AWATOKUA 20

1So wusuwusu ni akai awe, Paul airi adisiple si lo tene tënë na ala ti mu ngangu na be ti ala. Na pekoni, lo bara ala si lo mu lege ti gue na Masedoane. 2Lo hon na ya ti sese so si lo fa tënë mingi na a-ita, azo ti Christ ti mu ngangu na be ti ala. Na pekoni, lo gue na Grese. 3Lo sara kâ nze ota. Na ndembe so lo ye ti mu mangboko ti gue na sese ti Sirii, lo ma so azuife aleke tënë ti sara sioni na lo. Tongaso lo leke na be ti lo ti kiri ti hon na ya ti Masedoane. 4Azo so lo na ala ague ayeke Sopater, molenge ti Pirus, zo ti Bere, Aristarke na Sekundus, azo ti Tesalonike, Gaius, zo ti gbata ti Derbe, Tishike na Trofime, azo ti sese ti Azii nga na Timothée. 5Ala hon kozoni si ala ku e na gbata ti Troas. 6Na peko ti matanga ti Mapa so a sara na mama ni pepe, e mu mangboko na gbata ti Filipe si na peko ti lango oku, e wara ala na Troas; e sara yenga oko na ndo so. 7Na lakui ti laposo, e bongbi tere ti te kobe ti beoko. Ndali ti so, tongana ndo ahan, Paul ayeke hon hongo, lo tene tënë ngbii asi na be ti bi. 8Alamba mingi ayeke za na ya ti kubu ti nduzu, na ndo so e bongbi daa so. 9Mbeni maseka-koli so iri ti lo Etish aduti na yanga ti fenetere. Na ndembe so Paul angba ti tene tënë, lango asara lo mingi si lo londo na da-nduzu ti ota ni, lo ti na sese. So ala ga ti mu lo na nduzu, andaa lo kui awe. 10Paul azu na sese, lo kuku na ndö ti lo, lo mu lo na ya ti maboko ti lo si lo tene: “Be ti ala agi ala pepe, lo yeke na fini!” 11Paul akiri na nduzu, lo mu mapa, lo fa ya ni si lo te. Lo kiri lo tene tënë ngbii asi na yanga ti ndaperere, na pekoni lo hon. 12A mu maseka-koli ni aga na lo, lo yeke na fini; be ti azo kue ade. 13E mu mangboko na Troas ti gue ti e kozoni na Asos, ndo so e yeke gue ti mu Paul daa. Biani, Paul aleke na be ti lo lani ti gue kâ na gere. 14So lo wara e na Asos, e mu lo na ya ti mangboko si e gue na Mitilene. 15E londo na ndo so si lango oko na pekoni, e si na mbeni ndo so ayeke nduru na zoa ti Kio. Lango oko na pekoni, e si na zoa ti Samos si lango oko na pekoni, e si na gbata ti Mile. 16Biani, Paul aleke na be ti lo ti luti na Efeze pepe, tongaso si ngoi ahon lo na sese ti Azii pepe. Lo ye ti gue hio ti si na Jérusalem kozoni si lango ti Pantekote alingbi, tongana lege ayeke daa. 17Na Mile, Paul atokua na Efeze ti iri akangba ti Eglize ni ti ga. 18So ala ga awara lo awe, lo tene na ala: “Ala hinga lege so mbi duti na ni na ya ti alango so kue mbi yeke na popo ti ala, ti londo na kozo lango so mbi si na ni na sese ti Azii. 19Mbi sara kua ti Kota Gbia na be ti molenge, na ngu ti le, na ya ti apasi so kue mbi baa, ngbanga ti so azuife aleke tënë ti sara sioni na mbi. 20Mbeni ye so alingbi ti sara nzoni na ala, ala hinga so mbi honde ni na ala oko pepe: mbi fa tënë kue si mbi fa nda ti ye kue na ala na le ti azo kue nga na ya ti ada. 21Mbi iri azuife na azo ti amara nde titene ala zia ngbene lege ti sarango ye ti ala, ala kiri na Nzapa si ala ma na be na Kota Gbia ti e Jésus. 22Fadeso, mbi yeke gue na Jérusalem tongana ti so Yingo-Vuru agbu mbi na ngangu ti gue. Mbi hinga ye so ayeke si na mbi kâ pepe. 23Ye oko so mbi hinga ayeke so: na ya ti agbata oko oko, Yingo-Vuru afa na mbi kozoni atene, kanga na pasi ayeke ku mbi. 24Me mbi baa so fini ti mbi ayeke senge ye na le ti mbi. Ye so mbi yeke gi lege ni, ayeke ti hunzi kua ti mbi, ti sara ye so kue Kota Gbia Jésus amu na mbi ti sara, so ti tene kua ti fango Nzoni Tënë ti nzoni be ti Nzapa na azo. 25“Mbi tambula na popo ti ala kue si mbi fa na ala tënë ti Kodro-gbia ti Nzapa kue awe. Ti fadeso, mbi hinga mbi tene, mbeni zo oko na popo ti ala ayeke kiri ti baa le ti mbi pepe. 26Ndani laa, laso mbi tene na ala mbirimbiri, mbi tene: tongana mbeni zo oko na popo ti ala agirisa lege, ngbanga ti mene ti lo ayeke na li ti mbi pepe. 27Biani, aye so kue Nzapa aleke na be ti lo so, mbi fa na ala awe, mbi honde ye oko pepe. 28Ala sara hange na lege ti dutingo ti ala, ala bata nzoni ataba so Yingo-Vuru azia na maboko ti ala. Ala bata nzoni azo ti Eglize so Nzapa asoro ala na lege ti mene ti molenge ti lo. 29Mbi hinga mbi tene, na peko ti mbi, fade ambeni sioni mbo ti ngonda ayeke ga na popo ti ala ti fâ ataba ni. 30Na popo ti ala wani nga, fade ambeni ayeke londo ti tene mvene ti handa adisiple mingi ti mu peko ti ala. 31Le ti ala akpengba, ala dabe ti ala so na ya ti ngu ota, bi na lâ, na ngu ti le, mbi zia ti mu wango na zo oko oko na popo ti ala pepe. 32“Fadeso, mbi zia ala na maboko ti Nzapa, mbi zia nga ala titene tënë ti nzoni be ti lo abata ala. Nzapa ayeke na ngangu ti kpengba ala, ti mu na ala anzoni ye so kue lo bata ni ndali ti azo ti lo. 33Mbi sara nzara ti nginza, wala nzara ti lôro wala nzara ti bongo ti mbeni zo oko pepe. 34Ala wani ahinga atene, mbi sara kua na maboko ti mbi wani si mbi na amba ti mbi, e wara aye so atia e. 35Lakue, mbi fa na ala ti sara kua si fade ala lingbi ti mu maboko na azo ti mawa. Ala dabe ti ala na atënë so Kota Gbia Jésus wani atene: ‘Mungo ye anzere ahon warango ye!’ ” 36Na peko ti atënë so, Paul akuku si lo na ala kue asambela. 37Azo ni kue ati na toto si ala gbu Paul ngangu na kate ti ala ti su ngbangba ti lo. 38Ala wara vundu mingi ndali ti tënë so lo tene: “Ala yeke kiri ti baa le ti mbi pepe.” Na pekoni, ala zia lo na lege ngbii asi na yanga ti mangboko.

will be added

X\