MARC 13

1So Jésus ayeke sigigi na ya ti kota da ti Nzapa, mbeni disiple ti lo atene na lo: “Wafango-ye, baa ye! So apendere têne! So pendere ti da!” 2Jésus atene na lo: “Mo baa kota da so? Fade mbeni têne oko ayeke ngba na ndö ti mba ti lo pepe; ye so kue ayeke tuku na sese.” 3Jésus aduti na li ti hoto ti a-olive so abaa le na kota da ti Nzapa. Pierre, Jacques, Jean na André, so ala yeke gi ala oko, ala hunda lo, atene: 4“Tene na e, ye ni ayeke si ande lawa? Nyen laa ayeke fa lango so aye so kue ayeke si na ni?” 5Tongaso Jésus atene na ala: “Ala sara hange si mbeni zo ahanda ala pepe! 6Fade azo mingi ayeke ga na iri ti mbi si zo oko oko ayeke tene: ‘Mbi laa mbi yeke Mesii!’ Ala yeke handa gba ti azo. 7Ala azo ti mbi, tongana ala yeke ma tënë ti bira so aga nduru wala tënë ti bira so angba yongoro, ala sara mbeto pepe! Alingbi aye so asi, me so laa ayeke hunzingo ti aye kue pepe. 8Fade mbeni mara ayeke londo ti tiri na mbeni mara, mbeni kodro-gbia ayeke londo ti tiri na mbeni kodro-gbia; sese ayeke yingi na ando nde nde, kota nzara ayeke ga. Fade aye so ayeke duti tongana kozo songo ti ya ti wali so aga nduru ti du. 9Me ti ala, ala sara hange! Fade azo ayeke gue na ala na gbe ti ngbanga; azo ayeke pika ala na ya ti ada ti sambelango Nzapa. Ala yeke luti na le ti agovoronere na agbia ndali ti mbi titene ala tene tënë ti mbi na le ti ala. 10Alingbi a fa Nzoni Tënë na amara kue kozoni si. 11Tongana a gbu ala ti gue na ala na gbe ti ngbanga, ala gi be ti ala kozoni pepe, atene: ‘Tënë ti nyen laa e yeke tene ande nyen?’ Me na ndembe ni, ala tene gi tënë so Nzapa ayeke zia na yanga ti ala. Biani, tënë ni ayeke londo na ala pepe, me ayeke londo na Yingo-Vuru. 12Fade zo ayeke ka ita ti lo titene a fâ lo, babâ ayeke sara nga tongaso na molenge ti lo; amolenge ayeke ga awato ti ababâ na amama ti ala ti ka ala titene a fâ ala. 13Azo kue ayeke ke ala ndali ti mbi; me zo so ayeke gbu ngangu ngbii asi na ndani, fade lo yeke soo kuâ.” 14“Fade ala yeke baa ye so iri ni ‘Sioni-kpale-ti-bubango-ndo-kue’ so ayeke duti na ndo so sioni kpale ni alingbi fade ti duti daa pepe. (Mo so mo yeke diko mbeti so, mo gi nda ti ye so nzoni!) Tongaso, azo so ayeke na sese ti Judée, alingbi ala kpe ague na li ti ahoto; 15zo so ayeke duti na li ti da ti lo, alingbi lo zu na sese pepe ti gue ti mu mbeni ye na ya ti da ni; 16zo so ayeke na yaka, alingbi lo kiri na ndo ti lo pepe ti mu kota bongo ti lo. 17Ye ni ayeke duti ye ti mawa na awali so ayeke na ngo na ala so ayeke mu me na amolenge na ya ti alango ni so! 18Ala azo ti mbi, ala sambela si ye ni asi na ngoi ti de pepe, 19ngbanga ti so, na ya ti alango ni so, fade pasi ayeke hon ndoni. Ngbene ye na tongo nda ti dunia so Nzapa asara ngbii asi fadeso, zo ade ti baa mara ti pasi tongaso laoko pepe. Na pekoni, fade zo ayeke kiri ti baa mara ti pasi so oko pepe. 20Tongana Kota Gbia azi fade ambeni lango ni pepe, ka zo oko ti soo kuâ ayeke daa pepe. Me lo zi ambeni lango ni ndali ti azo so lo soro ala ti ga azo ti lo. 21Tongana mbeni zo atene na ala: ‘Baa, Mesii laa ge so!’ wala: ‘Baa, lo laa kâ so!’, ala yeda na lo pepe. 22Biani, fade amesii ti mvene na awayanga-Nzapa ti mvene ayeke ga si ala yeke sara aye ti kpene na aye ti dongo be ti handa na azo. Tongana lege ayeke daa, ataa azo so Nzapa asoro ala, ala yeke handa ala. 23Ti ala, ala sara hange! Mbi tene tënë ni na ala, ala ma awe!” 24“Me na ya ti alango ni so, na peko ti ngoi ti apasi so, fade le ti lâ ayeke vuko, nze ayeke kiri ti su pepe, 25atongoro ayeke londo na nduzu ti ti na sese si angangu so ayeke na le ti nduzu ayeke yingi. 26Tongaso azo ayeke baa Molenge ti Zo so ayeke ga na ya ti mbinda na ngangu ti lo kue, na gonda ti lo kue. 27Na ndani, lo yeke tokua a-ange na ndö ti sese kue, ti londo na mbeni nda ti sese ngbii asi na mbeni nda ni titene ala gue abongbi azo so Nzapa asoro ala.” 28“Ayeke nzoni ala manda ye na lege ti keke ti fige: gi so amaboko ti keke ni aga fini ni si akugbe ni ayeke sigigi daa, ala hinga atene, ngoi ti lungo ale ti kobe aga nduru awe. 29Legeoko nga, tongana ala baa aye so asi, ayeke nzoni ala hinga atene, lango ti gango ti Molenge ti Zo aga nduru awe; lo yeke na yanga ti da. 30Mbi tene na ala taa-tënë: fade azo ti fadeso ayeke kui kue pepe kozoni si aye so kue asi. 31Fade yayu na sese ayeke hon, me atënë ti mbi ayeke hon oko pepe.” 32“Ti lango ti singo ti aye ni wala ngbonga ni, zo oko ahinga pepe: ataa a-ange so ayeke na yayu, ataa Molenge ni; gi Babâ oko laa ahinga ni. 33Le ti ala akpengba! Ala lango pepe, ngbanga ti so ala hinga ngoi ni pepe. 34Ye ni ayeke duti ande tongana mbeni zo so ague na mbeni kodro nde. Lo zia da ti lo na maboko ti azo ti kua ti lo. Lo mu na zo oko oko kua ti sarango ni si lo mu yanga na wabatango-yanga ti da ni titene le ti lo akpengba, lo lango pepe. 35Ala lango pepe, ngbanga ti so ala hinga lango so wa ti da ni ayeke ga ande na ni pepe: wala na lakui, wala na be ti bi, wala na kozo toto ti kondo, wala na ndaperere, ala hinga pepe. 36Tongana lo si na ndembe kue, ayeke nzoni lo wara ala na lango pepe. 37Tënë so mbi tene na ala so, mbi tene na azo kue: Ala lango pepe!”

will be added

X\