AWATOKUA 14

1So Paul na Barnabas asi na Ikoniom, ye so asi na Antioshe, gi ni laa asi kâ: ala li na ya ti da ti sambelango Nzapa ti azuife, ala fa tënë si gba ti azuife na azo ti amara nde ama na be. 2Me ambeni zuife so ake ti ma na be apusu ambeni zo ti amara nde titene be ti ala aga sioni na tere ti a-ita. 3Ataa so kue, Paul na Barnabas angba na Ikonium aninga. Ala fa tënë ti Kota Gbia na mbeto pepe, ngbanga ti so ala zia be ti ala kue na ndö ti lo. Lo mu na ala ngangu ti sarango aye ti kpene na aye ti dongo be ti fa na azo atene, atënë so ala yeke fa na ndö ti nzoni be ti lo ayeke taa-tënë. 4Popo ti azo ti gbata ni akangbi: ambeni amu mbage ti azuife si ambeni amu mbage ti awatokua. 5Azo ti amara nde na azuife, ala na amakonzi ti ala ama tere ti sara pasi na awatokua ni, ti bo ala na têne. 6So awatokua ni ahinga tënë ni, ala kpe ague na mbage ti Listre na Derbe, agbata ti sese ti Likaonii, nga na akodro so ayeke na tere ni. 7Kâ, ala fa Nzoni Tënë. 8Na Listre, mbeni koli ayeke daa so gere ti lo abuba; a du lo na ni gi tongaso si lo tambula laoko pepe. 9Mbeni lâ, lo yeke ma tënë so Paul ayeke fa. Paul abaa ndo na le ti koli ni si lo baa so koli ni ayeke na mabe titene tere ti lo aga nzoni. 10Paul atene na lo na kota go, atene: “Londo, mo luti na ndö ti gere ti mo!” Koli ni ahuru si ato nda ti tambula. 11So azo ni abaa ye so Paul asara, ala to nda ti dekongo na yanga ti kodro ti azo ti Likaonii, atene: “Anzapa amu tere ti zo si ala ga na popo ti e!” 12Ala iri Barnabas “Zeus”, ala iri Paul “Hermes”, ngbanga ti so Paul laa ayeke tene tënë. 13Mbeni da ti nzapa ti Zeus ayeke nduru na yanga ti gbagba ti gbata ni. Wayango-sandaga ti nzapa ni amu akoli-bagara so a zia akongo na tere ti ala, aga na ni na yanga ti gbagba ni. Lo na gba ti azo aye ti ya sandaga na awatokua ni. 14So Barnabas na Paul ama tënë ni, ala suru bongo ti ala si ala kpe ali na popo ti azo ni; ala dekongo, atene: 15“Azo! Ala yeke sara ye so ngbanga ti nyen? E yeke gi azo tongana ala! E ga ge ti fa Nzoni Tënë titene ala zia lege ti abuba ye so ala yeke voro so, ala mu be ti ala na Nzapa so ayeke na fini, lo so asara yayu, na sese na kota ngu-ingo na aye so kue ayeke na ya ni. 16Na ya ti angoi so ahon, Nzapa azia amara kue titene ala mu lege so be ti ala wani aye. 17Me lo fa so lo yeke Nzapa na lege ti anzoni ye so lo ngba sara na azo: lo mu na ala ngu-Nzapa na anzoni ngoi titene akobe ale nzoni, lo mu na ala kobe si lo zia ngia mingi na be ti ala.” 18Awatokua atene atënë so kue, me ayeke ngangu na ala ti kanga lege na gba ti azo ni ti mu na ala sandaga. 19Ambeni zuife alondo na Antioshe, na sese ti Pisidii, ambeni alondo na Ikoniom si aga; ala sara si gba ti azo ni aye peko ti tënë ti ala. Tongaso ala bo Paul na têne, ala gboto lo asigigi na lo na ya ti gbata ni, ala baa ti ala atene, lo kui awe. 20Me na ndembe so adisiple abongbi na tere ti lo, lo londo si lo li na ya ti gbata ni. Lango oko na pekoni, lo na Barnabas ague na gbata ti Derbe. 21Paul na Barnabas afa Nzoni Tënë na gbata ti Derbe si azo mingi aga adisiple. Na pekoni, ala kiri na Listre, Ikoniom nga na Antioshe, na sese ti Pisidii. 22Na ya ti agbata ni, ala mu ngangu na be ti adisiple, ala mu na ala wango titene ala ngba lakue na lege ti mabe, ala tene nga na azo ni, atene: “Alingbi e baa pasi mingi ti li na Kodro-gbia ti Nzapa.” 23Paul na Barnabas asoro akangba si azia ala na li ti a-Eglize ni oko oko kue. Na peko ti so ala ke kobe si ala sambela, ala zia akangba ni na maboko ti Kota Gbia, lo so ala ma na be na lo. 24Na pekoni, ala hon na ya ti sese ti Pisidii si ala si na sese ti Panfilii. 25Ala fa tënë ti Nzapa na gbata ti Perze si na pekoni, ala gue na gbata ti Atalii. 26Ala londo na ndo so, ala mu mangboko ti kiri na Antioshe, na sese ti Sirii. Na ya ti gbata so laa a zia ala lani na maboko ti Nzapa ti nzoni be titene ala sara kua so ala hunzi ni awe so. 27So ala si na Antioshe, ala bongbi azo ti Eglize ni si ala fa na ala peko ti aye so kue Nzapa asara na lege ti ala. Ala fa nga na azo ni lege so Nzapa azi lege na azo ti amara nde ti ma na be. 28Paul na Barnabas aduti na azo ti Christ na ndo so aninga.

will be added

X\