AHEBRO 3

1Tongaso, a-ita azo ti Nzapa, ala so lo iri ala ti ga azo ti lo, ayeke nzoni ala baa ndo na Jésus, lo so Nzapa atokua lo titene lo ga kota wayango-sandaga ti mabe so e yeke fa tënë ni. 2Ando, Moïse asara kua na legeni na ya ti da ti Nzapa kue. Legeoko nga, Jésus asara kua na Nzapa na legeni, Nzapa so asara si lo ga kota wayango-sandaga. 3Biani, zo so asara da, azo ayeke ne lo ahon da ni wani, nilaa, alingbi azo agonda Jésus ahon ti so ala gonda Moïse so. 4Da kue, zo laa asara ni, me lo so asara ye kue ayeke Nzapa. 5Moïse asara ti lo ando kua ti da ti Nzapa kue na legeni tongana zo ti kua ti Nzapa; kua ti lo ayeke ti fa na azo tënë so Nzapa ayeke tene ande na ala. 6Ti Christ, lo sara kua ni na legeni tongana Molenge ti Nzapa, lo yeke na komandema na ndö ti da ti Babâ ti lo. E laa e yeke da ni tongana e ngba ti zia be ti e na ndö ti ye so e yeke ku ni si e gonda tere ti e daa. 7Ndani laa, tongana ti so Yingo-Vuru atene: “Laso, tongana ala ma go ti Nzapa, 8ala kpengba be ti ala pepe tongana ti so akotara ti ala asara ngangu li si ala tara be ti Nzapa na ngoi so ala yeke ando na benyama. 9Kâ, akotara ti ala agi yanga ti mbi, ala tara be ti mbi si ala baa aye so mbi sara 10na ya ti ngu baleosio. Ndani laa ngonzo asara mbi na tere ti ala si mbi tene lani, mbi tene: ‘Li ti ala ayeke gue lakue gi kirikiri; ala ke ti hinga lege so mbi ye ala mu.’ 11Na ya ti ngonzo ti mbi, mbi deba yanga, mbi tene: kodro so mbi leke titene ala wu tere ti ala daa so, fade ala yeke li na ya ni oko pepe!” 12A-ita, le ti ala akpengba! Mbeni zo oko na popo ti ala asara sioni be wala adekite pepe, tongaso si lo zia lege ti Nzapa pepe, lo so lo yeke na fini. 13Me so ngoi so Mbeti ti Nzapa airi ni “laso” angba, ala mu wango na popo ti ala lakue si siokpari ahanda mbeni zo pepe, tongaso si lo ga zo ti ngangu li pepe. 14Fadeso, e na Christ e yeke sara kua legeoko gi tongana kozo ye so e zia be ti e daa, e gbu ni ngangu ngbii asi na ndani. 15Mbeti ti Nzapa atene: “Laso, tongana ala ma go ti Nzapa, ala kpengba be ti ala pepe tongana ti so akotara ti ala asara ngangu li.” 16Azo so ama ando go ti Nzapa si ala sara ngangu li so ayeke azo wa? Ala yeke azo so kue Moïse amu ala na kodro ti Ezipte si asigigi na ala. 17Be ti lo aso na ya ti ngu baleosio na azo wa? Be ti lo aso na azo so asara siokpari si ala kui na ya ti benyama. 18Nzapa adeba yanga ti lo, atene: “Fade ala yeke li na kodro so pepe, kodro so mbi leke titene ala wu tere ti ala daa so”. Lo deba yanga ni na azo wa? Na azo so asara ngangu li so. 19Tongaso, e baa so azo ni ali na kodro ni pepe, ngbanga ti so ala ma na be pepe.

will be added

X\