MARC 7

1Afarizien na ambeni wafango-ndia so alondo na Jérusalem aga, abongbi na tere ti Jésus. 2Ala baa so ambeni disiple ti lo ayeke mu asioni maboko ti ala gi tongaso si ayeke te na kobe; ala sukula ni pepe. 3Andaa afarizien na azuife kue ayeke bata ndia ti akotara ti ala. Tongana ala ye ti te kobe, ala yeke sukula maboko ti ala lakue nzoni nzoni si. 4Tongana ala londo na gara si ala kiri na da, kozoni titene ala te kobe, ala yeke sukula tere ti ala si. Ala bata ambeni ndia mingi: andia na ndö ti nzoni lege ti sukulango akopo ti ngu, ata ti ngu, asembe[ na agbogbo]. 5Afarizien na awafango-ndia ahunda Jésus, atene: “Ngbanga ti nyen si adisiple ti mo akpe ndia ti akotara ti e pepe si ala yeke te kobe na asioni maboko ti ala so?” 6Jésus akiri tënë na ala: “Ala azo so tënë ti yanga ti ala ayeke nde na sarango ye ti ala so, peko ti tënë ti yanga ti Nzapa so wayanga-Nzapa Ésaïe atene na ndö ti ala ando so, ayeke taa-tënë; a su na mbeti, atene: ‘Nzapa atene: Azo so ayeke ne mbi gi na yanga senge, me be ti ala ayeke yongoro na mbi mingi. 7Vorongo so ala yeke voro mbi, ayeke gi senge senge, ngbanga ti so ala yeke fa gi andia so azo laa asigigi na ni.’ ” 8Jésus atene na ala: “Ala afarizien na awafango-ndia, ala zia ndia ti Nzapa si ala yeke bata gi lege ti andia ti akotara ti ala.” 9Lo kiri lo tene na ala: “Ala ke biani ti sara ye so Nzapa ahunda na ala si ala yeke bata gi andia ti akotara ti ala! 10Biani, Moïse atene: ‘Mo ne babâ na mama ti mo!’ Lo kiri lo tene: ‘Zo so atene sioni tënë na tere ti babâ ti lo wala mama ti lo, lo lingbi na kuâ.’ 11Me ti ala, ala yeke tene: Zo so atene na babâ ti lo wala na mama ti lo, atene: ‘Mbi ye fade ti mu ye na mo, me ye ni so aga korban awe’, so ti tene ‘ye so a zia ni nde ndali ti Nzapa’. 12Tongaso ala mu na lo lege ti gbanzi ye na babâ wala mama ti lo. 13Na sarango ye tongaso, ala yeke buba ya ti tënë ti Nzapa na lege ti andia so ala yeke fa ni na popo ti ala. Ala sara gi mara ti aye tongaso mingi.” 14Na pekoni, Jésus airi gba ti azo ni si lo tene na ala: “Ala ma mbi nzoni si ala ma ya ti tënë so nzoni: 15Ye so alondo na gigi si ali na ya ti zo, alingbi ti sara si zo ni aga sioni pepe; me ye so ayeke sigigi na ya ti be ti zo laa asara lo ti ga sioni. [ 16Tongana mbeni zo ayeke na mê ti mango ndo, ayeke nzoni lo ma!”] 17So Jésus azia gba ti azo ni si lo kiri na da awe, adisiple ti lo ahunda lo na nda ti toli so. 18Lo tene na ala: “Ala nga, ala yeke na ndara ti ma ya ti tënë so pepe? Ala hinga pepe? Ye so alondo na gigi si ali na ya ti zo, alingbi ti sara si lo ga sioni pepe, 19ngbanga ti so ye ni ali na ya ti be ti lo pepe, me ali na ya ti lo si asigigi ague na ya ti du.” Jésus atene tënë so ti fa atene, e lingbi ti te akobe kue. 20Lo kiri lo tene: “Ye so ayeke sigigi na ya ti zo laa asara si lo ga sioni. 21Biani, asioni tënë ti be alondo na ya ti zo, na be ti lo si afa na lo lege ti sarango asioni ye: sarango ye ti ndumba, nzi, fango zo, 22gingo wali wala koli ti zo, sarango nzara ti ye ti zo, sioni be, handango zo, sarango ye ti kirikiri, kota be, tenengo sioni tënë na iri ti zo, sarango baba nga na sarango ye ti buba. 23Asioni ye so kue alondo gi na ya ti zo si asara titene lo ga sioni.” 24Na pekoni, Jésus alondo na ndo so si lo gue na sese ti Tir. Lo li na ya ti mbeni da si lo ye titene azo ahinga ndo so lo yeke daa pepe; me lo honde tere ti lo gbaa. 25Mbeni wali so molenge ti lo ti wali ayeke na sioni yingo ama tënë ti Jésus si lo ga hio na tere ti lo, lo ti na gbe ti lo. 26Andaa wali so ayeke zuife pepe; a du lo na Fenisii, na sese ti Sirii. Lo voro Jésus ti tumba sioni yingo so ayeke na ya ti molenge ti lo. 27Me Jésus atene na lo: “Mo zia amolenge ate kobe ya ti ala asi nzoni si! So ayeke na legeni pepe ti mu kobe ti amolenge ti tuku na akete mbo.” 28Wali ni akiri tënë na lo: “Taa-tënë, kota zo! Me akete mbo so ayeke duti na gbe ti meza ayeke te afuku ti kobe so ayeke ti na maboko ti amolenge.” 29Tongaso Jésus atene na lo: “Ndali ti kiringo tënë so, mo lingbi ti kiri na ndo ti mo senge; sioni yingo ni asigigi na ya ti molenge ti mo awe.” 30So lo kiri na da ti lo, lo baa molenge ni ayeke lango na ndö ti gbogbo; sioni yingo ni asigigi na ya ti lo awe. 31Jésus alondo na sese ti Tir, lo hon na ya ti sese ti Sidon; lo fâ, lo hon na ya ti Agbata-Baleoko si lo kiri na mbage ti kota ngu ti Galile. 32Ambeni zo amu mbeni koli, aga na lo na Jésus; mê ti lo akanga si lo yeke tene tënë nzoni pepe. Ala hunda na lo titene lo zia maboko ti lo na ndö ti koli ni. 33Tongaso Jésus amu lo gi lo oko, ague na lo yongoro na tere ti azo. Lo yoro ali ti maboko ti lo na ya ti mê ti koli ni, lo tuku ngu ti yanga ti lo si lo ndu na menga ti koli ni. 34Na pekoni, lo yo le ti lo na nduzu, lo wu si lo tene na koli ni: “Efata!”, so ti tene: “Zi tere ti mo!” 35Gi hio tongaso, mê ti koli ni azi; ye so akanga menga ti lo azi si lo to nda ti tene tënë nzoni. 36Jésus amu yanga na ala titene ala tene tënë ni na zo oko pepe. Me lakue tongana lo yeke ke na ala ti fa na azo tënë ti aye so lo sara, ala kiri adekongo na ni ahon ti kozoni. 37Azo so ama tënë ni, li ti ala kue akpe si ala tene: “Ye so kue lo yeke sara ayeke nzoni mingi! Lo yeke sara nga si azo so mê ti ala akanga ama ndo si abuburu atene tënë!”

will be added

X\