MARC 12

1Na pekoni, Jésus ato nda ti tene tënë na ala na lege ti atoli, lo tene: “Mbeni zo afâ yaka ti vinye. Lo sara gbagba na tere ni kue, lo zi du titene a pete le ti vinye ni daa, lo leke mbeni ndo na nduzu titene zo aluti daa ti baa ndo na tere ti yaka ni. Na pekoni, lo zia yaka ni na maboko ti ambeni zo ti fango yaka ti vinye si lo gue na mbeni kodro nde. 2So ngoi ti fango ale ti vinye ni alingbi awe, lo tokua mbeni zo ti kua oko na azo ti fango yaka ni titene ala mu ti lo ale ti vinye ni aga na ni. 3Me azo ti fango yaka ni agbu zo ni, ala pika lo mingi si ala tumba lo, maboko ti lo senge. 4Wa ti yaka ni akiri atokua mbeni zo ti kua ti lo, ala pika lo na li ti lo si ala sara kua ti mbana na lo. 5Wa ti yaka ni akiri atokua mbeni zo ti kua ti lo, ala fâ lo. Na pekoni, ala sara gi tongaso na ambeni zo ti kua ni mingi: ala pika ambeni si ala fâ ambeni. 6Oko zo so angba na wa ti yaka ni ayeke gi molenge ti lo so lo ye lo mingi. Lo tokua lo na azo ti fango yaka ni si lo tene na be ti lo, lo tene: ‘Fade ala yeke kpe mbeto ti molenge ti mbi.’ 7Me azo ti fango yaka ni atene na popo ti ala: ‘Baa, lo so lo yeke ga wa ti yaka ni na peko ti babâ ti lo laa! Ala ga, e fâ lo si yaka ni aga ti e!’ 8Ala gbu lo, ala fâ lo si ala bi kuâ ti lo na tere ti yaka ni.” 9Jésus ahunda ala, atene: “Fade wa ti yaka ni ayeke sara nyen? Lo yeke ga ti fâ azo ti fango yaka ni si lo yeke mu yaka ni na ambeni zo nde. 10Tënë so a su na ya ti Mbeti ti Nzapa so, ala diko ni pepe? Tënë ni atene: ‘Têne so azo ti sarango da ake ni, ni laa akiri aga ngangu têne ti gere ti da ni. 11Ye so alondo na Kota Gbia, ye ni ayeke ye ti kpene na le ti e!’ ” 12Amakonzi ti azuife agi lege ti gbu Jésus, ngbanga ti so ala hinga atene, lo tene toli so na ndö ti ala; me ala sara mbeto ti gba ti azo. Tongaso ala zia lo si ala gue. 13Ala tokua ambeni farizien na ambeni zo ti kama poroso ti Herode na Jésus titene gi na lege ti tënë ti yanga ti lo wani, lo ti na ya ti gbanda ti ala. 14Ala ga si ala tene na lo: “Wafango-ye, e hinga so mo yeke tene gi taa-tënë; mo yeke sara kamene ti le ti zo pepe, ataa zo ni ayeke na kota ndo, me mo yeke fa taa-tënë na ndö ti lege ti sarango ye so Nzapa aye. Tene na e: Ndia amu lege na e ti futa lapo na kota gbia ti Rome wala ti futa ni pepe? E lingbi ti futa ni wala e futa ni pepe?” 15Me Jésus ahinga atene, tënë ti yanga ti afarizien ayeke nde na sarango ye ti ala. Tongaso lo tene na ala: “Ngbanga ti nyen ala ye ti sara si mbi ti na ya ti gbanda ti ala? Ala ga na mbi mbeni le ti nginza mbi baa.” 16Ala mu mbeni le ti nginza aga na ni si Jésus ahunda ala, atene: “So li ti zo wa laa? So iri ti zo wa laa na le ti nginza so?” Ala tene na lo: “Ti kota gbia ti Rome.” 17Tongaso Jésus atene na ala: “Ala futa na kota gbia ti Rome ye so ayeke ti lo, ala futa na Nzapa ye so ayeke ti Nzapa.” Li ti ala kue akpe na peko ti kiringo tënë ti lo so. 18Ambeni sadusien aga na tere ti Jésus. – Asadusien ayeke azo so atene, akuâ ayeke zingo pepe. – Ala hunda lo, atene: 19“Wafango-ye, Moïse asu ando ndia so na mbeti ndali ti e, lo tene: ‘Tongana mbeni zo akui si lo zia wali na peko ti lo so adu amolenge pepe, alingbi ita ti lo amu wali ti wakuâ ni si lo du amolenge na ita ti lo so akui so.’ 20Ando, ambeni ita mbarambara ayeke daa. Kozo ita ni amu wali, lo du molenge pepe si lo kui. 21Use ita ni amu wali ni, lo du nga molenge pepe si lo kui. Ita ti ota ni akui nga tongaso. 22Ala mbarambara kue akui, ala du molenge oko pepe. Na peko ti ala kue, wali ni nga akui. 23Na lango ti zingongo ti akuâ, tongana akoli ni azingo ande na kuâ, fade wali ni ayeke duti wali ti zo wa na popo ti ala so? So ala mbarambara kue amu lo ti ga wali ti ala so!” 24Jésus atene na ala: “Ala girisa lege awe! Ala hinga nda ni? Ayeke ngbanga ti so ala hinga nda ti Mbeti ti Nzapa wala ngangu ti Nzapa pepe. 25Biani, na ngoi so azo ayeke zingo ande na kuâ, fade akoli na awali ayeke mu tere pepe, me azo ayeke duti tongana a-ange na yayu. 26Âdu ti tënë ti zingongo ti akuâ, ala asadusien, ala diko tënë ni na ya ti buku so Moïse asu so pepe? So lani lo ma go ti Nzapa na ya ti kete keke ti ki, atene: ‘Mbi yeke Nzapa ti Abraham, Nzapa ti Isaac na Nzapa ti Jacob!’ 27Nzapa ayeke Nzapa ti akuâ pepe, me lo yeke Nzapa ti azo so ayeke na fini. Tongaso ala girisa lege biani awe.” 28Mbeni wafango-ndia ama ala na bingbingo tënë so. Lo baa so Jésus akiri tënë nzoni na asadusien. Lo ga nduru si lo hunda Jésus, lo tene: “Ndia so ayeke kota ahon atanga ni kue ayeke so wa?” 29Jésus akiri tënë na lo: “Ndia so ayeke kota ayeke so: ‘Ala azo ti Israel, ala ma! Kota Gbia Nzapa ti e, ayeke gi lo oko Kota Gbia. 30Alingbi mo ye Kota Gbia Nzapa ti mo na be ti mo kue, na yingo ti mo kue, na tënë ti be ti mo kue na ngangu ti mo kue.’ 31Ndia ti use ni ayeke so: ‘Mo ye mba ti mo zo tongana ti so mo ye tere ti mo wani.’ Ambeni ndia so ayeke kota ahon ala use so ayeke daa pepe.” 32Wafango-ndia so atene na Jésus: “Wafango-ye, so ayeke nzoni mingi! Tënë so mo tene so ayeke taa-tënë: Nzapa ayeke gi oko, mbeni Nzapa nde ayeke daa pepe. 33Ayeke nzoni zo aye Nzapa na be ti lo kue, na ndara ti lo kue nga na ngangu ti lo kue. Ayeke nzoni lo ye nga mba ti lo zo tongana ti so lo ye tere ti lo wani. So laa ayeke nzoni ahon asandaga ti anyama so a yeke gbi ni kue na wâ, wala asandaga nde nde so azo ayeke mu na Nzapa.” 34So Jésus abaa, lo kiri na tënë ni na lege ti ndara, lo tene na lo: “Mo yeke yongoro na Kodro-gbia ti Nzapa pepe.” Na pekoni, mbeni zo oko akiri azi yanga ti hunda lo na tënë pepe. 35So Jésus ayeke fa ye na ya ti kota da ti Nzapa, lo hunda mbeni tënë, lo tene: “Tongana nyen si awafango-ndia alingbi ti tene, Mesii ayeke molenge ti David so? 36So Yingo-Vuru amu na David tënë ti tenengo ni si lo tene: ‘Kota Gbia Nzapa atene na Kota Gbia ti mbi, atene: Mo duti na mbage ti maboko ti mbi ti koli ngbii mbi sara titene awato ti mo aduti na gbe ti gere ti mo si.’ 37So David wani ayeke iri lo ‘Kota Gbia’ so, Mesii ni akiri ti duti molenge ti David tongana nyen?” Gba ti azo ayeke ma Jésus na ngia na be ti ala. 38Na ya ti fango ye so Jésus ayeke fa, lo tene: “Ala sara hange na awafango-ndia so aye ti fono gi na ya ti akota bongo si ala ye titene azo abara ala na ndo so azo abongbi daa. 39Ala ye ti duti na ya ti akozo ngende so ayeke na ya ti ada ti sambelango Nzapa; ala ye nga ti duti na akozo ndo na ya ti amatanga. 40Ala yeke ro aye kue ti ya ti da ti awali-mua si ala yeke sara ayongoro sambela titene azo abaa ala. Fade Nzapa ayeke fâ ngbanga na li ti ala ngangu ahon ti azo kue.” 41Na pekoni, Jésus aduti na ya ti kota da ti Nzapa na tere ti sanduku ti nginza si lo yeke baa lege so gba ti azo ayeke bi nginza na ya ni. Azo ti mosoro mingi atuku gba ti nginza daa. 42Mbeni wali-mua so ayeke wayere aga na akete kete le ti nginza use si abi na ya ni. 43Tongaso Jésus airi adisiple ti lo si lo tene na ala: “Mbi tene na ala taa-tënë: wali-mua so ayeke wayere so abi nginza na ya ti sanduku ni ahon tanga ti azo kue. 44Biani, tanga ti azo ni abi ti ala nginza so ala yeke na ye ti sarango na ni pepe; me ti lo, na ya ti yere ti lo, lo bi nginza so kue angba na lo ti te na kobe.”

will be added

X\