiple aga nduru na tere ti lo si ala tene na lo: “Lâ akui awe, ndo so ayeke ngonda. Zia lege na azo ni ti gue na ya ti akete kodro ti vo kobe ti tengo ni.” 16Jésus akiri tënë na ala: “Mbi baa ti mbi nzoni titene azo ni ague pepe; ala wani amu kobe na azo ni!” 17Adisiple atene na lo: “Na ndo so, e yeke gi na mapa oku na susu use.” 18Jésus atene na ala: “Ala ga na ni na mbi.” 19Na pekoni, lo mu yanga na azo ni titene ala kue aduti na ndö ti pere. Lo mu mapa oku na susu use so, lo yo le ti lo na nduzu, lo mu singila na Nzapa. Lo fâ ya ti mapa ni, lo mu na adisiple ti lo si ala kangbi ni na gba ti azo ni. 20Zo oko oko ate, ya ti lo asi. Adisiple aro tanga ti anduru ni, asi sakpa baleoko na use. 21Azo so kue ate kobe ni, wungo ti ala aga nduru na saki oku; a diko awali na amolenge daa pepe. 22Gi na pekoni, Jésus amu yanga na adisiple ti lo titene ala ko na ya ti ngo ti gue kozo ti lo na mbage ti ngu ni. Lo ngba ti lo na ndo so titene lo zia lege na gba ti azo ni ti kiri na da ti ala. 23So lo zia lege na ala si ala gue awe, lo gue na li ti hoto yongoro kâ ti sambela. So ndo avuko awe, lo ngba ti duti kâ gi lo oko. 24Ngo ni ague ayo na yanga ti ngu ni. Pupu ayeke kiri na ala kiringo na peko si amapo ayeke pika tere ti ngo ni. 25So ndo aga nduru ti han, Jésus ayeke tambula na gere na le ti ngu si lo yeke ga na mbage ti adisiple ti lo. 26Ala baa lo na tambulango na le ti ngu ni, li ti ala akpe si ala tene: “So toro laa!” Mbeto asara ala si ala dekongo. 27Gi na pekoni, Jésus atene na ala: “Ala de be ti ala, so mbi laa! Mbeto asara ala pepe!” 28Pierre atene na lo: “Kota Gbia, tongana mo biani laa, mo mu yanga titene mbi tambula na le ti ngu, mbi gue na mo kâ.” 29Jésus atene na lo: “Ga!” Pierre asigigi na ya ti ngo ni si lo tambula na le ti ngu ti gue na mbage ti Jésus. 30Me so lo baa pupu ni ayeke ya ngangu mingi, mbeto agbu lo si lo to nda ti linda ngu. Lo dekongo, lo tene: “Kota Gbia, soo mbi!” 31Gi hio tongaso, Jésus ayoro maboko ti lo, agbu lo si atene na lo: “Mo, zo ti kete mabe, mo dekite ngbanga ti nyen?” 32So ala use kue ako na ya ti ngo ni awe, pupu ni akai. 33Adisiple so ayeke na ya ti ngo ni akuku na gbe ti lo si ala tene na lo: “Biani, mo yeke Molenge ti Nzapa!” 34Na peko ti so ala fâ ngu awe, ala si na sese ti Genezaret. 35Azo ti ndo ni kâ ahinga Jésus si ala tene tënë ti gango ti lo na azo ti sese ni kue. Azo amu azo ti kobela kue aga na ala na lo. 36Ala voro lo titene lo zia azo ti kobela ni andu gi yanga ti bongo ti lo. Azo so kue andu ni, tere ti ala aga nzoni.

will be added

X\