GALASII 2

1Ngu baleoko na osio na pekoni, mbi kiri mbi gue na Jérusalem, mbi na Barnabas; mbi mu nga Tite na tere ti mbi. 2Mbi gue kâ ndali ti so Nzapa afa na mbi ti gue. Kâ, na ya ti mbeni bongbi so mbi sara gi na azo ti li ti Eglize, mbi fa na ala nda ti Nzoni Tënë so mbi yeke fa ka na popo ti azo ti amara nde. Mbi sara ni, ngbanga ti so mbi ye titene ye so mbi sara kozoni na ti so mbi yeke sara fadeso, peko ni angba senge pepe. 3Ataa Tite, mba ti mbi so mara ti lo ayeke greke, mbeni zo agbu lo na ngangu pepe titene lo fâ ganza. 4Me ambeni ita ti mvene ali na popo ti e tongana azo ti nzi, ala ye titene a fâ Tite na ganza. Ala ga ti gi ti hinga lege ti dutingo ti e na peko ti so e sigigi na gbe ti ngbaa si e ga oko na Christ. Ala ye ti kiri ti sara e na ngbaa. 5E yeda na tënë ti azo so oko pepe, ataa na ya ti kete ngbonga oko, ngbanga ti so e ye ti bata na ala, a-ita, taa-tënë ti Nzoni Tënë. 6Ambeni zo ayeke daa so a baa ala tongana akota zo. – Ataa ala yeke lani kota wala ala yeke kota pepe, ngbanga ti mbi ayeke daa pepe, Nzapa ayeke gonda zo ndali ti le ti zo ni pepe. – Akota zo so agbu mbi na ngangu pepe titene mbi sara mbeni ye nde. 7Me ala hinga atene, Nzapa amu na mbi Nzoni Tënë ti fa na azo ti amara nde, tongana ti so lo mu ni na Pierre ti fa na azuife so. 8Biani, Nzapa so amu ngangu na Pierre ti ga watokua ndali ti azuife, gi lo oko laa lo mu nga na mbi ngangu ti ga watokua ndali ti azo ti amara nde. 9Jacques, Pierre na Jean, so azo ti Christ abaa ala tongana akota zo, ahinga atene, Nzapa amu kua so na mbi biani. Ndani laa, ala bara mbi na Barnabas ti fa atene, e na ala e yeke na beoko. E ma tere so fade e yeke gue ti e na mbage ti azo ti amara nde, ala yeke gue ti ala na mbage ti azuife. 10Ye oko so ala hunda na e ti sara ayeke titene e girisa ti mu maboko na azo ti mawa pepe; ye so mbi zia be ti mbi kue ti sarango ni laa. 11Me na ndembe so Pierre asi na Antioshe, mbi ke tënë na le ti lo polele, ndali ti so lo sara ye na legeni pepe. 12Kozoni, lo na ambeni zo ti amara nde ayeke te kobe. Me gi na peko ti so ambeni zo alondo na mbage ti Jacques si asi, lo gboto tere ti lo si lo yeke duti nde, lo kiri lo te kobe na ala pepe. Ndali ti so azo ayeke sara ye alingbi na tënë ti ndia ti fango ganza, mbeto ti ala asara lo. 13Ambeni ita zuife amu peko ti lo na sioni mayere ti sarango ye ni so; ataa Barnabas kue ati na peko ti ala na sarango mara ti ye ni so! 14So mbi baa ala yeke sara ye mbirimbiri alingbi na Nzoni Tënë pepe, mbi tene na Pierre na le ti azo kue, mbi tene: “Mo so mo yeke zuife, mo yeke sara ye tongana azo ti amara nde, mo yeke sara ye tongana zuife pepe. Asara tongana nyen si mo yeke gbu azo ti amara nde na ngangu titene ala sara ye tongana azuife so?” 15Ti e, a du e zuife, e yeke azo ti amara nde pepe, ala so ayeke azo ti siokpari so ahinga Ndia ti Nzapa pepe so! 16Me ye so e hinga ayeke so: zo aga mbirimbiri na le ti Nzapa gi na lege so lo ma na be na Jésus Christ, me sarango ye alingbi na Ndia pepe. E nga, e ma na be na Jésus Christ awe, e ga mbirimbiri na le ti Nzapa na lege ti mabe; sarango ye alingbi na Ndia laa asara si e ga mbirimbiri pepe. Biani, sarango ye alingbi na Ndia laa asara si zo oko aga mbirimbiri na le ti Nzapa pepe. 17E yeke gi lege ti ga mbirimbiri na le ti Nzapa na lege ti gango so e ga oko na Christ. So e yeke sara tongaso, e baa so e nga, e yeke azo ti siokpari tongana azo ti amara nde. So afa atene, Christ asara si e ga azo ti siokpari? Oko pepe. 18Biani, Ndia so mbi do na sese awe so, tongana mbi kiri ti leke ni na nduzu, andaa mbi wani mbi sara si mbi ga zo ti kengo Ndia awe. 19Ti mbi, mbi kui kuâ ti Ndia lani awe si mbi sigigi na gbe ti Ndia ni titene fini so mbi yeke na ni ayeke ndali ti Nzapa. So ti tene, na ndembe so Christ akui na ndö ti keke ti kroa, mbi na lo laa e kui. 20Nilaa, mbi laa mbi yeke na fini mbeni pepe, me Christ laa ayeke na fini na ya ti mbi. Na dutingo ti mbi ti zo, mbi yeke duti fadeso na fini gi na lege ti mabe so mbi yeke na ni na Molenge ti Nzapa, lo ye mbi si lo ka tere ti lo na kuâ ndali ti mbi. 21Mbi ye titene ye so Nzapa amu na e na nzoni be aga senge ye pepe. Tongana mbeni zo aga mbirimbiri na le ti Nzapa na lege ti Ndia, andaa Christ akui gi senge senge!

will be added

X\