LUC 16

1Na pekoni, Jésus atene na adisiple ti lo: “Mbeni zo ti mosoro ayeke na ndombe so lo zia lo na ndö ti aye ti lo. Azo aga atene na lo atene, ndombe ti lo ni ayeke buba aye ti lo. 2Lo iri ndombe ni si lo tene na lo: ‘Tënë ti nyen laa mbi yeke ma na tere ti mo tongaso so? Fa na mbi peko ti aye so mo sara na aye ti mbi, ngbanga ti so mo yeke ngba ti bata aye ti mbi pepe.’ 3Ndombe ni atene na be ti lo: ‘So kota zo ti mbi aye ti zi mbi na kua so, fade mbi yeke sara tongana nyen? Mbi yeke na ngangu ti fango yaka pepe; kamene ti sarango gobo agbu mbi mingi. 4Fadeso, mbi hinga ye so mbi yeke sara titene tongana a zi mbi na kua, azo ayamba mbi na da ti ala.’ 5Lo iri oko na oko azo so yongo ti kota zo ti lo so ayeke na li ti ala. Lo hunda kozo zo ni, lo tene: ‘Yongo ti kota zo ti mbi ayeke na li ti mo oke?’ 6Zo ni atene: ‘Kota ta ti mafuta ngbangbo oko.’ Ndombe ni atene na lo: ‘Baa, mbeti ti yongo ti mo laa. Mo duti hio, mo su na le ni baleoku.’ 7Na pekoni, lo hunda mbeni, atene: ‘Mo, ti mo yongo ni ayeke oke?’ Lo tene: ‘Sake ti ale ti kobe ngbangbo oko.’ Ndombe ni atene na lo: ‘Baa, mbeti ti yongo ti mo laa, su na le ni balemiombe.’ 8Kota zo ni agonda ndombe ti nzi so, ngbanga ti so lo sara ye ti lo na kode. Taa-tënë, azo ti dunia so ayeke sara ye na kode na amba ti ala, ahon azo ti Nzapa so ayeke na ya ti lumiere.” 9Jésus akiri atene: “Ti mbi, mbi tene na ala: nginza ayeke handa azo titene ala sara aye ti kirikiri. Ti ala, ayeke nzoni ala mu nginza ti gi ti wara na a-ita; tongana nginza ni ayeke mbeni pepe, fade a-ita ni ayeke yamba ala na ya ti ada so ayeke ngba kpu na kpu. 10Zo so ayeke sara ye na legeni na akete ye, fade lo yeke sara ye na legeni na akota ye. Me zo so ayeke sara ye kirikiri na akete ye, fade lo yeke sara nga ye kirikiri na akota ye. 11Tongana ala hinga ti sara ye na legeni pepe na nginza so ala wara na lege ti ye ti kirikiri, zo wa laa ayeke mu na ala taa ye ti nzoni titene ala bata ni? 12Tongana ala hinga ti bata ye ti mbeni zo na legeni pepe, zo wa laa ayeke mu na ala taa ye ti ala wani titene ala bata ni? 13“Zo ti kua alingbi ti sara kua na amakonzi use pepe, ngbanga ti so fade lo yeke ke mbeni oko si lo yeke ye mbeni; lo yeke ma yanga ti mbeni oko si lo yeke baa mbeni na le ti lo tongana senge zo. Ala lingbi ti sara kua na Nzapa nga na nginza legeoko pepe.” 14Afarizien so aye nginza mingi so, ama tënë so kue si ala yeke he Jésus na ngia. 15Lo tene na ala: “Ala yeke fa na le ti azo atene, ala yeke azo ti mbirimbiri, me Nzapa ahinga be ti ala kue. Ye so ayeke kota ye na le ti azo, ayeke sioni mingi na le ti Nzapa. 16“Ndia ti Moïse na ambeti ti awayanga-Nzapa afa lege na azo ngbii asi na ngoi ti Jean-Baptiste. Ti londo na ngoi ti Jean-Baptiste, azo ayeke fa Nzoni Tënë ti Kodro-gbia ti Nzapa si zo oko oko ayeke sara ngangu ti li na ya ti Kodro ni. 17Yayu na sese alingbi ti hon, me titene mbeni kete gere ti tënë ti Ndia oko ati, ayeke ye ti ngangu mingi. 18“Koli so atumba wali ti lo si lo mu mbeni nde, andaa lo gi wali ti mbeni zo awe; koli so amu wali so koli ti lo atumba lo, andaa lo nga, lo gi wali ti mbeni zo awe.” 19“Ando, mbeni zo ti mosoro ayeke daa so lo yeke yu gi apendere bongo ti nginza. Lo yeke duti nzoni si lakue na da ti lo, gi matanga na matanga. 20Mbeni zo ti mawa so iri ti lo Lazare ayeke lango na sese na yanga ti da ti zo ti mosoro so. Tere ti lo kue gi ka. 21Lo yeke na nzara ti te akobe so alondo na ndö ti meza ti zo ti mosoro ni si ayeke tuku na sese. Na ndö ni kue, ambo aga si ayeke su le ti aka ti lo. 22Mbeni lâ, zo ti mawa so akui si a-ange ayo lo, ague na lo na tere ti Abraham. Zo ti mosoro ni akui nga si a lu lo. 23Na ndo ti akuâ, zo ti mosoro ni ayeke baa pasi mingi. Lo yo le ti lo na nduzu si lo baa Abraham yongoro kâ; Lazare ayeke na tere ti lo. 24Lo dekongo, lo tene: ‘Babâ Abraham, baa mawa ti mbi! Tokua Lazare, lo yoro li ti maboko ti lo na ya ti ngu si lo zia na menga ti mbi, ngbanga ti so mbi yeke baa pasi mingi na le ti wâ.’ 25Abraham atene na lo: ‘Molenge ti mbi, ayeke nzoni mo dabe ti mo so ando na ndö ti sese, mo baa nzoni si Lazare abaa ti lo sioni. Fadeso be ti lo ade awe, me ti mo, mo yeke baa pasi. 26Na ndö ni kue, mbeni kota du so alinda mingi ayeke na popo ti e na ala. Tongaso, azo so aye ti londo ge ti gue na mbage ti ala kâ, ala lingbi ti gue pepe; zo so ayeke na mbage ti ala kâ alingbi nga ti ga na mbage ti e ge pepe.’ 27Zo ti mosoro ni atene: ‘Tongaso babâ, mbi hunda na mo ti tokua Lazare na ya ti da ti babâ ti mbi, 28ngbanga ti so a-ita ti mbi oku ayeke kâ. Ayeke nzoni lo tene tënë na ala si ala nga aga na ya ti pasi so ge pepe.’ 29Abraham atene na lo: ‘Ndia ti Moïse na ambeti ti awayanga-Nzapa ayeke na popo ti ala: ayeke nzoni ala ma ni.’ 30Zo ti mosoro ni atene: ‘Ên-en, babâ Abraham! Tongana mbeni zo alondo na popo ti akuâ ague na mbage ti ala, fade ala yeke zia ngbene lege ti sarango ye ti ala.’ 31Abraham atene: ‘So ala ma Moïse na awayanga-Nzapa pepe so, tongana mbeni zo azingo na kuâ si ague atene tënë na ala, ala lingbi ti yeda nga pepe.’ ”

will be added

X\