KOLOSE 2

1Biani, mbi ye titene ala hinga tënë ti ngangu bira so mbi yeke tiri ndali ti ala, ndali ti azo ti Laodise nga ndali ti azo so kue ade ti baa le ti mbi laoko pepe. 2Mbi ye titene be ti ala awara ngangu, ala ga oko na lege ti yengo tere si ala wara lege ti mango ya ti tënë nzoni kue. Tongaso, fade ala yeke hinga nda ti tënë ti Nzapa so angba fade na hondengo ni: tënë ni ayeke Christ. 3Nzapa ahonde amosoro kue ti ndara na ti hingango ndo na ya ti Christ. 4Mbi yeke tene tënë so na ala titene zo oko ahanda ala na anzerengo tënë pepe. 5Biani, mbi wani mbi yeke na popo ti ala pepe, me be ti mbi angba na ndö ti ala. Mbi yeke na ngia ti baa so, ala yeke sara ye na legeni si mabe ti ala angba ti kpengba na ndö ti Christ. 6So ala yeda titene Jésus Christ aga Kota Gbia ti ala awe, ayeke nzoni ala sara ye tongana azo so aga oko na lo. 7Tongana ti so gere ti keke ali na ya ti sese wala da aluti ngangu na ndö ti gere ni, ala luti ngangu na ndö ti Christ. Ala kpengba na lege ti mabe alingbi na ye so a fa na ala, ala mu singila mingi na Nzapa. 8Le ti ala akpengba si mbeni zo ahanda ala na atënë ti ndara ti sese so pepe! Atënë so ayeke asenge senge tënë alondo na lege ti tënë ti akotara wala na lege ti ayingo so ayeke na ngangu na ndö ti dunia so, me alondo na Christ oko pepe. 9Biani, Nzapa aduti kue kue kue na ya ti tere ti Christ so aga zo. 10Na lege ti Christ so ayeke na li ti ayingo so kue ayeke na komandema, ala wara fini so ye oko atia na ya ni pepe. 11So ala ga oko na Christ, a fâ ala na ganza awe. Ganza so a fâ ala na ni, azo laa afâ ala na ni pepe, me ganza ni alondo na Christ wani. Ganza ni azi ala na gbe ti ngangu ti siokpari so ayeke na ya ti tere ti ala ti zo. 12So ala wara bateme, a lu ala na Christ awe si a zingo ala na kuâ legeoko na lo, ngbanga ti so ala ma na be na ngangu ti Nzapa so azingo lo na kuâ. 13Ando, ala yeke azo so akui awe ndali ti asioni so ala sara nga ndali ti so ala fâ ganza ti tere pepe. Me fadeso, Nzapa akiri na ala na fini, ala na Christ. Lo zi asiokpari so ayeke na li ti e kue awe. 14Mbeti ti mbela so abi tënë na li ti e si afâ ngbanga ti kuâ na li ti e so, Nzapa amingo ngangu ni, lo kanga ni na ndö ti keke ti kroa. 15Nzapa azi ngangu ti ayingo so ayeke na komandema; lo mu ala, lo fa ala polele na le ti azo, lo gboto ala tongana azo ti kanga na ya ti molongo ti azo so atambula na peko ti Molenge ti lo so aso benda awe. 16Tongaso, alingbi mbeni zo afâ ngbanga na li ti ala pepe ndali ti tënë ti kobe, wala ye ti nyongo ni, wala ndali ti alango ti Nzapa, wala amatanga ti fini nze wala alango ti wungo tere. 17Ye so kue ayeke tongana gbe ti de ti ye so ayeke ga gbanda, me taa ye ni ayeke Christ. 18A-ita, alingbi ala zia amara ti azo tongaso afâ ngbanga na li ti ala pepe. Ambeni zo ni aye ti sara tere ti ala lakue na le ti azo tongana akete zo si ala yeke voro a-ange, ala zia be ti ala gi na ndö ti aye so ala baa na ya ti mbeni ye tongana bango-li. Hingango ndo ti ala ayeke senge gbungo li ti azo, asara si ala baa tere ti ala kota ahon azo kue. 19Azo tongaso angba na tere ti Christ pepe so lo yeke tongana li ti zo. Ndali ti li laa tere kue ayeke wara ye so kue alingbi na lo; ndali ti lo laa ando so abio atengbi daa nga na akamba ti tere abongbi, aga oko si amai nzoni tongana ti so Nzapa aye. 20So ala na Christ akui awe, a zi ala na gbe ti ngangu ti ayingo ti dunia so awe. Ngbanga ti nyen si ala ngba ti sara ye tongana ti azo ti dunia so? Ngbanga ti nyen si ala yeda titene mbeni zo afa na ala mara ti ndia tongaso: 21“Mu ye so pepe!”, “Tara ye so pepe!”, “Ndu ye so pepe!” 22So kue ayeke gi andia so a leke ndali ti aye so ayeke hon hongo na peko ti so azo asara kua na ni. So ayeke gi andia na afango ye ti li ti azo laa! 23Biani, na le ti azo, andia so akpa ye ti ndara: vorongo Nzapa ti li ti zo wani, sarango tere tongana kete zo, sarango tere na pasi; me so kue ayeke gi asenge senge ye ndali ti so, aye ni alingbi ti sara si zo akanga anzara ti be ti lo pepe.

will be added

X\