EFEZE 5

1Ala yeke amolenge so Nzapa aye ala mingi. Tongaso, ayeke nzoni ala sara ye tongana lo. 2Ala sara ye na lege ti yengo tere tongana ti so Christ aye e si lo mu tere ti lo wani na Nzapa ndali ti e tongana sandaga so fion ni afun nzoni si anzere na be ti Nzapa. 3Ala yeke azo so ayeke nde si ayeke nzoni kue. Tongaso, sarango ye ti ndumba, sarango aye ti kamene nde nde wala kota nzara ti warango ye, akpa titene a ma tënë ti aye tongaso na popo ti ala pepe. 4Asioni tënë, abuba tënë na atënë na ndö ti sarango ye ti kamene asigigi na yanga ti ala pepe. Me ala mu gi singila na Nzapa. 5Alingbi ala hinga nzoni atene, azo ti sarango ye ti ndumba, azo ti sarango ye ti kamene nga na azo so kota nzara ti warango ye ayeke na be ti ala, Kodro-gbia ti Christ na ti Nzapa ayeke ga ti ala pepe. – Andaa sarango kota nzara ti warango ye ayeke mbeni lege ti vorongo anzapa nde. – 6Ala zia mbeni zo ahanda ala na asenge senge tënë pepe. Asioni ye tongaso asara si ngonzo ti Nzapa ayeke ga na ndö ti azo so ake yanga ti lo. 7Tongaso, ala yoro tere ti ala na ya ti sarango ye ti azo tongaso pepe. 8Ando, ala yeke na ya ti vukongo ndo. Ndali ti so ala ga oko na Kota Gbia, fadeso ala yeke na ya ti lumiere. Ayeke nzoni sarango ye ti ala ayeke tongana ti azo so ayeke na ya ti lumiere. 9Lumiere ni asara si zo aduti na nzoni be, lo yeke sara ye mbirimbiri si lo yeke tene taa-tënë. 10Ala gi lege ti hinga ye so anzere na be ti Kota Gbia. 11Aye so azo ayeke sara na ya ti vukongo ndo ayeke sara nzoni na zo oko pepe. Ala azo ti Nzapa, ala yoro tere ti ala na ya ni pepe, me ala sigigi na nda ti aye ni. 12Biani, kamene ayeke gbu zo ti tene tënë ti aye so azo ni ayeke sara na hondengo ni so. 13Me tongana a sigigi na nda ti aye ni kue, fade nda ni kue ayeke sigigi polele, 14ngbanga ti so ye so a fa ni na gigi polele aga ye so ayeke na ya ti lumiere. Ndani laa, a tene: “Mo zingo, mo so mo yeke lango. Mo londo na popo ti akuâ, fade Christ aza lumiere ti lo na ndö ti mo.” 15Ala sara hange na lege ti dutingo ti ala. Ala duti tongana abuba zo pepe, me tongana azo ti ndara. 16Ala zia ngoi ti ala ahon senge senge pepe, ngbanga ti so alango so e yeke daa so ayeke sioni. 17Ndani laa, ala duti tongana abuba zo pepe, me ala gi lege ti hinga ye so Kota Gbia aye. 18Ala nyon samba ahon ndö ti ala pepe: nyongo samba ahon ndoni ayeke buba gigi ti ala; me ala zia lege na Yingo-Vuru ti si ala singo. 19Tongana ala bongbi, ala he abia ti Mbeti ti Nzapa, abia ti gondango Nzapa na abia so Yingo ayeke mu na ala. Ala he abia si ala sepela Kota Gbia na be ti ala kue. 20Ala mu singila lakue na Nzapa Babâ ndali ti aye kue, na iri ti Kota Gbia ti e Jésus Christ. 21Ala ma yanga na popo ti ala ndali ti mbeto ti Christ so ayeke na be ti ala. 22Awali, ala ma yanga ti akoli ti ala tongana ti so ala yeke ma yanga ti Kota Gbia, 23ngbanga ti so koli ayeke na li ti wali ti lo tongana ti so Christ ayeke na li ti Eglize. Christ wani laa ayeke Wasongo Eglize so ayeke tere ti lo. 24Ndani laa, alingbi awali ama yanga ti akoli ti ala na ya ti aye kue, tongana ti so Eglize ayeke ma yanga ti Christ. 25Akoli, ala ye awali ti ala tongana ti so Christ aye Eglize si lo ka tere ti lo ndali ti Eglize ni. 26Lo sara tongaso titene Eglize ni aga nde si aga nzoni kue. Titene Eglize ni avuru tarara, lo sukula ni na ngu nga na lege ti tënë ti lo, 27ngbanga ti so lo ye si Eglize ni aluti na le ti lo, pendere, sarate ayeke daa pepe, le ti lo akpa ti mbakoro pepe, mbeni sioni ye oko ayeke daa pepe. Lo ye si Eglize ni aduti nde si aduti nzoni kue, tënë ayeke na li ti lo pepe. 28Alingbi akoli nga aye awali ti ala tongana ti so ala ye tere ti ala wani. Zo so aye wali ti lo, andaa lo ye tere ti lo wani. 29Biani, zo ade ti ke tere ti lo wani laoko pepe; me lo yeke te kobe ti bata na tere ti lo nzoni, tongana ti so Christ ayeke bata Eglize ti lo. 30Andaa e yeke ambage ti tere ti lo. 31Mbeti ti Nzapa atene: “Ndani laa, fade koli ayeke londo na gbe ti babâ na mama ti lo ti bongbi oko na wali ti lo si ala use kue ayeke ga gi tere oko.” 32Tënë so ayeke kota mingi, azo alingbi ti hinga nda ni kue pepe. Tënë so mbi yeke tene so ayeke tënë ti Christ na Eglize, 33me tënë ni ayeke nga ti ala azo ti Nzapa: ayeke nzoni koli oko oko aye wali ti lo tongana ti so lo ye tere ti lo wani si wali oko oko akpe koli ti lo.

will be added

X\