LUC 1

1Azo mingi agi lege ti su na mbeti tënë ti aye so asi na popo ti e; 2ala su ni na mbeti ti fa peko ti tënë ti azo so abaa ye ni na le ti ala, ngbene ye na tongo nda ni si ala ga azo ti fango tënë ti Nzapa. 3Nilaa, kota zo Théophile, mbi nga, mbi baa mbi tene, ayeke nzoni mbi hunda nda ti aye so kue nzoni si mbi su ni na mbeti na mo na lege ti molongo ni. 4Tongaso si mo hinga mo tene, aye so a fa na mo so ayeke taa-tënë. 5Na ngoi so ando Herode ayeke gbia ti Judée, mbeni wayango-sandaga ayeke daa, iri ti lo Zakarii. Lo yeke mbeni zo ti ya ti bongbi ti awayango-sandaga ti sewa ti Abia; iri ti wali ti lo ayeke Élisabeth; lo nga lo yeke mbeni hale ti Aaron. 6Ala use kue ayeke ambirimbiri zo na le ti Nzapa; ala yeke sara ye gi na lege ti andia nga na lege ti ambela kue ti Kota Gbia. 7Me ala yeke na molenge pepe, ngbanga ti so Élisabeth ayeke wali ti dungo ni pepe; ala use kue aga mbakoro awe. 8Ngoi ti Zakarii ti sara kua ti yango sandaga na le ti Nzapa alingbi; so ayeke ngoi titene lo na azo ti bongbi ti lo asara kua. 9Ala soro lo alingbi na ti so awayango-sandaga ayeke sara ni lakue titene lo laa lo li na ya ti da ti Kota Gbia ti zö dukani. 10Na ndembe so a yeke zö ka dukani, azo kue ayeke ngba na gigi si a yeke sambela. 11Mbeni ange ti Kota Gbia asi na Zakarii; lo luti na tere ti gbalaka na mbage ti maboko ti koli, gbalaka so a yeke zö ka dukani na ndö ni. 12So Zakarii abaa lo tongaso, be ti lo agi lo si mbeto agbu lo. 13Me ange ni atene na lo: “Zakarii, sara mbeto pepe, ngbanga ti so Nzapa ama sambela ti mo awe: fade Élisabeth, wali ti mo ayeke du na mo molenge-koli si mo yeke di iri ti lo Jean. 14Molenge ni ayeke zia ngia mingi na be ti mo, tere ti mo ayeke nzere si be ti azo mingi ayeke nzere ndali ti dungo lo. 15Biani, fade lo yeke ga kota na le ti Kota Gbia; lo yeke nyon vin wala samba pepe; Yingo-Vuru ayeke si lo gi na ya ti mama ti lo. 16Lo yeke mu azo ti Israel mingi ti kiri na ala na Kota Gbia, Nzapa ti ala. 17Lo yeke tambula na dawa ti Nzapa, yingo ti wayanga-Nzapa Élie, na ngangu ti lo, ayeke duti na ndö ti lo si lo yeke leke songo na popo ti ababâ na amolenge ti ala. Lo yeke kiri ti leke be ti azo ti ngangu li si tënë ti be ti ala aga tongana ti azo ti mbirimbiri. Lo yeke sara tongaso ti leke azo so aleke tere ti ala ti ku Kota Gbia.” 18Zakarii atene na ange ni: “Fade mbi yeke hinga ye ni tongana nyen? Mbi ga mbakoro awe si ngu ti wali ti mbi ahon mingi.” 19Ange ni akiri tënë na lo: “Mbi yeke Gabriel, mbi yeke luti na le ti Nzapa ti sara na lo. Lo tokua mbi ti tene tënë na mo, ti tene nzoni tënë so na mo. 20Me mo yeda na tënë ti mbi pepe; tënë ti mbi so ayeke ga ande taa-tënë tongana ndembe ni alingbi. Tongaso, fade mo yeke ga buburu, mo yeke tene tënë pepe, ngbii asi na ndembe so aye ni kue ayeke si.” 21Andaa, azo angba ti ku Zakarii; be ti ala kue ayeke gi na nduzu, ngbanga ti so lo ninga mingi na ya ti da ti Nzapa. 22So Zakarii asigigi, lo lingbi ti tene tënë na ala pepe; ala hinga atene kâ, na ya ti kota da ti Nzapa, lo baa ye na ya ti mbeni ye tongana bango-li. Lo yeke tene tënë na ala gi na maboko, ngbanga ti so lo ga buburu awe. 23So ngoi ti sarango kua ti Zakarii ahunzi awe, lo kiri na ndo ti lo. 24Na pekoni, wali ti lo Élisabeth amu ngo si lo honde tere ti lo na ya ti nze oku; lo tene na be ti lo, lo tene: 25“Baa ye so Kota Gbia asara na mbi laa; lo sara nzoni be na mbi na ndembe so lo bi le ti lo na ndö ti mbi, ti zi kamene na le ti mbi na popo ti azo.” 26Na nze omene ti ngo ti Élisabeth, Nzapa atokua ange Gabriel na ya ti mbeni gbata ti Galile so iri ni Nazaret, 27na ndo ti mbeni maseka-wali so ade ti mu koli pepe, iri ti lo Marie. Mbeni koli so iri ti lo Joseph aye ti mu lo na wali; lo yeke hale ti gbia David. 28Ange ni asi na ndo so lo yeke daa si atene na lo: “Mbi bara mo-oo! Nzapa asara nzoni be na mo. Kota Gbia ayeke na mo.” 29So Marie ama tënë so, be ti lo ado; lo gbu li ti lo na ndö ti barango ndo ni so. 30Ange ni atene na lo: “Marie, sara mbeto pepe, ngbanga ti so Nzapa asara nzoni be na mo. 31Fade mo yeke mu ngo si mo yeke du molenge-koli so mo yeke di iri ti lo Jésus. 32Lo yeke ga kota si a yeke iri lo Molenge ti Nzapa so ayeke na yayu kâ na ndö ti aye kue. Kota Gbia Nzapa ayeke mu na lo mbata ti gbia ti kotara ti lo David. 33Fade lo yeke le-gbia na ndö ti azo ti Israel kpu na kpu si lengo-gbia ti lo ayeke hunzi pepe.” 34Marie atene na ange ni: “Ye ni ayeke sara ande tongana nyen so mbi de ti hinga koli pepe so?” 35Ange ni akiri tënë na lo, atene: “Fade Yingo-Vuru ayeke ga na ndö ti mo si ngangu ti Nzapa, lo so lo yeke na yayu kâ na ndö ti aye kue ayeke duti na ndö ti mo tongana gbe ti de. Ndani laa molenge so mo yeke du lo ayeke ga zo so ayeke nde si ayeke nzoni kue; azo ayeke iri lo Molenge ti Nzapa. 36Baa, Élisabeth so ayeke zo ti sewa ti mo, lo so a iri lo ando wali ti dungo ni pepe so, lo mu ngo; ngo ti lo asara fadeso nze omene awe. Lo yeke du ande molenge-koli na mbakoro ti lo. 37So ti fa atene, ye ti hon ngangu ti Nzapa ayeke daa pepe.” 38Marie atene: “Mbi yeke zo ti kua ti Kota Gbia; ayeke nzoni ye ni asi na mbi alingbi na tënë so mo tene so.” Na pekoni, ange ni azia lo si ahon. 39Na ya ti alango ni so, Marie amu lege si lo gue hio na mbeni gbata ti Judée, sese so ahoto ayeke daa mingi. 40Lo li na ya ti da ti Zakarii si lo bara Élisabeth. 41So Élisabeth ama barango ndo ti Marie, molenge so ayeke na ya ti lo ado tere ti lo si Yingo-Vuru asi Élisabeth. 42Lo dekongo ngangu, lo tene: “Nzapa asara tufa na ndö ti mo ahon awali kue, lo sara tufa na ndö ti Molenge so ayeke na ya ti mo! 43Mbi yeke zo wa si mama ti Kota Gbia ti mbi aga na ndo ti mbi so? 44Biani, gi so mbi ma barango ndo ti mo, molenge ni ado tere ti lo na ngia na ya ti mbi. 45Ti mo nzoni, ngbanga ti so mo ma na be so ye ni ayeke si ande gi tongana ti so Kota Gbia atene tënë ni na mo!” 46Marie atene: “Mbi gonda Kota Gbia ti mbi! 47Be ti mbi asi singo na ngia ndali ti Nzapa, Wasongo mbi, 48ngbanga ti so lo baa mbi na nzoni le, mbi so mbi yeke senge zo ti kua ti lo. Biani, ti londo na azo ti fadeso ti gue na ni, fade azo ti angoi kue ayeke tene tënë ti mbi nzoni, 49ngbanga ti so Nzapa so ngangu ti lo ahon angangu kue, asara akota ye na mbi; iri ti lo ayeke nde si ayeke nzoni kue. 50Lo yeke sara nzoni be kpu na kpu na azo so akpe mbeto ti lo. 51Lo sara akota ye na lege ti ngangu ti lo: lo kangbi popo ti azo so ayeke gonda tere ti ala na ya ti be ti ala wani. 52Lo mu agbia na ndö ti mbata ti ala si lo bi ala na sese, lo mu asenge zo, lo zia ala na kota ndo. 53Lo mu anzoni ye mingi na azo so nzara asara ala si lo tumba azo ti mosoro, maboko ti ala senge. 54Lo ga, lo mu maboko na azo ti Israel so ayeke azo ti kua ti lo; lo dabe ti lo na nzoni be ti lo 55so lo sara na Abraham na ahale ti lo lakue lakue. Lo sara ye ni alingbi na zendo so ando lo mu na akotara ti e.” 56Marie angba na ndo ti Élisabeth nduru na nze ota si na pekoni, lo kiri na ndo ti lo. 57So lango ti dungo ti Élisabeth alingbi awe, lo du molenge-koli. 58Azo ti tere ti da ti lo na azo ti sewa ti lo abaa so Kota Gbia asara nzoni be na lo si be ti ala nga ayeke na ngia. 59Lango miombe na pekoni, ala ga ti fâ molenge ni na ganza. Ala ye ti mu na lo iri ti babâ ti lo Zakarii, 60me mama ni amu tënë, atene: “Ên-en, fade a iri lo Jean.” 61Ala tene na lo: “Mbeni zo ti sewa ti mo ayeke na mara ti iri so lawa!” 62Ala sara maboko ti ala na babâ ni ti hunda lo na iri so lo ye ti mu na molenge ni. 63Zakarii ahunda mbeni ardoaze si lo su mbeti na le ni, lo tene: “Iri ti lo ayeke Jean.” Li ti azo ni kue akpe. 64Gi na pekoni, yanga ti Zakarii azi, lo to nda ti tene tënë si lo gonda Nzapa. 65Tongaso, mbeto agbu azo ti tere ti da ti lo kue. Na ya ti ahoto ti Judée, azo kue ayeke tene tënë ti aye so asi so. 66Azo so kue ama tënë ti aye ni so, abata tënë ni na be ti ala si ala yeke tene na popo ti ala: “Fade kete molenge so ayeke ga tongana nyen?” Ngangu ti Kota Gbia ayeke na lo biani. 67Yingo-Vuru asi Zakarii, babâ ti Jean si lo tene peko ti tënë ti yanga ti Nzapa, lo tene: 68“E gonda Kota Gbia, Nzapa ti Israel, ngbanga ti so lo ga ti baa azo ti lo, ti zi ala na gbe ti ngbaa. 69Lo soro mbeni ngangu zo ti songo e na kuâ; lo soro lo na popo ti ahale ti David, zo ti kua ti lo. 70Lo zia tënë ni ando na yanga ti awayanga-Nzapa si ala tene ni; awayanga-Nzapa so Nzapa azia ala nde ndali ti lo. 71Na lege ti songo so lo soo e, lo zi e na maboko ti awato ti e nga na maboko ti ala so be ti ala ake e. 72Lo sara nzoni be na akotara ti e ti dabe ti lo na mbuki ti lo so ayeke nde si ayeke nzoni kue. 73Biani, lo deba yanga ti lo na Abraham, kotara ti e, lo tene tënë ni na ndö ti e, lo tene: 74‘Mbi yeke zi ala na maboko ti awato ti ala titene ala voro mbi na mbeto pepe, 75tongaso si ala lingbi ti mu be ti ala na mbi, ti sara ye ti mbirimbiri na le ti mbi, na lango ti fini ti ala kue.’ 76Me ti mo, kete molenge, fade azo ayeke iri mo wayanga-Nzapa ti lo so lo yeke na yayu kâ na ndö ti aye kue, ngbanga ti so fade mo yeke tambula na dawa ti Kota Gbia ti leke lege ti lo. 77Mo yeke fa na azo ti lo lege so Nzapa ayeke zi tënë na li ti ala titene ala soo kuâ. 78Nzapa ti e ayeke sara nzoni be mingi: lo sara si lumiere so alondo na yayu aza na ndö ti e tongana lâ ti ndaperere. 79Fade lâ ni ayeke su na ndö ti azo so aduti na ya ti vukongo ndo ti kuâ, ti fa na e lege ti siriri si e tambula daa.” 80Molenge ni ayeke kono si ndara ti lo ayeke mai. Lo duti na benyama ngbii asi na lango so lo sigigi polele na le ti azo ti Israel.

will be added

X\