KOLOSE 3

1So ala na Christ azingo na kuâ awe, ala gi lege ti wara aye so ayeke na yayu, ndo so Christ aduti na tere ti Nzapa na mbage ti maboko ti lo ti koli. 2Ala zia be ti ala na aye ti yayu, me na aye ti sese pepe. 3Biani, ala kui awe si fini ti ala ahonde legeoko na ti Christ kâ na tere ti Nzapa. 4Christ ayeke fini ti ala. Na lango so lo yeke si, fade ala nga, ala yeke si legeoko na lo ti duti na ya ti gonda ti lo. 5Tongaso, ala zi anzara ti sarango asioni ye ti dunia so na be ti ala: sarango ye ti ndumba, sarango ye ti kamene, nzara ti tere, nzara ti sarango asioni ye nga na kota nzara ti warango ye; so ayeke mbeni lege ti vorongo anzapa nde. 6Asioni ye tongaso laa asara si ngonzo ti Nzapa ayeke londo [na tere ti azo so ake yanga ti lo]. 7Ala a-ita, ala yeke sara ando mara ti aye tongaso na ndembe so siokpari ayeke lani ye ti tere ti ala. 8Me fadeso, ala nga, ala zia aye so kue: ngonzo, songo be, sioni be, zongango ndo; abuba tënë asigigi na yanga ti ala pepe. 9Ala tene mvene na popo ti ala pepe, ngbanga ti so ala zi ngbene dutingo ti ala ti zo na asarango ti lo awe, tongana ti so zo ayeke zi gbagba bongo na tere ti lo. 10Ala yu fini dutingo ti zo awe tongana ti so zo ayeke yu fini bongo. Nzapa so asara ala si ala ga afini zo, lo yeke sara titene ala ngba lakue ti ga tongana lo, tongaso si ala yeke hinga lo mbirimbiri. 11Nilaa greke wala zuife ayeke daa mbeni pepe, zo so afâ ganza wala zo so afâ ganza pepe, zo ti amara nde wala basanzi, ngbaa wala zo so ayeke ngbaa pepe ayeke daa mbeni pepe; me kota ye ni ayeke so: Christ ayeke ye kue si lo yeke na be ti azo ti lo kue. 12Nzapa asoro ala, ala ga azo ti lo si lo ye ala. Tongaso, alingbi ala baa mawa ti azo, ala sara nzoni be na azo, ala baa tere ti ala tongana akota zo pepe, ala sara ngangu na azo pepe, ala kanga be ti ala ti ku. 13Ala kanga be na amba ti ala na popo ti ala. Tongana mbeni zo ayeke na tënë na mba ti lo, ala zi tënë na li ti amba ti ala na popo ti ala, tongana ti so Christ azi tënë na li ti ala; ala nga ala sara tongaso! 14Ye so ahon tanga ti aye ni kue ayeke yengo tere so ayeke bongbi azo nzoni. 15Ayeke nzoni siriri so alondo na Christ afa lege na ala na ya ti atënë ti be ti ala! Ndali ti siriri so laa Nzapa airi ala kue ti ga tere oko. Ala mu singila na Nzapa. 16Ayeke nzoni tënë ti Christ so anzoni ye asi singo daa aduti na ya ti fini ti ala. Ala fa ye si ala mu wango na amba ti ala na popo ti ala na lege ti ndara kue. Ala he abia na Nzapa na be ti ala kue ti mu singila na lo, ala he abia ti Mbeti ti Nzapa, abia ti vorongo Nzapa na abia so Yingo ayeke mu na ala. 17Atënë so kue ala yeke tene, wala aye so kue ala yeke sara, ala sara ni na iri ti Kota Gbia Jésus, ala mu singila na Nzapa Babâ na lege ti lo. 18Awali, ala ma yanga ti akoli ti ala; ye so azo ti Kota Gbia alingbi ti sara laa. 19Akoli, ala ye awali ti ala; ala sara ye na sioni be na tere ti awali ti ala pepe. 20Amolenge, ala ma yanga ti ababâ na amama ti ala na ya ti aye kue; ye so anzere na be ti Kota Gbia laa. 21Ababâ, ala sara ye ti songo be na amolenge ti ala pepe, ngbanga ti be ti amolenge ni awoko. 22Angbaa, ala ma yanga ti awa ti ala ti ndö ti sese so na ya ti aye kue. Ala sara kua ni gi ndali ti le ti awa ti ala pepe, mo baa mo tene, ala yeke gi ti ga nzoni na le ti azo; me ala sara kua ti ala na be ti ala oko ndali ti so, ala yeke kpe mbeto ti Kota Gbia. 23Ataa kua ni ayeke tongana nyen, ala sara ni na be ti ala kue, ngbanga ti so kua ni ayeke gi ndali ti azo pepe, me ndali ti Kota Gbia. 24Ayeke nzoni ala hinga atene, Kota Gbia ayeke futa ande ala; so ti tene ala yeke wara anzoni ye so Kota Gbia ayeke bata ni ndali ti azo ti lo. Taa Gbia so ala yeke sara kua na lo ayeke Christ. 25Zo so asara ye ti sioni, fade lo yeke wara futa ti peko ti sioni ti lo, ngbanga ti so Nzapa ayeke mu mbage ti mbeni zo pepe.

will be added

X\