LUC 23

1Azo ni kue alondo si ala gue na Jésus na gbe ti Pilate. 2Ala to nda ti bi tënë na li ti lo, atene: “E wara koli so, lo yeke pusu azo ti mara ti e ti sara wusuwusu, lo yeke kanga lege na ala titene ala futa lapo na kota gbia ti Rome; lo tene nga, ni wani ni yeke Mesii, ni yeke gbia.” 3Pilate ahunda lo, atene: “Mo yeke gbia ti azuife?” Jésus akiri tënë na lo, atene: “Gi tënë ni laa mo tene awe so.” 4Pilate atene na akota wayango-sandaga na gba ti azo ni, atene: “Mbi wara ti mbi mbeni tënë oko pepe ti fâ ngbanga na li ti koli so ndali ni.” 5Me ala luti na ndö ti tënë ti ala, atene: “Lo yeke pusu azo ti kodro ti sara wusuwusu na lege ti fango ye ti lo so lo yeke fa na azo ti sese ti Judée kue. Lo londo na Galile si lo yeke fa ye na azo ngbii asi na ndo so.” 6So Pilate ama tënë so, lo hunda ndo, lo tene: “Koli so ayeke zo ti Galile?” 7So lo ma atene, lo yeke zo ti sese so Herode ayeke sara komandema na ndö ni, lo tokua lo na Herode so ayeke nga na ndembe ni so na Jérusalem. 8So Herode abaa Jésus, be ti lo anzere mingi, ngbanga ti so lango mingi, lo yeke na nzara ti baa lo. Lo ye ti baa Jésus ngbanga ti atënë so azo ayeke tene na ndö ti lo; lo yeke ku fade ti baa Jésus na sarango mbeni ye ti kpene. 9Lo hunda Jésus na atënë mingi mingi, me Jésus akiri tënë oko pepe. 10Akota wayango-sandaga na awafango-ndia ayeke daa, ala yeke tene tënë na ngangu ti bi atënë na li ti lo. 11Herode na aturugu ti lo ahe Jésus na ngia si ala sara tongana buba zo. Ala yu na lo mbeni bongo so aza zango si ala kiri atokua lo na Pilate. 12Na lango ni so, songo aga na popo ti Herode na Pilate; kozoni ala ye tere pepe. 13Pilate airi akota wayango-sandaga, amakonzi na azo ti kodro 14si lo tene na ala: “Ala ga na mbi koli so, ngbanga ti so ala tene, lo yeke pusu azo ti kodro ti sara wusuwusu. Ala baa, mbi hunda lo na le ti ala kue na ndö ti asioni tënë so ala bi na li ti lo, me mbi baa ti mbi sioni ye oko so alingbi ti fâ ngbanga na li ti lo ndali ni pepe. 15Herode nga awara tënë na li ti lo pepe, ndani laa lo kiri lo tokua lo na e so. Tongaso, koli so asara mbeni ye so alingbi ti fâ lo ndali ni pepe. 16Fade mbi yeke mu yanga titene a pika gi lo pikango si mbi zi lo.” [ 17Lakue na matanga ti Pake, Pilate ayeke zi mbeni zo ti kanga oko na azo ti kodro ni.] 18Me azo ni kue adekongo, atene: “Fâ koli so! Mo zi na e Barabas!” 19– A kanga Barabas ndali ti mbeni wusuwusu so alondo na ya ti gbata ni nga ndali ti fango zo. – 20Pilate akiri ahunda azo ni, ngbanga ti so lo ye ti zi Jésus. 21Me azo ni adekongo, atene: “Fâ lo na ndö ti keke ti kroa! Fâ lo na ndö ti keke ti kroa!” 22Ti fani ota ni, lo hunda ala, lo tene: “Me sioni ye ti nyen laa koli so asara? Mbi wara mbeni tënë na li ti lo so alingbi ti fâ lo ndali ni pepe. Fade mbi yeke mu yanga titene a pika gi lo pikango si mbi zi lo.” 23Me ala ngba gi na ndö ti tënë ni si ala yeke dekongo titene lo fâ gi Jésus fango na ndö ti keke ti kroa; dekongo ti ala ni ahon ndö ti lo. 24Nilaa Pilate amu yanga titene a sara ye so ala hunda. 25Lo zi koli so ayeke na da ti kanga ndali ti wusuwusu na fango zo, lo so azo ni ahunda titene a zi lo so. Ti Jésus, Pilate amu lo na ala titene ala sara ye ti be ti ala na lo. 26So ala mu Jésus si ala yeke gue na lo, ala tengbi na mbeni koli so azo ahinga lo na iri ti Simon, zo ti kodro ti Sirene; lo londo na yaka si lo yeke kiri na kodro. Ala gbu lo si ala zia keke ti kroa ni na ndö ti go ti lo titene lo yo ni, lo gue na ni na peko ti Jésus. 27Azo gbani gbani ayeke mu peko ti Jésus; ambeni wali nga ayeke na popo ti azo ni. Ala zia maboko na ndö ti go ti ala si ala yeke toto ndali ti lo. 28Jésus abaa ndo na mbage ti ala si lo tene na ala: “Awali ti Jérusalem, ala toto ndali ti mbi pepe! Me ala toto ndali ti ala wani na amolenge ti ala, 29ngbanga ti so alango ayeke si ande so fade azo ayeke tene: ‘Ti ala nzoni, ala awali so ayeke awali ti dungo ni pepe, na ala so adu ya ti ala pepe, na ala so molenge anyon me ti ala laoko pepe!’ 30Tongaso na ya ti alango ni so, fade azo ayeke tene na akota hoto: ‘Ala ti na ndö ti e!’ Ala yeke tene nga na akete hoto: ‘Ala honde e!’ 31Tongana azo asara tongaso na fini keke, fade ti holengo keke ayeke duti tongana nyen?” 32Azo amu nga ambeni koli use so ayeke asioni zo, ague na ala ti fâ ala legeoko na Jésus. 33So ala si na ndo so a iri ni “Ndo-ti-abio-ti-li”, ala kanga Jésus na ndö ti mbeni keke ti kroa si ala kanga nga asioni zo use so na ndö ti ambeni keke ti kroa, mbeni na mbage ti maboko ti lo ti koli, mbeni na mbage ti maboko ti lo ti wali. 34Jésus atene: “Babâ, zi tënë na li ti ala, ngbanga ti so ala hinga ye so ala yeke sara pepe.” Ala bi dee titene ala kangbi ya ti bongo ti lo na popo ti ala. 35Azo ni aluti kâ si ala yeke baa ndo. Amakonzi ti azuife ayeke he lo, atene: “Lo soo ambeni zo na kuâ. Tongana lo yeke Mesii so Nzapa asoro lo biani, ayeke nzoni lo soo tere ti lo wani na kuâ fadeso!” 36Aturugu nga ayeke he lo; ala ga nduru, ala mu na lo kpingo vin si ala tene: 37“Tongana mo yeke gbia ti azuife, soo tere ti mo wani na kuâ e baa!” 38Na li ti keke ti kroa ni ala su mbeni mbeti atene: “So gbia ti azuife laa!” 39Mbeni oko ti asioni zo so a kanga ala na ndö ti keke ti kroa azonga Jésus, atene: “Mo yeke Mesii pepe? Mo soo tere ti mo wani na kuâ si mo soo nga e ma!” 40Me mba ti lo ni asuku na lo, atene: “Mo kpe mbeto ti Nzapa pepe? Mo nga, mo yeke baa gi mara ti pasi so lo yeke baa so! 41Ti e, ye ni ayeke na legeni, ngbanga ti so e yeke wara gi aye ti peko ti ye so e sara; me ti lo, lo sara mbeni ye ti sioni oko pepe.” 42Na pekoni, lo tene: “Jésus, tongana mo kiri ande ti le-gbia, dabe ti mo na mbi!” 43Jésus atene na lo: “Mbi tene na mo taa-tënë: gi laso, laso, mo yeke duti legeoko na mbi na paradi.” 44So bekombite aga nduru awe, ndo avuko na ya ti kodro ni kue, ngbii asi na ngbonga ota. 45Le ti lâ avuko vukongo; ridoo so a kanga na ya ti kota da ti Nzapa, ya ni asuru use, taa na be ni. 46Jésus adekongo ngangu, atene: “Babâ, mbi zia yingo ti mbi na maboko ti mo.” Na peko ti tënë so, Jésus akui. 47So kapita ti aturugu ti Rome abaa ye ni tongaso, lo gonda Nzapa si lo tene: “Taa-tënë, koli so ayeke zo ti mbirimbiri!” 48Gba ti azo so aga fade ti baa ye so kue asi so, so ala baa ye ni awe, ala zia maboko ti ala na ndö ti go ti ala si ala yeke kiri na da. 49Azo so kue aye Jésus, ala na awali so alondo na Galile si aga na peko ti lo, ala luti ti ala yongoro si ala yeke baa ye ni. 50Mbeni koli ayeke daa so iri ti lo Joseph, lo yeke mbeni zo ti kota ndo ti fango ngbanga, lo yeke nzoni zo si lo yeke nga zo ti mbirimbiri. 51Ye so amba ti lo aleke na be ti ala ti sarango ni so, lo yeda na ni pepe; lo ke tënë ti ye so ala sara so. Lo yeke zo ti Arimate, mbeni gbata ti azuife si lo yeke ku ngoi so Nzapa ayeke ga ti le-gbia na ndö ti azo. 52Lo gue lo baa Pilate si lo hunda lo ti mu kuâ ti Jésus. 53Lo zi kuâ ni na ndö ti keke ti kroa, lo kanga na vuru bongo si lo lu ni na ya ti mbeni du so a zi na ya ti têne so ade a lu zo daa pepe. 54Lango ni so ayeke lango ti lekengo aye ndali ti lango ti matanga; lango ti wungo tere aga nduru awe. 55Awali so amu peko ti Jésus, ngbene ye na Galile so aga na peko ti Joseph; ala baa du ti kuâ ni si ala baa nga lege so azo azia kuâ ti Jésus na ya ni. 56Na pekoni, ala kiri na ya ti gbata ni si ala leke ayombo na aye so azo ayeke zia na tere ti kuâ. Na lango ti wungo tere, ala duti ti wu tere ti ala tongana ti so atënë ti ndia afa.

will be added

X\