AHEBRO 12

1So gba ti azo so asara ando ye na lege ti mabe ti ala ayeke ngoro e, ayeke nzoni e nga, e zi na ndö ti e akungba so kue ayeke sara si e tambula gbaa so, e zia nga lege ti siokpari so ayeke gbu e hio hio na ya ti gbanda ti lo. E kpe loro ti mandako so e yeke na ya ni so ngangu, e zia lege ni pepe. 2Le ti e angba na ndö ti Jésus. Lo laa lo zi lege ti mabe na e si lo sara titene e ngba na lege ti mabe ni ngbii asi na ndani. Lo yeda si azo afâ lo na ndö ti keke ti kroa, lo sara kamene ti kuâ so lo kui na ndö ti keke ti kroa pepe. Lo yeda ndali ti so lo hinga kozoni so fade lo yeke duti na ngia. Fadeso, lo yeke duti na tere ti mbata ti Gbia Nzapa, na mbage ti maboko ti lo ti koli. 3Ala dabe ti ala na Jésus, na pasi so lo baa na maboko ti azo ti siokpari so ake lo, tongaso si be ti ala awoko pepe si ala zia lege ni pepe. 4Bira so ala yeke tiri na siokpari so, ala de ti gbu le ni ngbii mene ti ala atuku ndali ni pepe. 5Be ti ala agirisa na wango so Nzapa ayeke mu na ala tongana ti so babâ ayeke mu na amolenge ti lo; lo tene: “Molenge ti mbi, tongana Kota Gbia apika mo ti zia mo na nzoni lege, mo baa ni tongana senge ye pepe. Tongana Kota Gbia asuku na mo, ayeke nzoni be ti mo awoko pepe, 6ngbanga ti so zo so Kota Gbia aye lo, lo yeke pika lo ti kiri na lo na nzoni lege. Azo so kue lo mu ala tongana amolenge ti lo, lo yeke pika ala na zaza.” 7Ala kanga be ti ala na ya ti apasi so ayeke si na ala: Nzapa ayeke pika ala tongana pika so babâ ayeke pika molenge ti lo ti kiri na lo na nzoni lege. Molenge wa laa babâ ti lo ayeke pika lo ti kiri na lo na nzoni lege pepe? 8Tongana Nzapa apika ala pepe tongana ti so lo yeke pika amolenge ti lo kue, tongaso ala yeke taa amolenge pepe, me ala yeke amolenge so a hinga babâ ti ala pepe. 9Ababâ ti e ti sese so ayeke pika ka e ti kiri na e na nzoni lege si e yeke kpe mbeto ti ala. Tongaso, ayeke nzoni ahon titene e ma yanga ti Babâ ti e so ayeke na yayu si e duti na fini. 10Ti ababâ ti e ti sese so, ala yeke pika ka e tongana ti so ala baa nzoni na le ti ala; pikango e ni ayeke gi ndali ti kete ngoi. Me ti Nzapa, lo yeke pika e ndali ti nzoni ti e, ti mu na e lege ti duti nde si e ga nzoni kue tongana lo. 11Tongana a pika zo ti kiri na lo na nzoni lege, be ti lo ayeke nzere na ndembe ni pepe; na le ti zo ni ye ni akpa ye ti vundu. Me mbeni lâ, tongana li ti lo aga daa awe, lo yeke wara aye ti pekoni: siriri na sarango ye ti mbirimbiri. 12Ndani laa, ala yoro ya ti amaboko ti ala so awoko, ala sara si alikunu ti ala so awoko, akpengba! 13Ala suru lege so ayeke mbirimbiri titene ala hon daa, tongaso si zo so gere ti lo abuba, abuba biani pepe, me tere ti lo aga nzoni. 14Ala gi lege ngangu ti duti na siriri na azo kue, ala gi nga lege ngangu titene fini ti ala aduti nde si aduti nzoni kue. Tongaso pepe, fade zo oko alingbi ti baa Kota Gbia pepe. 15Ala sara hange si mbeni zo ado lege ti nzoni be ti Nzapa azia pepe. Alingbi mbeni zo aga tongana sengo gere ti pere ti ngonda pepe; mara ti zo tongaso ayeke bi wusuwusu na popo ti azo si lo yeke buba li ti ala. 16Ala sara hange si mbeni zo ti sarango ye ti ndumba aduti na popo ti ala pepe! Ala ne aye so ayeke ti Nzapa. Ala sara tongana Ezau pepe so aka ando ndo ti lo ti kozo molenge ndali ti sembe ti kobe oko. 17Ala hinga so, na pekoni, Ezau aye titene babâ ti lo asara tufa na ndö ti lo titene lo wara aye ti peko ti babâ ti lo, me a gbanzi lo na ni. Lo gi lege ngangu ti sanze ye so lo sara so, me lo ha gbaa, ataa so lo toto na ngu ti le. 18Lani so ala ga nduru na Nzapa, ala ga nduru pepe na tere ti hoto so zo alingbi ti ndu ni na maboko, so ti tene hoto ti Sinai: na ndö ti hoto ni, wâ so ayeke gbi, ndo so avuko pitipiti, kota pupu so aya ngangu ayeke daa. 19Ala ma nga toto ti tatalita na mbeni go so ayeke tene tënë. Azo ti Israel so ama ni so, ala yeda ti ngba ti ma ni pepe. 20Biani, yanga so Nzapa amu so, ala lingbi ti kanga be ti ma ni pepe. Lo tene: “Zo so kue andu hoto so, ataa ayeke mbeni nyama, fade a bo lo na têne si a fâ lo.” 21Ye so ala baa so ayeke ye ti mbeto mingi, nilaa Moïse atene: “Mbeto agbu mbi mingi si tere ti mbi ayeke do!” 22Me ti ala a-ita, ala ga nduru na hoto ti Sion awe, gbata ti Nzapa, lo so lo yeke na fini. Gbata ni ayeke Jérusalem ti yayu so a-ange kutu kutu abongbi tere ti ala daa ti sara matanga. 23A-ita, ala ga nduru na bongbi ti akozo molenge ti Nzapa awe, ala so a su iri ti ala na mbeti kâ na yayu. Ala ga nduru na Nzapa awe, lo so ayeke fâ ngbanga ti azo kue. Ala ga nduru awe na ayingo ti azo ti mbirimbiri so aga nzoni kue so. 24Ala ga nduru na Jésus awe, lo so lo leke tënë ti fini mbuki; ala ga nduru awe na mene ti Jésus so atuku ndali ti azo si ayeke tene nzoni tënë ahon mene ti Abel. 25Ala sara hange! Zo so ayeke tene tënë na ala, ala ke ti ma tënë ti lo pepe. Ando na sese so, azo ti Israel awara sioni, ngbanga ti so ala ke ti ma tënë ti zo so ayeke fa na ala peko ti tënë ti yanga ti Nzapa, ti gboto mê ti ala. Ti e, tongana e ke lo so alondo na yayu si ayeke tene tënë na e, fade e yeke kpe ngbanga ti Nzapa tongana nyen? 26Ando, go ti Nzapa ayingi sese kue; me fadeso, lo mu zendo so na e, lo tene: “Fade mbi yeke kiri ti yingi gi sese pepe, me mbi yeke yingi yayu nga.” 27Tënë ti yanga ti Nzapa so atene: “Fade mbi yeke kiri” so aye ti fa atene, aye so kue lo leke ni alingbi ti yingi si fade ayeke hon; me aye so alingbi ti yingi pepe, ni laa ayeke ngba. 28Ndali ti so e wara lege ti li na Kodro-gbia ti Nzapa, kodro so ayeke yingi pepe, ayeke nzoni e mu singila na lo na lege ti sarango kua so anzere na be ti lo, e ma yanga ti lo si e kpe mbeto ti lo. 29Biani, Nzapa ti e ayeke tongana mbeni wâ so ayeke gbi ye kue.

will be added

X\