AHEBRO 5

1A yeke soro kota wayango-sandaga na popo ti azo si a yeke zia lo titene lo sara kua ti Nzapa ndali ti azo, ti leke tënë na popo ti azo na Nzapa. Kua ti kota wayango-sandaga ayeke ti ya aye so azo aga na ni na Nzapa, ti ya nga sandaga na Nzapa ndali ti asiokpari ti azo. 2Na lege ti sarango ye ti lo, ambeni ye mingi atia kota wayango-sandaga ni. Nilaa lo lingbi ti baa mawa ti azo so agirisa lege nga na ala so ahinga atene, sioni ye laa ala sara pepe. 3Ndali ti so aye atia lo na lege ti sarango ye ti lo, lo yeke ya sandaga na Nzapa gi ndali ti azo ti kodro pepe, me lo yeke ya nga sandaga ndali ti asiokpari ti lo wani. 4Zo ayeke mu tere ti lo wani ti si na kota ndo ni pepe, so ti tene, ti ga kota wayango-sandaga; me Nzapa laa ayeke iri zo ni tongana ti so lo iri ando Aaron. 5Ti Christ ayeke nga tongaso: lo mu tere ti lo wani ti si na kota ndo pepe ti ga kota wayango-sandaga; me Nzapa laa amu lo ti ga kota wayango-sandaga, Nzapa so atene na lo: “Mo yeke Molenge ti mbi, laso mbi ga Babâ ti mo awe.” 6Nzapa akiri atene nga, atene: “Mo yeke duti wayango-sandaga kpu na kpu tongana ti Melkisedeke.” 7Na ngoi so Jésus ayeke na sese so, lo hinga so Nzapa alingbi ti soo lo na kuâ. Lo sambela, lo voro tere ti lo na Nzapa, lo dekongo, lo toto na ngu ti le. Nzapa ama lo, ngbanga ti so lo sara tere ti lo kete si lo ma yanga ti Nzapa. 8Ataa so lo yeke Molenge ti Nzapa, lo ga zo ti mango yanga ti Nzapa na lege ti pasi so kue lo baa. 9So lo sara aye so kue lo lingbi fade ti sara awe, Jésus aga zo ti songo azo, lo yeke soo azo so kue ama yanga ti lo si lo yeke sara titene ala duti na fini lakue lakue. 10Nzapa azia lo kota wayango-sandaga tongana ti Melkisedeke. 11E yeke na tënë mingi ti tene na ala na ndö ti tënë so; me ayeke ngangu ti fa nda ti atënë ni, ngbanga ti so ala ga azo so ayeke ma ya ti tënë hio pepe. 12Ngoi ahon mingi so ala lingbi fade ti ga awafango-ye! Me ala kiri aga azo titene a kiri a fa na ala akozo tënë ti Nzapa. So aye ti fa atene, ala de ti kpengba titene a mu na ala kpengbango kobe pepe, ala ngba ti nyon ngu ti me. 13Zo so angba ti nyon me, andaa lo de kete molenge. Tënë na ndö ti ye so ayeke mbirimbiri, lo lingbi ti ma ya ni pepe. 14Kpengbango kobe ayeke ndali ti akangba, ngbanga ti so na lege ti sarango ye so ala yeke sara lakue, le ti ala azi awe ti hinga ye ti nzoni na ye ti sioni.

will be added

X\