AWATOKUA 5

1Me mbeni koli so iri ti lo Ananias, lo na wali ti lo Safira aka mbeni yaka ti ala. 2Lo na wali ti lo aleke tënë si lo gbanzi mbage ti nginza ni; lo mu tanga ni, lo gue na ni si lo zia na gbe ti awatokua. 3Pierre atene na lo: “Ananias, ngbanga ti nyen si mo yeda titene Satan ali be ti mo? Yaka so mo ka so, mo gbanzi mbage ti nginza ni si mo tene mvene na Yingo-Vuru. 4Kozo titene mo ka yaka so, yaka ni ayeke fade ti mo. So mo ka ni so, nginza ni ayeke ti mo. Ngbanga ti nyen laa mo leke na be ti mo ti sara mara ti ye tongaso? Mo tene mvene na zo pepe, me na Nzapa!” 5So Ananias ama tënë so, lo ti si lo kui. Azo so kue ama tënë ti ye so, mbeto agbu ala mingi. 6Amaseka-koli aga, ala kanga kuâ ti lo na bongo si ala gue na ni ti lu ni. 7Nduru na ngbonga ota na pekoni, wali ti lo ali, lo hinga ye so asi fade pepe. 8Pierre ahunda lo: “Tene na mbi: yaka so ala ka so, nginza ni kue laa?” Lo kiri tënë: “Een, ni kue laa!” 9Tongaso Pierre atene na lo: “Ngbanga ti nyen si mo na koli ti mo, ala leke na be ti ala ti tara Yingo ti Kota Gbia so? Baa, akoli so alu koli ti mo ayeke na yanga ti da. Fade ala yeke mu nga mo ti gue na mo!” 10Gi hio tongaso, lo ti na gere ti Pierre si lo kui. Amaseka-koli ni ali si ala baa so lo kui awe. Tongaso ala mu lo, ague na lo si ala lu lo na tere ti koli ti lo. 11Azo ti Eglize ni kue na azo so kue ama tënë ti ye so, mbeto agbu ala mingi. 12Awatokua asara aye ti kpene na aye ti dongo be mingi na popo ti azo. Azo ti Jésus kue ayeke bongbi tere na gbe ti veranda so iri ni Veranda ti Salomon. 13Mbeni zo nde ti bongbi na ala ayeke daa pepe, me azo ni ayeke tene nzoni tënë ti ala mingi. 14Gba ti akoli na awali, na ndoni na ndoni ama na be na Kota Gbia si ala bongbi oko na azo ti Jésus. 15Azo ayeke sigigi na azo ti kobela na tere ti akota lege, ala zia azo ni na ndö ti agbogbo wala akelekpa titene tongana Pierre ayeke hon, gbe-de ti lo ahon na ndö ti ambeni na popo ti ala. 16Gba ti azo alondo na akodro so ayeke na tere ti Jérusalem, aga na azo ti kobela nga na azo so asioni yingo asara ala; ala kue tere ti ala aga nzoni. 17Tongaso, kota wayango-sandaga na azo ti tere ti lo, so ti tene azo ti bongbi ti asadusien, kota be asara ala na tere ti awatokua si ala ye ti sara mbeni ye. 18Ala gbu awatokua ni si abi ala na da ti kanga. 19Me na bi ni, mbeni ange ti Kota Gbia azi yanga ti da ti kanga ni, lo mu awatokua ni, lo sigigi na ala si lo tene na ala: 20“Ala gue aluti na ya ti kota da ti Nzapa si ala fa na azo atënë so kue ayeke mu fini na zo.” 21Awatokua ama yanga ti ange so: na ndaperere, ala gue ali na ya ti kota da ti Nzapa si ala to nda ti fa ye na azo. Kota wayango-sandaga na azo ti tere ti lo airi akangba ti azuife si ala bongbi, ala na azo ti Kota Bongbi ti Fango Ngbanga kue. Na pekoni, ala tokua titene a mu awatokua, a ga na ala na gbe ti ala. 22Me so aturugu asi, ala wara awatokua na da ti kanga ni pepe. Ala kiri na mbage ti azo ti fango ngbanga ni si ala fa peko ti tënë ni na ala, atene: 23“So e si na da ti kanga ni, e baa yanga ni kue akanga nzoni si aturugu ayeke bata ni. Me so e zi yanga ti da ni, e wara zo oko na ya ni pepe!” 24So akota wayango-sandaga na makonzi ti aturugu ti kota da ti Nzapa ama tënë so, ala hinga li ti ala na ye ni pepe; ala hunda tere ti ala, atene: “Ye ni ayeke ga ande tongana nyen!” 25Na pekoni, mbeni zo aga si lo tene na ala: “Baa, akoli so ala bi ala na da ti kanga so, ala yeke na ya ti kota da ti Nzapa si ala yeke fa ye na azo!” 26Tongaso makonzi ti aturugu ni na azo ti lo ague amu awatokua ni akiri na ala; me ala sara ngangu na awatokua ni pepe, ngbanga ti so ala sara mbeto titene azo abo ala na têne. 27So ala ga na awatokua ni, ala zia ala aluti na dawa ti azo ti Kota Bongbi ti Fango Ngbanga. Kota wayango-sandaga ahunda ala, atene: 28“E ke fade na ala na kuru go titene ala fa ye na iri ti koli so. Me ye ni asara tongana nyen si fango ye ti ala ni amu ya ti Jérusalem kue so? Na ndö ni, ala kiri atene, e laa e fâ lo!” 29Pierre na awatokua akiri tënë: “Alingbi e ma yanga ti Nzapa ahon ti azo. 30Ala, ala kanga Jésus na ndö ti keke ti kroa si lo kui, me Nzapa ti akotara ti e azingo lo na kuâ. 31Nzapa aya lo na nduzu na lege ti ngangu ti lo, lo zia lo Makonzi na Wasongo azo, ti mu lege na azo ti Israel ti zia ngbene lege ti sarango ye ti ala si Nzapa azi siokpari na li ti ala. 32E yeke tene tënë ti aye so e baa na le ti e, e na Yingo-Vuru so Nzapa amu lo na azo so ama yanga ti lo.” 33So azo ti fango ngbanga ni ama tënë so, ngonzo agbu ala ahon ndoni si ala ye ti fâ awatokua ni. 34Me mbeni farizien ayeke na popo ti azo ti fango ngbanga ni, iri ti lo Gamaliel. Lo yeke wafango-ndia si azo kue aye tënë ti lo mingi. Lo londo si lo hunda titene a sigigi na awatokua ni kete si. 35Na pekoni, lo tene na azo ti fango ngbanga ni, lo tene: “Azo ti Israel, ala sara hange na ye so ala yeke sara na akoli so! 36Na ya ti alango so ahon, Tedas so lo tene, ni yeke mbeni kota zo, aga; azo nduru na ngbangbo osio amu peko ti lo. Me na peko ti so a fâ lo awe, azo so kue amu peko ti lo akangbi kirikiri si bongbi ti lo ni ali ngu. 37Na peko ti lo, Judas, zo ti Galile, aga na ndembe ti dikongo wungo ti azo; lo mu gba ti azo na peko ti lo. Me lo nga, a fâ lo si azo ti peko ti lo akangbi kirikiri. 38Fadeso, ala ma tënë so mbi yeke tene na ala: ala sara ye oko na akoli so pepe, ala zia ala. Tongana ye so akoli so aleke si ayeke sara so alondo na zo, fade ali ngu. 39Me tongana alondo na Nzapa, ala amba ti mbi, ala yeke na ngangu ti kanga lege ni pepe! Ala sara hange si ala tiri bira na Nzapa pepe!” Azo ti fango ngbanga ni aye peko ti tënë ti Gamaliel. 40Ala iri awatokua ni, apika ala na fimbo si amu yanga na ala ti kiri ti tene tënë na iri ti Jésus pepe. Na pekoni, ala zi awatokua ni. 41So awatokua ni asigigi na ya ti Kota Bongbi ti Fango Ngbanga ni, be ti ala asi na ngia, ngbanga ti so Nzapa abaa so ala lingbi na bango pasi ndali ti iri ti Jésus. 42Na ya ti lango oko oko, na ya ti kota da ti Nzapa nga na ya ti ada ti azo, ala yeke fa ye na azo, ala yeke fa Nzoni Tënë ti Jésus so ayeke Mesii.

will be added

X\