AHEBRO 2

1Ndani laa, tënë ti Nzapa so e ma, alingbi e gbu ni ngangu, tongaso si e girisa lege pepe. 2Tënë so Nzapa afa ando na lege ti a-ange, aga taa-tënë. Azo so kue ake tënë ni, wala ala so aye ti ma ni pepe, Nzapa afâ ngbanga na li ti ala alingbi mbirimbiri na ye so ala sara. 3Tongaso, tënë ti songo zo na kuâ ayeke kota ye mingi. Tongana e baa ni tongana mbeni senge ye na le ti e, fade e yeke kpe ngbanga ti Nzapa tongana nyen? Kota Gbia ato nda ti tene tënë ti songo zo na kuâ ni so kozoni. Na pekoni, azo so ama tënë ni, ala fa ni na e si ala ye gbe ni atene, tënë ni ayeke taa-tënë. 4Nzapa nga afa atene, tënë ni ayeke taa-tënë na lege ti aye ti kpene nde nde na aye ti dongo be nga na amatabisi ti Yingo-Vuru so lo kangbi na azo tongana ti so be ti lo aye. 5Biani, dunia so ayeke ga ande si e yeke tene tënë ni so, a-ange laa Nzapa azia ni na gbe ti ala pepe. 6Me na ya ti Mbeti ti Nzapa, mbeni zo atene: “Nzapa, zo ayeke nyen titene mo dabe ti mo na lo? Zo ayeke nyen titene mo baa lege ti lo? 7Mo sara si lo kiri na gbe ti a-ange ndali ti kete ngoi, mo sara si azo agonda lo mingi si ane lo. 8Mo zia ye kue na gbe ti lo.” So Nzapa azia ye kue na gbe ti lo, ye kue ayeke na gbe ti lo. Me na le ti e, e de ti baa so ye kue ayeke na gbe ti lo pepe. 9Me ye so e baa ni ayeke so: Nzapa akiri na Jésus na gbe ti a-ange ndali ti kete ngoi. Na lege ti nzoni be ti Nzapa, Jésus akui ndali ti azo kue, nilaa Nzapa asara si azo agonda lo mingi si ane lo ndali ti kuâ so lo kui. 10Nzapa asara ye kue, ye kue ayeke ndali ti lo. Lo ye ti mu azo mingi ti li na ala na ya ti gonda ti lo. Biani, alingbi fade lo sara titene Jésus aga nzoni kue na lege ti pasi so lo baa. Andaa Jésus ayeke mu lege na azo titene ala soo kuâ. 11Lo so ayeke zia azo nde ndali ti Nzapa, lo na azo ni ayeke gi na Babâ oko. Ndani laa, lo yeke na kamene ti iri ala a-ita ti ni pepe. 12Biani, lo tene: “Fade mbi yeke tene tënë ti mo na a-ita ti mbi si mbi yeke gonda mo na ya ti bongbi ti azo ti mo.” 13Lo kiri lo tene: “Fade mbi yeke zia be ti mbi kue na ndö ti Nzapa.” Lo kiri lo tene nga: “Amolenge so Nzapa amu ala na mbi, baa, mbi na ala laa!” 14Ndali ti so amolenge ni ayeke na tere na mene oko, Jésus aga tongana ala si lo mu tere ti zo. Tongaso, na lege ti kuâ ti lo, lo kinda Zabolo so ayeke ando na ngangu na ndö ti kuâ. 15Azo so lani mbeto ti kuâ ayeke sara ala si ala ga tongana angbaa na gigi ti ala kue, na lege ti kuâ ti lo, lo zi ala awe. 16Biani, Jésus aga ti mu maboko na a-ange pepe, me lo ga ti mu maboko na ahale ti Abraham. 17Ndani laa, alingbi fade lo ga tongana a-ita ti lo na ya ti aye kue. Tongaso, lo ga kota wayango-sandaga so ayeke baa mawa ti azo si lo yeke sara kua ti Nzapa na legeni, titene lo zi asiokpari ti azo. 18Biani, lo lingbi ti mu maboko na azo so aye ti tarango be asi na ala, ngbanga ti so lo nga, lo baa pasi si aye ti tarango be asi ando na lo.

will be added

X\