AHEBRO 7

1Melkisedeke ayeke gbia ti gbata ti Salem, lo yeke nga wayango-sandaga ti Nzapa so ayeke na yayu kâ na ndö ti aye kue. Lani, Abraham ague ti tiri bira na agbia si lo kinda ala. Na kiringo ti lo na kodro, Melkisedeke ague atengbi na lo na lege si Melkisedeke asara tufa na ndö ti lo. 2Na pekoni, Abraham amu na lo dime ti aye so kue lo wara. Kozo ye so e yeke baa na ndö ti Melkisedeke ayeke so: nda ti iri ti lo atene “gbia ti ye ti mbirimbiri”. Use ye ni, lo yeke nga gbia ti gbata ti Salem; nda ti iri ni ayeke “gbia ti siriri”. 3Babâ ti lo na mama ti lo ayeke daa pepe, akotara ti lo ayeke nga daa pepe. Zo ahinga lango ti dungo lo wala lango ti kuâ ti lo pepe. Lo yeke tongana Molenge ti Nzapa: lo yeke sara kua ti wayango-sandaga kpu na kpu. 4Azo, ala baa Melkisedeke, lo yeke kota zo! Abraham, kotara ti e amu na lo dime ti aye so lo gbu na peko ti bira. 5Andaa Ndia ti Moïse amu lege na ahale ti Lévi so ayeke sara kua ti yango sandaga ti mu dime ti aye ti azo ti Israel kue. So aye ti tene, ala yeke mu dime ni na maboko ti a-ita ti ala so ayeke nga ahale ti Abraham. 6Melkisedeke ayeke zo ti mara ti Lévi pepe, me Abraham amu na lo dime ti aye so lo wara. Na ndoni, Melkisedeke asara tufa na ndö ti Abraham, lo so Nzapa amu zendo na lo so. 7Andaa kota zo laa ayeke sara tufa na ndö ti zo so ayeke na gbe ti lo; so kite ni ayeke daa pepe. 8Ahale ti Lévi so ayeke wara dime na maboko ti azo, ala yeke azo so ayeke kui kuingo; me Melkisedeke so awara dime so, lo yeke na fini tongana ti so Mbeti ti Nzapa atene. 9Ahale ti Lévi ayeke wara dime na maboko ti azo; me e lingbi ti tene, Lévi nga amu dime ti lo na lege ti Abraham so amu dime ti aye ti lo na Melkisedeke. 10Andaa, Abraham ayeke kotara ti Lévi. Tongaso, e lingbi nga ti tene, Lévi ade na ya ti kotara ti lo na ndembe so Abraham atengbi tere na Melkisedeke. 11Na lege ti Ndia so a mu na azo ti Israel, ahale ti Lévi laa a yeke soro ala ti ga awayango-sandaga; ala yeke awayango-sandaga tongana ti Aaron, me lege ti ala ti dutingo awayango-sandaga ni ayeke nzoni kue pepe. Tongana ayeke fade nzoni kue, ngbanga ti nyen ti mu mbeni wayango-sandaga tongana ti Melkisedeke? So ti tene, mbeni wayango-sandaga so ayeke hale ti Aaron pepe. 12Tongana lege ti dutingo ti awayango-sandaga aga nde, alingbi a mu nga mbeni ndia nde. 13Tënë so ayeke na ndö ti Kota Gbia ti e; lo yeke zo ti mbeni mara nde. Mbeni zo oko ti mara ti lo ade ti sara kua ti yango sandaga na ndö ti gbalaka pepe. 14Azo kue ahinga so, a du Kota Gbia ti e na ya ti mara ti Juda. Moïse atene tënë oko pepe na ndö ti ti mara ti Juda tongana lo tene tënë ti awayango-sandaga. 15Mbeni ye so akiri avuru le ti tënë ni ayeke so: mbeni wayango-sandaga nde asi, lo yeke tongana Melkisedeke. 16Lo ga wayango-sandaga na lege ti ndia ti azo pepe, me ndali ti ngangu ti fini so angba lakue lakue. 17Biani, Mbeti ti Nzapa atene tënë na ndö ti lo, atene: “Mo yeke duti wayango-sandaga kpu na kpu tongana ti Melkisedeke.” 18Tongaso, a mingo ndia ti kozoni so, ngbanga ti so ndia ni ayeke na ngangu pepe si alingbi ti sara mbeni nzoni ye na zo pepe. 19Biani, titene mbeni ye ti nzoni kue aduti daa, Ndia ti Moïse asara pepe ni oko pepe. Me mbeni ye so ayeke nzoni ahon ti kozoni asi awe; ye ni so laa e zia be ti e ti ku ni si na lege ni, e yeke ga nduru na Nzapa. 20Na ndö ni kue, Nzapa adeba yanga ti lo. Na mungo ambeni zo titene ala ga awayango-sandaga, Nzapa adeba yanga ti lo pepe. 21Me ti Jésus, Nzapa adeba yanga ti lo, atene: “Kota Gbia adeba yanga ti lo awe, lo yeke kiri na ndö ti tënë ti lo pepe: mo yeke duti wayango-sandaga kpu na kpu.” 22Ndani laa, ndali ti Jésus, e hinga biani so, e yeke li na ya ti mbuki so ayeke nzoni ahon ti kozoni. 23Mbeni ye ni ayeke so: ti ambeni wayango-sandaga ni, ala yeke mingi ndali ti so, tongana mbeni oko akui, mbeni nde ayeke mu kua ni na peko ti lo. 24Me ti Jésus, lo yeke ngba na fini lakue lakue; mbeni zo nde ti mu ndo ti lo, ti sara kua ti yango sandaga ni ayeke daa pepe. 25Ndani laa, azo so ayeke ga nduru na Nzapa na lege ti lo, lo yeke na ngangu ti soo ala biani biani, ngbanga ti so lo yeke ngba na fini lakue lakue ti sambela ndali ti ala. 26Mara ti kota wayango-sandaga so alingbi fade na e laa. Lo yeke nde si lo yeke nzoni kue, tënë ayeke na li ti lo oko pepe, lo sara siokpari oko pepe; lo kangbi na azo ti siokpari, Nzapa amu lo si azia lo na yayu kâ na ndö ti aye kue. 27Jésus ayeke tongana tanga ti akota wayango-sandaga pepe: lo baa nzoni na le ti lo pepe ti ya sandaga na ya ti lango oko oko ndali ti asiokpari ti lo wani kozoni si na pekoni, lo ya sandaga ndali ti asiokpari ti azo. Lo mu ti lo sandaga ni fani oko biani biani na ndembe so lo ka tere ti lo na kuâ. 28Azo so Ndia ti Moïse amu na ala lege ti ga akota wayango-sandaga, ala yeke azo so alingbi kue pepe; me na peko ti Ndia ni, Nzapa adeba yanga ti lo si lo mu Molenge ti lo ti ga kota wayango-sandaga so alingbi kue kpu na kpu.

will be added

X\