LUC 5

1Mbeni lâ, Jésus aluti na yanga ti kota ngu ti Genezaret, gba ti azo aga na tere ti lo si ala yeke gbugburu tere ti ma tënë ti Nzapa. 2Lo baa ango use na yanga ti ngu; azo ti gingo susu asigigi na ya ni awe si ala yeke sukula agbanda ti ala. 3Jésus ako na ya ti mbeni ngo ni oko so ayeke ti Simon. Lo hunda na lo ti gue na ngo ni yongoro kete na le ti ngu. Na pekoni, Jésus aduti na ya ti ngo ni si lo yeke fa ye na gba ti azo ni. 4So lo hunzi tënë ti lo awe, lo tene na Simon: “Mo gue na ngo ni na ndo so ngu ali mingi si ala bi gbanda daa ti gi asusu.” 5Simon akiri tënë na lo: “Kota zo, na bi so kue, e pika li ti e gbaa, e wara susu oko pepe. Me ndali ti tënë ti yanga ti mo, fade mbi yeke bi gbanda ni.” 6So ala bi gbanda ni, ala gbu asusu gbani gbani; gbanda ti ala aye ti suru. 7Ala sara maboko na amba ti ala so ayeke na ya ti mbeni ngo ni ti ga ti mu maboko na ala. Amba ti ala aga si ala tuku asusu ni na ya ti ango use kue; ango ni asi singo na asusu si aye ti linda ngu. 8So Simon Pierre abaa tongaso, lo ti na gbe ti Jésus si lo tene na lo: “Kota Gbia, hon yongoro na tere ti mbi, ngbanga ti so mbi yeke zo ti siokpari!” 9Mbeto agbu Simon na azo so kue ayeke na tere ti lo, ngbanga ti so ala gbu asusu gbani gbani. 10Mbeto agbu nga Jacques na Jean, amolenge ti Zebede so ala yeke amba ti Simon. Jésus atene na Simon: “Sara mbeto pepe! Ti londo fadeso, mo yeke ga zo ti gingo azo.” 11So ala kiri na ango ni na yanga ti ngu awe, ala zia aye ti ala kue si ala mu peko ti Jésus. 12So Jésus ayeke na ya ti mbeni gbata ni, mbeni koli so buruma amu tere ti lo kue asi. So lo baa Jésus, lo ti, lo kpo li ti lo na sese si lo voro lo, lo tene: “Kota Gbia, tongana mo ye, mo lingbi ti sara si tere ti mbi aga nzoni.” 13Jésus ayoro maboko ti lo, lo ndu koli ni si lo tene: “Mbi yeda! Ayeke nzoni tere ti mo aga nzoni.” Gi na pekoni, buruma ni alondo na tere ti lo. 14Jésus amu yanga na lo, atene: “Mo tene tënë ni na mbeni zo oko pepe! Me mo gue mo fa tere ti mo na wayango-sandaga titene lo baa mo; na pekoni, mo mu sandaga so Moïse amu yanga ando ti mungo ni so. Tongaso si mo fa na le ti azo kue so tere ti mo aga nzoni awe.” 15Sango ti Jésus angba ti mu yanga ti azo ti gue na ni. Gba ti azo aga ti ma tënë ti lo nga titene lo kai kobela ti ala. 16Me Jésus agboto tere ti lo, lo gue na mbeni ndo so zo ayeke daa pepe si lo sambela. 17Mbeni lâ, Jésus ayeke fa ye na azo. Afarizien na awafango-ndia ayeke na popo ti azo ni; ala londo na ya ti akodro ti Galile na ti Judée nga na Jérusalem si ala ga. Ngangu ti Kota Gbia ayeke na Jésus si lo yeke kai akobela na tere ti azo. 18Ambeni zo ayo mbeni koli so mbage ti tere ti lo abuba na ndö ti kelekpa si aga na lo. Ala yeke gi lege ti li na lo na ya ti da ni, ti zia lo na dawa ti Jésus. 19Me ala gi lege ti li na lo gbaa, ngbanga ti so azo ayeke gbani gbani. Ala gue na lo na li ti da ni, ala zi mbage ti li ni si ala yoro lo na kelekpa ti lo kue na popo ti azo ni, ala zia lo na dawa ti Jésus. 20So Jésus abaa mabe ti ala, lo tene na koli ni: “A zi asiokpari ti mo awe.” 21Awafango-ndia na afarizien ato nda ti tene na be ti ala, atene: “Lo yeke zo wa si lo yeke zonga Nzapa so? Zo wa laa alingbi ti zi asiokpari ti azo? Gi Nzapa oko!” 22Me Jésus ahinga tënë ti be ti ala kue si lo tene na ala: “Ngbanga ti nyen laa ala yeke tene mara ti tënë tongaso na be ti ala? 23Titene zo atene: ‘A zi asiokpari ti mo awe’, wala titene zo atene: ‘Londo, mo tambula!’, so wa laa ayeke ngangu pepe? 24Me ti sara si ala hinga atene, Molenge ti Zo ayeke na ngangu ti zi asiokpari ti azo na sese so, Jésus atene na zo so mbage ti tere ti lo abuba so, atene: ‘Mbi tene na mo: londo, mo mu kelekpa ti mo, mo gue na da ti mo!’ ” 25Gi hio tongaso, koli ni alondo na le ti azo kue, lo mu kelekpa ti lo, lo gue na da ti lo si lo yeke gonda Nzapa. 26Li ti azo ni kue akpe; ala yeke gonda Nzapa, mbeto agbu ala si ala tene: “Laso, e baa akota ye ti kpene!” 27Na pekoni, Jésus asigigi si lo baa mbeni zo ti rongo nginza ti lapo so iri ti lo ayeke Lévi; lo yeke duti na ndo so azo ayeke futa lapo ti ala daa. Jésus atene na lo, atene: “Mu peko ti mbi!” 28Lévi alondo, lo zia aye kue si lo mu peko ti Jésus. 29Na pekoni, Lévi asara kota matanga na da ti lo ndali ti Jésus. Azo ti rongo nginza ti lapo na ambeni zo mingi ayeke te kobe na ala. 30Afarizien na awafango-ndia ti ala ayeke kasa tënë ni si ala tene na adisiple ti Jésus, atene: “Ngbanga ti nyen laa ala yeke te, ala yeke nyon na azo ti rongo nginza ti lapo nga na azo ti siokpari so?” 31Jésus akiri tënë na ala: “Azo so ayeke na nzoni tere laa ayeke na nzara ti gue na wanganga pepe, me azo ti kobela. 32Mbi ga ti iri azo ti mbirimbiri pepe, me mbi ga ti iri azo ti siokpari titene ala zia ngbene lege ti sarango ye ti ala.” 33Afarizien atene na Jésus: “Adisiple ti Jean na adisiple ti e ayeke ke kobe lege mingi si ala yeke sambela, me adisiple ti mo ayeke te ye si ayeke nyon ye.” 34Jésus atene na ala: “Azo so a tisa ala na matanga ti mungo tere ti koli na wali, fade ala yeke hunda na azo ni ti ke kobe na ndembe so koli ni ade na popo ti ala? Oko pepe! 35Me ambeni lango ayeke ga so fade a yeke mu koli ni na popo ti ala, a hon na lo; na ngoi so laa, fade ala yeke ke kobe.” 36Jésus atene nga na ala mbeni toli na ala, atene: “Zo alingbi ti suru yanga ti fini bongo ti fu na le ti ka ti ngbene bongo pepe. Tongaso pepe, fade fini bongo ni ayeke suru si nduru yanga ti fini bongo ni alingbi na ngbene bongo ni pepe. 37Zo alingbi nga ti tuku fini vin na ya ti ngbene bozo ti poro pepe. Tongaso pepe, fade fini vin ni ayeke sara si bozo ni asungba, vin ni atuku na sese si bozo ni abuba. 38Me alingbi atuku fini vin na ya ti fini bozo. 39Zo so anyon ngbene vin awe, lo ye ti nyon fini vin pepe, ngbanga ti so lo baa lo tene, ngbene ni laa anzere.”

will be added

X\