MARC 8

1Na ngoi ni so, gba ti azo akiri abongbi tere ti ala. So azo ni ayeke na ye ti tengo ni pepe, Jésus airi adisiple ti lo si lo tene na ala: 2“Mawa ti gba ti azo so agbu mbi, ngbanga ti so na ya ti lango ota so ala yeke na tere ti mbi, ala yeke na ye ti tengo ni pepe. 3Tongana mbi tene, ala kiri na ndo ti ala si mbi mu na ala kobe pepe, fade ala yeke woko na nzara na lege; ambeni ayeke daa so alondo yongoro si aga.” 4Adisiple ti lo akiri tënë na lo: “So e yeke ge na ngonda so, fade e yeke wara kobe na ndo wa ti mu na ala titene ala te si ya ti ala asi?” 5Jésus ahunda ala, atene: “Ala yeke na mapa oke?” Ala kiri tënë na lo: “Mbarambara.” 6Tongaso lo mu yanga na azo ni kue ti duti na sese. Na pekoni, lo mu mapa mbarambara so, lo mu singila na Nzapa, lo fâ ya ni si lo mu na adisiple ti lo ti kangbi ni na azo ni. Nilaa adisiple akangbi ni na azo ni. 7Ala yeke nga na ambeni kete susu. Jésus amu singila na Nzapa ngbanga ti asusu so si lo tene na adisiple ti lo ti kangbi nga ni na azo ni. 8Ala te, ya ti ala asi. Adisiple aro tanga ti anduru kobe ni asi sakpa mbarambara. 9Li ti azo ni ayeke lani saki osio. Na pekoni, Jésus atene na ala ti kiri na ndo ti ala. 10Gi hio na pekoni, lo ko na ya ti ngo, lo na adisiple ti lo si lo gue na sese ti Dalmanuta. 11Afarizien asi si ala to nda ti bingbi tënë na Jésus. Ala ye ti sara si lo ti na ya ti gbanda ti ala; nilaa ala hunda na lo titene lo sara mbeni ye ti kpene ti fa na ala so Nzapa laa atokua lo. 12Jésus awu ngangu si lo tene na ala: “Ngbanga ti nyen si azo ti fadeso ayeke hunda mbeni ye ti kpene so? Mbi tene na ala taa-tënë: fade azo so ayeke baa mbeni ye ti kpene oko pepe!” 13Na pekoni, lo zia ala, lo ko na ya ti ngo si lo fâ ngu, lo gue na mbage ti ngu ni. 14Adisiple ti Jésus agirisa ti mu mapa; ala yeke gi na mapa oko na ya ti ngo ni. 15Jésus amu yanga na ala, atene: “Ala sara hange! Le ti ala akpengba na mama ti mapa ti afarizien na ti Herode!” 16Adisiple atene na popo ti ala: “E yeke na mapa pepe.” 17Jésus ahinga tënë so ala yeke tene na popo ti ala si lo hunda ala, lo tene: “Ngbanga ti nyen ala tene: ‘E yeke na mapa pepe’? Ala de ti hinga ndo pepe? Ala ma ya ti tënë ni pepe? Ala yeke na ndara pepe? 18Le ti ala ayeke daa ti baa na ndo pepe? Mê ti ala ayeke daa ti ma na ndo pepe? Li ti ala agirisa? 19Lani so mbi fâ ya ti mapa oku ti kangbi na azo saki oku, tanga ti anduru ni asi sakpa oke si ala mu ague na ni so?” Ala kiri tënë na lo: “Baleoko na use.” 20Jésus akiri ahunda ala, atene: “Lani so mbi fâ ya ti mapa mbarambara ti kangbi na azo saki osio, tanga ti anduru ni asi sakpa oke si ala mu ague na ni so?” Ala kiri tënë na lo: “Mbarambara.” 21Tongaso Jésus ahunda ala, atene: “Ade ala ma ya ni pepe?” 22Jésus na adisiple ti lo asi na Betsaida; ambeni zo amu mbeni waziba, aga na lo na Jésus si ala voro lo titene lo ndu lo. 23Jésus agbu maboko ti waziba ni si asigigi na lo na ya ti kodro ni. Na pekoni, lo tuku ngu ti yanga ti lo, lo zia na le ti zo ni; lo zia maboko na ndö ti lo si lo hunda lo, atene: “Mo baa mbeni ye?” 24Waziba ni azi le ti lo si lo tene: “Mbi baa azo, ala yeke tongana akeke, me ala yeke tambula.” 25Jésus akiri azia maboko na ndö ti le ti waziba ni si lo baa ndo nzoni: le ti lo azi awe, lo lingbi ti baa ndo fadeso nzoni. 26Tongaso Jésus atene na lo ti kiri na da ti lo; lo tene na lo: “Mo kiri na ya ti kodro ni pepe.” 27Na pekoni, Jésus na adisiple ti lo alondo na ndo so, ala hon na mbage ti akete kodro ti sese ti Sezare ti Philippe. Na lege, lo hunda ala, lo tene: “Azo atene mbi yeke zo wa?” 28Ala kiri tënë na lo: “Ambeni atene mo yeke Jean-Baptiste, ambeni atene mo yeke Élie si ambeni nga atene, mo yeke mbeni wayanga-Nzapa.” 29Jésus ahunda ala, atene: “Me ti ala, ala tene mbi yeke zo wa?” Pierre atene na lo: “Mo yeke Mesii.” 30Tongaso Jésus agboto mê ti ala ngangu ti tene tënë ni na zo oko pepe. 31Na pekoni, Jésus ato nda ti fa ye na adisiple ti lo, lo tene: “Alingbi Molenge ti Zo abaa pasi mingi. Akangba, na akota wayango-sandaga na awafango-ndia ayeke ke lo, ala yeke fâ lo si lango ota na pekoni, lo yeke zingo na kuâ.” 32Lo tene tënë ni na ala polele. Tongaso Pierre airi lo, ague na lo yongoro kete si ato nda ti suku na lo. 33Me Jésus abaa ndo na peko, lo baa adisiple ti lo si lo suku na Pierre, lo tene: “Satan, hon kâ na tere ti mbi, ngbanga ti so bango ndo ti mo ayeke tongana ti Nzapa pepe, me ayeke tongana ti zo.” 34Na pekoni, Jésus airi gba ti azo nga na adisiple ti lo si lo tene na ala: “Tongana mbeni zo aye ti mu peko ti mbi, ayeke nzoni lo zia ti gbu li na ndö ti lo wani, lo yo keke ti kroa ti lo si lo mu peko ti mbi. 35Biani, zo so aye ti soo fini ti lo, fade lo yeke girisa ni; me zo so ayeke girisa fini ti lo ndali ti mbi nga ndali ti Nzoni Tënë, fade lo yeke soo ni. 36Tongana zo awara aye ti dunia so kue si lo girisa fini ti lo, nzoni ye ti nyen laa lo yeke wara na peko ni? 37Nyen laa zo alingbi ti mu ti vo na fini ti lo? 38Biani, azo ti fadeso ake ti ma yanga ti Nzapa, ala yeke sara gi sioni. Tongana mbeni zo asara kamene ti mbi na ti atënë ti mbi na le ti azo ti fadeso, fade Molenge ti Zo ayeke sara kamene ti zo ni na lango so lo yeke ga na ya ti gonda ti Babâ ti lo, na a-ange ti lo so ayeke nde si ayeke nzoni kue.”

will be added

X\