JACQUES 3

1A-ita ti mbi, alingbi azo mingi na popo ti ala aga awafango-ye pepe! Ala hinga atene, e so e yeke awafango-ye, fade Nzapa ayeke fâ ngbanga na li ti e ngangu ahon ti tanga ti azo kue. 2E kue, e yeke girisa lege fani mingi. Tongana mbeni zo agirisa lege na ya ti tenengo tënë ti lo pepe, andaa lo yeke zo ti nzoni kue, lo lingbi ti kanga tere ti lo kue. 3Tongana e kanga kamba na yanga ti ambarata titene ala gue na ndo so e ye ala gue daa, e lingbi ti fa lege na ngbongboro tere ti ambarata ni kue. 4Ala baa nga amangboko: ataa so ala yeke kota mingi si akota pupu ayeke pusu ala ti hon na ni, gi mbeni kete kâî so ayeke na peko ti mangboko si ayeke sara titene mangboko ni ague na ndo so be ti zo ti kpengo na ni aye. 5Legeoko nga, menga ayeke mbeni kete kete mbage ti tere ti zo, me menga ni ayeke gonda tere ti lo ndali ti so, lo lingbi ti sara akota ye mingi. Ala baa, gi senge kete kete menga ti wâ alingbi ti gbi kota gbako! 6Menga ti zo ayeke tongana wâ si ayeke nga ndo so sioni aduti daa. Menga aduti na ya ti tere ti e si ayeke sara titene ngbongboro tere ti e kue aga sioni. Na ngoi so kue zo ayeke na dunia so, menga ti lo ayeke tongana wâ so ayeke buba fini ti lo; wâ ni alondo na ndo so wâ ayeke gbi daa lakue. 7Zo alingbi ti sara si amara ti anyama kue ama yanga ti lo: anyama ti ngonda, andeke, anyama so ayeke hara harango na asusu. 8Me zo oko alingbi ti sara komandema na ndö ti menga ti lo pepe! Menga ayeke mbeni sioni ye so ayeke duti kpoo laoko pepe, sioni yoro ti fango zo asi singo na ya ni. 9Na menga ti e si e yeke sepela Kota Gbia, Babâ ti e. Gi na oko menga so, e yeke deba azo so Nzapa asara ala si ala kpa lo so. 10Nzoni tënë na dengo ba alondo gi na yanga oko so si ayeke sigigi. A-ita ti mbi, alingbi ye ni aduti tongaso pepe. 11Lawa laa sengo ngu na nzoni ngu alondo gi na ya ti li ti ngu oko si asigigi? 12A-ita ti mbi, keke ti fige alingbi ti le olive pepe, wala keke ti vinye alingbi ti le fige pepe. Tongaso nga, nzoni ngu alingbi ti sigigi na ya ti li ti ngu ti ingo pepe. 13Mbeni zo ti ndara na ti hingango ndo ayeke na popo ti ala? Ayeke nzoni lo fa ni na lege ti nzoni dutingo ti lo nga na sarango aye ti lo so lo yeke sara na ndara, me na ngangu pepe. 14Me tongana ala yeke sara sioni kota be ti gbugburungo na kota ndo, ala pika kate ti ala ndali ti ndara ti ala ni pepe. Tongana ala yeke sara ye tongaso, andaa ala yeke tene mvene ti buba lege ti taa-tënë. 15Mara ti ndara tongaso alondo na yayu pepe, alondo na sese so, alondo na azo, alondo nga na Zabolo. 16Biani, ndo so kota be ayeke daa si gbugburungo kota ndo ayeke daa, wusuwusu na mara ti asioni nde nde ayeke daa. 17Me ndara so alondo na yayu, kozoni asara si zo aduti na vurungo be, na pekoni, asara si zo aduti na siriri, zo asara ye na ngangu pepe, zo ama tere na mba ti lo, zo asara nzoni be mingi na mba ti lo si lo sara nga anzoni ye. Ndara ti yayu ayeke mu mbage ti mbeni zo pepe si zo so ayeke na ni, tënë ti yanga ti lo ayeke nde pepe na sarango ye ti lo. 18Azo so aye siriri, ala yeke sara si azo so ayeke nduru na ala aduti na siriri; sarango ye ti ala akpa lungo ale ti kobe, lengo ni so ala yeke ko ayeke sarango ye ti mbirimbiri.

will be added

X\