AHEBRO 1

1Ando, Nzapa atene tënë fani mingi na akotara ti e na lege nde nde; lo zia tënë ni na yanga ti awayanga-Nzapa si ala tene. 2Me na ngoi ti ndani so e yeke daa, lo tene tënë na e na lege ti Molenge ti lo. Nzapa asara dunia mobimba na lege ti Molenge si lo zia Molenge ni titene aye kue aga ti lo. 3Gonda ti Nzapa ayeke za na lege ti Molenge ni. Lo yeke taa tongana ti so Nzapa ayeke, lo yeke bata dunia so na ngangu ti tënë ti yanga ti lo. So lo sukula asiokpari ti azo awe, lo gue lo duti na yayu, na tere ti Nzapa so ngangu ti lo ahon ndoni, na mbage ti maboko ti lo ti koli. 4Molenge ti Nzapa aga kota ahon a-ange kue. Legeoko, Nzapa amu na lo iri so ayeke nde na ti a-ange. 5Biani, laoko Nzapa atene mbeni tënë tongaso na mbeni ange pepe: “Mo yeke molenge ti mbi, laso mbi ga Babâ ti mo awe.” Laoko lo tene nga mbeni tënë tongaso na ndö ti mbeni ange pepe: “Fade mbi yeke duti Babâ ti lo si lo yeke duti molenge ti mbi.” 6Me na ndembe so Nzapa aye ti tokua kozo molenge ti lo na ndö ti dunia so, lo tene: “Alingbi a-ange ti Nzapa kue avoro lo.” 7Tënë so Nzapa atene na ndö ti a-ange ayeke so: “Lo sara si a-ange ti lo aga tongana kota pupu; lo sara si azo ti kua ti lo aga tongana amenga ti wâ.” 8Me ti molenge ti lo, Nzapa atene: “O Nzapa, mbata ti mo ti gbia ayeke ngba kpu na kpu! Na ya ti kodro-gbia ti mo, mo yeke sara komandema na legeni. 9Mo ye gi ye ti mbirimbiri si mo ke ye ti sioni. Ndani laa Nzapa, Nzapa ti mo asoro mo na popo ti amba ti mo si atuku mafuta ti matanga na li ti mo.” 10Nzapa akiri atene: “Kota Gbia, na tongo nda ni, mo laa mo sara sese, yayu ayeke ye so maboko ti mo asara. 11Fade aye so kue ayeke buba, me mo yeke ngba ti mo. Biani, fade aye so kue ayeke ga tongana ngbene bongo so awoko awe. 12Fade mo yeke rule aye so tongana ti so zo ayeke rule kota bongo ti de. Fade mo yeke sara si ala ga nde tongana ti so zo ayeke zi bongo ti yu mbeni nde. Me ti mo, mo yeke ngba lakue si alango ti mo ayeke hunzi pepe.” 13Laoko Nzapa atene nga na mbeni ange pepe, atene: “Ga mo duti na mbage ti maboko ti mbi ti koli, ngbii asi na ndembe so mbi yeke sara titene awato ti mo aga tongana mbata ti gbe ti gere ti mo si!” 14A-ange ayeke gi ayingo so ayeke sara kua na Nzapa: lo yeke tokua ala titene ala sara nzoni na azo so lo ye ti soo ala.

will be added

X\