GALASII 4

1Tënë so mbi ye ti tene ayeke so: tongana mbeni babâ aleke amosoro ndali ti molenge ti lo, na ngoi so molenge ni angba ti kono, dutingo ti lo ayeke tongana ti mbeni ngbaa, ataa so amosoro ni kue ayeke ti lo. 2Na ndembe so lo de molenge, lo yeke na gbe ti ambeni zo so ayeke bata lo na aye ti lo ni kue, ti ku na lango so babâ ti lo afa. 3E nga, e yeke ando tongaso: e yeke tongana amolenge, e yeke na gbe ti ngbaa ti ayingo so ayeke na ngangu na ndö ti dunia so. 4Me so ndembe ni alingbi na le ti Nzapa awe, lo tokua Molenge ti lo; wali laa adu lo, lo duti na gbe ti Ndia ti azuife 5titene lo zi azo so ayeke na gbe ti ngangu ti Ndia ni si e kue, e ga amolenge ti Nzapa. 6Ti fa so ala yeke amolenge ti lo biani, Nzapa atokua Yingo ti Molenge ti lo na be ti e kue, Yingo ni ayeke dekongo atene: “Abba!” so ti tene “Babâ!” 7Nilaa mo yeke ngbaa mbeni pepe, me mo yeke molenge ti Nzapa. So mo yeke molenge ti lo, fade Nzapa ayeke mu na mo aye so kue lo leke ndali ti amolenge ti lo. 8Ando, ala hinga Nzapa pepe, ala yeke angbaa ti aye so ala baa ti ala atene, ayeke anzapa, andaa aye ni so ayeke anzapa biani pepe. 9Me fadeso ala hinga Nzapa awe – ti tene taa-tënë, Nzapa laa ahinga ala –. Ayingo so ayeke na ngangu pepe si ala yeke nga ye oko pepe so, ala ye ti kiri ti mu peko ti ayingo ni so tongana nyen? Ngbanga ti nyen si ala azo ti Nzapa, ala ye ti kiri ti ga angbaa ti ala? 10Ala yeke mu ambeni lango, ambeni nze, ambeni ngoi nga na ambeni ngu tongana kota ye mingi na le ti ala! 11Mbeto ti ye so ala yeke sara so agbu mbi; so ti tene aye so kue mbi sara ngbanga ti ala so, peko ni ayeke ngba gi senge senge? 12A-ita, mbi gbu gere ti ala, ala ga tongana mbi, tongana ti so mbi nga, mbi ga lani tongana ala. Lani ala sara sioni oko na mbi pepe. 13Ala hinga kue: ndali ti songo tere ti mbi laa mbi wara lege ti fa Nzoni Tënë na ala ti kozo ni. 14Ataa so songo tere ti mbi ni aga na ala pasi mingi, ala zere mbi pepe, ala ke nga mbi pepe. Me ala yamba mbi, mo baa mo tene, mbi yeke mbeni ange ti Nzapa wala Jésus Christ. 15Ando tere ti ala anzere ahon ndoni! Ti fadeso, nyen laa asi na ala, nyen? Biani, mbi lingbi ti tene nzoni tënë ti ala, mbi tene: ala ye fade ti sara ye kue ndali ti mbi, tongana ayeke fade titene ala zi amboma ti le ti ala ti mu na mbi, ka ala sara ni! 16So mbi tene taa-tënë na ala so, mbi ga fadeso wato ti ala awe? 17Azo ni ayeke mu tere ti ala mingi na ala, azo ti Galasii, me tënë ti be ti ala ayeke nde; azo ni aye ti kangbi popo ti mbi na ala. Azo ni ayeke sara tongaso titene ala, azo ti Galasii amu tere ti ala kue gi na ala. 18Biani, so ayeke nzoni mingi titene zo amu tere ti lo kue ti sara nzoni ye; ayeke nzoni lo sara ni na ngoi kue, me lo sara ni pepe gi na ndembe so mbi yeke na popo ti ala. 19Amolenge ti mbi, tongana ti so mama ti ngo ayeke baa pasi na ndembe ti dungo ni, mbi nga, mbi yeke baa pasi ndali ti ala ngbii dutingo ti ala aga tongana ti Christ. 20Mbi ye fade mingi ti duti nduru na tere ti ala, tongaso si mbi hinga lege ti tene tënë na ala. Me ti fadeso, mbi gi li ti mbi na ye so mbi lingbi ti sara na ala gbaa. 21Ala tene na mbi mbirimbiri, ala so aye ti kiri na gbe ti Ndia so: ala ma tënë so Ndia atene so pepe? 22Biani, a su na ya ti mbeti ti Ndia atene: Abraham ayeke na amolenge use; lo du oko na wali so ayeke ngbaa si lo du oko na wali so ayeke ngbaa pepe. 23Molenge so lo du na wali so ayeke ngbaa, lo du lo na lege so azo kue ayeke du na ni, me molenge so lo du na wali so ayeke ngbaa pepe, lo du lo na lege ti zendo ti Nzapa. 24Nda ti tënë so alinda mingi: awali use so ayeke tongana ambuki use. Oko ni ayeke mbuki so abaa gigi na ndö ti hoto ti Sinai; lo du amolenge ti lo so ayeke angbaa: Agar laa. 25Agar ayeke hoto ti Sinai so ayeke na sese ti Arabii. Lo yeke tapande ti Jérusalem ti laso, ndali ti so lo na amolenge ti lo kue ayeke angbaa. 26Me Jérusalem ti yayu ayeke na gbe ti ngbaa pepe; Jérusalem so laa ayeke mama ti e. 27Biani, Mbeti ti Nzapa atene: “Mo, wali so mo du pepe, ayeke nzoni mo duti na ngia! Mo so mo hinga songo ti dungo ni pepe, ayeke nzoni mo dekongo na ngia, ndali ti so wali so koli ake lo, lo yeke wara amolenge mingi ahon wali so angba na da ti koli!” 28Ti ala, a-ita ti mbi, ala yeke amolenge so a du ala na lege ti zendo ti Nzapa tongana ti Isaac. 29Ando, molenge so a du lo tongana ti so azo kue ayeke du na ni asara ngangu na molenge so a du lo na lege ti Yingo ti Nzapa. Laso, ye ni ayeke gi tongaso. 30Me tënë ti nyen laa Mbeti ti Nzapa atene? Mbeti ni atene: “Tumba wali so ayeke ngbaa so, lo na molenge ti lo kue! Biani, alingbi molenge ti wali so ayeke ngbaa so awara mosoro ti ya ti da legeoko pepe na molenge ti wali so ayeke ngbaa pepe so!” 31Tongaso, a-ita, wali so ayeke ngbaa so, e yeke amolenge ti lo pepe, me e yeke amolenge ti wali so ayeke ngbaa pepe so.

will be added

X\