GALASII 3

1Ala azo ti Galasii, so buba ti nyen? Zo wa laa aturne li ti ala, zo wa? Andaa, a fa na ala polele tënë ti kuâ ti Christ na ndö ti keke ti kroa! 2Mbi ye titene ala kiri tënë na mbi na ndö ti tënë oko so si: ala wara Yingo ti Nzapa ndali ti so ala sara ye alingbi na Ndia wala na lege ti Nzoni Tënë so ala ma si ala ma na be na ni? 3Buba ti ala ahon ndoni! Ala to nda ti sara ye na ngangu ti Yingo ti Nzapa, fadeso ala ye ti hunzi ye ni na ngangu ti ala ti zo? 4Aye so kue asi ando na ala so, asi gi senge? Mbi baa ti mbi, mbi tene, ayeke senge pepe. 5Nzapa ayeke mu na ala Yingo ti lo si lo yeke sara aye ti kpene na popo ti ala! Lo yeke sara aye so kue ndali ti so ala sara ye alingbi na Ndia wala ndali ti so ala ma Nzoni Tënë si ala ma na be na ni? 6Mbeti ti Nzapa atene tënë na ndö ti Abraham, atene: “Abraham azia be ti lo na Nzapa, ndani laa Nzapa abaa lo tongana zo ti mbirimbiri na lege ti mabe ti lo.” 7Tongaso, alingbi ala hinga, atene: azo so aduti na fini na lege ti mabe, ala laa ayeke taa ahale ti Abraham. 8Mbeti ti Nzapa atene tënë ti ye ni so kozoni awe: fade Nzapa ayeke sara si azo ti amara nde ayeke ga mbirimbiri na le ti lo na lege ti mabe. Mbeti ni atene nzoni tënë so kozoni na Abraham, atene: “Na lege ti mo, fade Nzapa ayeke sara tufa na ndö ti amara kue.” 9Tongaso, azo so kue ama na be, Nzapa ayeke sara tufa na ndö ti ala tongana ti so lo sara tufa na ndö ti Abraham so ama na be. 10Me azo so azia be ti ala gi na ndö ti sarango aye alingbi na Ndia, deba ti Nzapa ayeke na li ti ala. Biani, Mbeti ti Nzapa atene: “Deba aga na li ti zo so sara ye pepe alingbi na atënë kue ti ya ti mbeti ti Ndia!” 11Tënë so ayeke taa-tënë biani: zo oko alingbi ti ga mbirimbiri pepe na le ti Nzapa na lege ti Ndia. Mbeti ti Nzapa atene: “Zo so aga mbirimbiri na le ti Nzapa na lege ti mabe, fade lo yeke duti na fini.” 12Andaa Ndia ayeke luti na ndö ti mabe pepe. Me Mbeti ti Nzapa atene: “Zo so asara ye alingbi na atënë ti Ndia, fade lo yeke na fini ndali ni.” 13Christ afuta kota ngere ti zi e na gbe ti deba awe. Deba so Ndia aga na ni na li ti e, lo yo deba ni na li ti lo wani ndali ti e. Biani, Mbeti ti Nzapa atene: “Zo so a kanga lo na nduzu na ndö ti keke, deba ayeke na li ti lo.” 14Christ asara tongaso titene anzoni ye so Nzapa amu zendo ni na Abraham so, azo ti amara nde nga awara ni na lege ti Christ. Tongaso na lege ti mabe, e wara Yingo so Nzapa amu zendo ni. 15A-ita, mbi ye ti mu tapande ti mbeni ye so azo ayeke sara ka na popo ti ala: tongana ambeni zo ama tere na ndö ti mbeni tënë si ala leke gere ti tënë ni mbirimbiri awe, mbeni zo alingbi ti buba ya ni pepe, mbeni zo alingbi nga ti zia mbeni tënë na ndö ni pepe. 16Legeoko nga, Nzapa amu azendo na Abraham na hale ti lo. Mbeti ti Nzapa atene tënë ti “ahale ti lo” pepe; a tene tënë ti azo mingi pepe, gi tënë ti zo oko: “na hale ti mo”, so ti tene Christ. 17Tënë so mbi ye ti tene ayeke so: Nzapa asara mbuki na popo ti lo na Abraham, lo leke gere ti mbuki ni mbirimbiri. Ngu ngbangbo osio na baleota na pekoni si Ndia abaa gigi. Ndia alingbi ti mingo ngangu ti mbuki ni pepe si peko ti zendo ti Nzapa aga senge ye pepe. 18Tongana Nzapa ayeke mu fade ye na azo ndali ti so ala sara ye alingbi na Ndia, ka lo mu ye ni na lege ti zendo pepe. Andaa na lege ti zendo laa Nzapa asara nzoni be na Abraham. 19Tongaso, kua ti Ndia ayeke nyen? Nzapa azia Ndia na tere ti mbuki ni titene e hinga ye so ake Ndia. Nzapa amu Ndia ti ku na gango ti hale ti Abraham, lo so Nzapa amu zendo ti mungo ye ni na lo. A-ange laa amu Ndia ni aga na ni na azo si mbeni zo ayeke walekengo-songo. 20Tongana zo ayeke gi lo oko, lege titene mbeni zo aduti walekengo-songo ayeke daa pepe. Andaa Nzapa ayeke gi oko. 21So ti tene Ndia ake tënë ti azendo ti Nzapa? Oko pepe! Tongana mbeni ndia alingbi fade ti mu fini na zo, ka azo aga mbirimbiri biani na le ti Nzapa na lege ti ndia awe. 22Me Mbeti ti Nzapa atene, azo kue ayeke na gbe ti ngangu ti siokpari. Ndani laa, ye so Nzapa amu zendo ni, lo yeke mu ni na azo so ama na be na Jésus Christ, lo mu ni na ala ndali ti mabe ti ala. 23Kozo titene ngoi ti mabe asi, e yeke lani tongana azo ti kanga na gbe ti Ndia ti ku ngoi so Nzapa ayeke sara titene e hinga tënë ti mabe. 24Tongaso, Ndia ayeke tongana mbeni zo so ayeke baa ndo na ndö ti e ti ku na gango ti Christ titene e ga mbirimbiri na le ti Nzapa na lege ti mabe. 25Me fadeso, so ngoi ti mabe asi awe, e yeke na gbe ti Ndia mbeni pepe, Ndia so ayeke tongana zo ti bango ndo na ndö ti e so. 26Biani, ala kue aga amolenge ti Nzapa na lege so ala ma na be na Jésus Christ. 27Ala kue awara bateme awe, ala ga oko na Christ. Tongaso, lege ti dutingo ti ala aga tongana ti Christ awe. 28Tongaso, zuife wala zo ti amara nde ayeke daa mbeni pepe, ngbaa wala zo so ayeke ngbaa pepe ayeke daa mbeni pepe, koli wala wali ayeke daa mbeni pepe. Biani, ala kue ayeke oko, ngbanga ti so ala ga oko na Jésus Christ awe. 29Tongana ala yeke azo ti Christ, andaa ala yeke ahale ti Abraham, ala yeke wara ande ye so Nzapa amu zendo ni.

will be added

X\