GALASII 6

1Ala, a-ita so Yingo ti Nzapa ayeke fa lege na fini ti ala, tongana ala baa mbeni zo na sarango ye ti sioni, ayeke nzoni na wokongo be, ala kiri na zo ni na nzoni lege. Ita ti mbi, sara hange si mo nga, mbeni ye atara be ti mo pepe! 2Ala yo kungba ti amba ti ala na popo ti ala: so lege ti sarango ye alingbi na ndia ti Christ laa. 3Zo so ayeke gi senge zo si lo yeke baa tere ti lo tongana kota zo, andaa lo yeke handa tere ti lo wani! 4Ayeke nzoni zo oko oko agbu li ti lo na ndö ti sarango ye ti lo wani. Titene lo gonda tere ti lo ndali ti mbeni ye, ayeke nzoni lo wara ye ni na ya ti fini ti lo wani, me lo haka sarango ye ti lo na ti mbeni zo pepe. 5Biani, fade zo oko oko ayeke kiri tënë na ndö ti ye so lo wani lo sara. 6Zo so mba ti lo ayeke fa na lo nda ti tënë ti Nzapa, alingbi lo mu mbage ti aye ti lo na zo so ayeke fa ye na lo. 7Ala handa tere ti ala pepe: zo ayeke he Nzapa pepe. Ye so zo alu, fade lo yeke ko lengo ni. 8Zo so alu ye ndali ti sioni nzara ti be ti lo, fade lo yeke ko lengo ti ye ti nzara ti be, so ti tene kuâ; me so zo alu ye ndali ti Yingo, fade lo yeke ko lengo ti ye ti Yingo, so ti tene fini so angba lakue lakue. 9Be ti e awoko pepe na sarango nzoni ye, ndali ti so tongana ndembe ni alingbi si e ngba na lege ni, fade e yeke ko lengo ni. 10Tongaso, na ya ti ngoi so angba na e, e sara nzoni na azo kue, mbirimbiri na azo so, e na ala e ga sewa oko na lege ti mabe. 11Fadeso, mbi laa mbi su mbeti so na maboko ti mbi wani, nilaa agere ti mbeti ni ayeke kota kota so. 12Azo so ayeke gbu ala na ngangu titene ala fâ ganza so, aye gi titene a gonda ala ndali ti ye so zo ayeke baa tongana kota ye. Azo ni aye gi ye oko: ala yeke kpe titene azo asara ngangu na ala ndali ti keke ti kroa ti Christ. 13Ataa so azo ni afâ ganza, ala yeke sara ye alingbi na Ndia pepe! Azo ni aye ti fâ ala na ganza ti wara lege ti gondango tere ndali ti ye so azo ni asara na tere ti ala, a-ita. 14Ti mbi, mbi ye ti gonda tere ti mbi gi ndali ti keke ti kroa ti Kota Gbia ti e Jésus Christ. Na lege ti keke ti kroa ni, aye ti dunia so aga tongana ye so akui awe ndali ti mbi si mbi nga, mbi kui awe ndali ti aye ti dunia so. 15Ndani laa, ataa zo afâ ganza wala lo fâ ganza pepe, so ayeke senge. Kota ye ni ayeke so Nzapa asara si e ga afini zo! 16Mbi tene na azo so kue ayeke sara ye alingbi na ye so mbi fa so, mbi tene: siriri ti Nzapa na nzoni be ti lo aduti na ala, nga na azo so kue ayeke taa mara ti lo! 17Ti fadeso, alingbi mbeni zo akiri aso li ti mbi pepe! Biani, apeko ti ka so ayeke na tere ti mbi afa atene, mbi yeke zo ti Jésus. 18A-ita, ayeke nzoni Kota Gbia ti e Jésus Christ asara nzoni be na ala! Amen.

will be added

X\