AWATOKUA 28

1So e si na nzoni tere, e ma atene, iri ti zoa ni ayeke Malte. 2Azo ti zoa ni ayamba e nzoni mingi. Ala sara mbeni kota wâ si ala iri e kue na tere ni, ngbanga ti so ngu ato nda ti pikango ni si de ayeke sara. 3Paul aro gba ti aholengo keke ti tuku na le ti wâ ni, me mbeni sioni ngbo asigigi na ya ni, ngbanga ti so wâ azö lo; lo te maboko ti Paul si lo ngba na tere ni. 4So azo ti zoa ni abaa ngbo ni na tere ti maboko ti Paul, ala tene na popo ti ala: “Koli so ayeke mbeni zo ti fango zo biani. Ataa so lo soo kuâ na le ti ngu, nzapa ti mbirimbiri aye titene lo ngba na fini pepe.” 5Paul ayingi maboko ti lo si ngbo ni ati na le ti wâ ni, me mbeni ye oko asara lo pepe. 6Azo ni abaa ti ala atene, tere ti lo ayeke suku wala lo yeke ti ti kui. So ala ku gbaa si ala baa mbeni sioni ye asi na lo pepe, tënë ti yanga ti ala akiri aga nde si ala tene: “Lo yeke mbeni nzapa!” 7Mbeni kota yaka ayeke nduru na ndo so e yeke daa, yaka ni ayeke ti Publius, makonzi ti zoa ni. Lo yamba e nzoni si e sara lango ota na ndo ti lo. 8Babâ ti Publius ayeke na gbogbo; lo yeke na kobela ti wâ ti tere si lo yeke sasa na mene. Paul ague abaa lo, lo zia maboko na ndö ti lo, lo sambela si kobela ti lo akai. 9Na pekoni, ambeni zo ti kobela so ayeke lango na ya ti zoa ni aga abaa lo si lo kai nga kobela na tere ti ala. 10Azo ti zoa ni ane e tongana akota zo. Na ngoi so e yeke mu mangboko ti hon, ala mu na e aye ndali ti lege. 11E sara nze ota na ya ti zoa ni. Na pekoni, e mu mbeni mangboko so alondo na Aleksandrii, iri ni ayeke “Anzapa so a du ala angbo”; mangboko ni aluti lani na tere ti zoa ni ti ku ngoi ti de ahon si. 12E si na gbata ti Sirakus si e sara lango ota na ndo so. 13E londo na ndo so, e mu gi yanga ti ngu ni si e si na Rezio. Lango oko na pekoni, pupu ti Mbongo alondo si ayeke ya; lango use na pekoni, e si na Puzole. 14Na ya ti gbata so, e wara ambeni ita, azo ti Christ, so ahunda na e ti sara yenga oko na ala. Lege so e gue e si na Rome laa. 15A-ita, azo ti Christ ti Rome ama tënë ti e, ala ga na lege ti e ngbii asi na Gara-ti-Apius nga na Ada-Ota-ti-Agene. So Paul abaa ala, lo mu singila na Nzapa si be ti lo akiri awara ngangu. 16So e si na Rome, a mu lege na Paul ti lango na ya ti mbeni senge da nde; a zia mbeni turugu oko na tere ti lo ti bata lo. 17Lango ota na pekoni, Paul airi amakonzi ti azuife ti Rome ti ga na ndo ti lo. So ala bongbi tere ti ala awe, lo tene na ala: “A-ita, ataa so mbi sara mbeni sioni ye na azo wala mbi ke nga lege ti aye ti akotara ti e pepe, a gbu mbi na Jérusalem si a zia mbi na maboko ti azo ti Rome. 18So azo ti Rome ama tënë ti yanga ti mbi awe, ala ye ti zi mbi, ngbanga ti so ala wara mbeni tënë ti fango ngbanga ti kuâ na li ti mbi ndali ni pepe. 19Me azuife ake, nilaa mbi baa gbaa si mbi hunda ti baa kota gbia ti Rome. Andaa mbi yeke na tënë oko ti bi na li ti azo ti mara ti mbi pepe. 20Ndani laa mbi hunda ti baa ala ti tene tënë na ala, ngbanga ti so mbi ga zo ti kanga ndali ti ye so azo ti Israel azia be ti ala ti ku.” 21Ala kiri tënë na lo, atene: “E wara mbeni mbeti oko so alondo na Judée si afa na e tënë na ndö ti mo pepe. Mbeni ita ti e oko alondo kâ aga atene tënë wala afa na e mbeni sioni tënë na iri ti mo pepe. 22Me e ye ti ma na yanga ti mo wani ye so ayeke na be ti mo, ngbanga ti so e hinga e tene, na ndo kue azo ayeke ke tënë ti bongbi so mo yeke na ya ni.” 23Ala na Paul afa mbeni lango si na lango ni so, ala ga mingi awara lo na ndo so lo yeke lango daa. Ti londo na ndaperere ngbii asi na lakui, Paul afa tënë: lo fa ye so lo hinga na ndö ti Kodro-gbia ti Nzapa si lo yeke gi lege kue titene ala yeda na tënë ti Jésus. Lo mu Ndia ti Moïse na ambeti ti awayanga-Nzapa si lo yeke fa na tënë ni. 24Ambeni ayeda na tënë ni, me ambeni ake ti ma na be. 25Azo ni ama tere na popo ti ala na ndö ti tënë ni pepe. So ala londo ti gue, Paul atene na ala gi mbeni tënë oko, lo tene: “Tënë so ando Yingo-Vuru atene na akotara ti ala na lege ti wayanga-Nzapa Ésaïe so ayeke taa-tënë! Yingo-Vuru atene: 26‘Mo gue na tere ti azo so, mo tene na ala, mo tene: Fade ala yeke ma ndo nzoni, me ala yeke ma ya ti tënë oko pepe; ala yeke baa ndo nzoni, me ala yeke baa ye oko pepe. 27Biani, be ti azo so akpengba, ala kanga mê ti ala, ala kanga le ti ala titene ala baa ndo pepe si ala ma ndo pepe. Nilaa ala ma ya ti atënë pepe si ala zia ngbene lege ti sarango ye ti ala pepe, tongaso si mbi kai kobela ti ala pepe.’ ” 28Paul akiri atene: “Ayeke nzoni ala hinga atene, Nzapa atokua tënë ti songo zo na kuâ na azo ti amara nde. Ti azo ni so, fade ala yeke ma tënë ni!” [ 29Na peko ti tënë so Paul atene, azuife apapa ngangu na popo ti ala si ala gue.] 30Paul asara ngu use na ya ti da so lo yeke futa na nginza ti lo wani. Lo yeke wara azo so kue ayeke ga ti baa lo. 31Lo yeke fa tënë ti Kodro-gbia ti Nzapa si lo yeke fa tënë ti Kota Gbia Jésus Christ na mbeto pepe, mbeni zo akanga lege na lo pepe.

will be added

X\