AWATOKUA 13

1Na Eglize ti Antioshe, awayanga-Nzapa na awafango-ye ayeke daa: Barnabas, Siméon so a iri lo Zo-vuko, Lusius ti kodro ti Sirene, Manaen so lo na kota komanda Herode akono oko, na Saul. 2Mbeni lâ, so ala bongbi ti voro Kota Gbia si ala ke kobe ti sambela, Yingo-Vuru atene na ala: “Ala zia Barnabas na Saul nde ndali ti mbi titene ala sara kua so mbi iri ala ndali ni.” 3Na peko ti so ala ke kobe si ala sambela awe, ala zia maboko na ndö ti azo use so si ala mu na ala lege ti gue. 4Tongaso Yingo-Vuru atokua Barnabas na Saul si ala gue na Selesii. Kâ, ala mu mangboko ti gue na zoa ti Shipre. 5So ala si na Salamine, ala fa tënë ti Nzapa na ya ti ada ti sambelango Nzapa ti azuife. Jean Marc ayeke na tere ti ala ti mu maboko na ala. 6Ala fâ, ahon na ya ti zoa ni kue si ala si na Pafos. Kâ, ala wara mbeni zo ti mazi so iri ti lo Bar-Jésus, mbeni zuife so atene, ni yeke Wayanga-Nzapa. 7Lo yeke mbeni zo ti tere ti Serzius Polus, govoronere so ayeke mbeni zo ti ndara. Govoronere ni atisa Barnabas na Saul, ngbanga ti so lo ye ti ma tënë ti Nzapa. 8Me Elimas – iri ti zo ti mazi so na yanga ti greke laa – aye ti kanga lege na ala, lo gi lege ti sara si govoronere ni ama na be pepe. 9Tongaso Yingo-Vuru asi Saul, so mbeni iri ti lo ayeke Paul; lo baa ndo taa na ya ti le ti zo ti mazi ni 10si lo tene na lo: “Mo, molenge ti Zabolo! Sioni zo ti mvene so! Be ti mo asi singo na asioni ye! Mo ke ye so kue ayeke nzoni! Lawa laa mo yeke zia ti buba ya ti ambirimbiri lege ti Kota Gbia? 11Fadeso, maboko ti Kota Gbia ayeke zu na ndö ti mo: le ti mo avuko si na ya ti mbeni ngoi, mo yeke kiri ti baa ndo pepe.” Gi hio tongaso, le ti Elimas avuko si lo yeke tatara ndo titene lo wara mbeni zo ti gbu maboko ti lo ti fa lege na lo. 12So govoronere ni abaa ye so asi, lo ma na be. Biani, tënë ti Kota Gbia so lo ma agbu be ti lo mingi. 13Paul na amba ti lo amu mangboko na Pafos, ala gue asi na Perze, na sese ti Panfilii. Me Jean Marc azia ala na ndo so si lo kiri ti lo na Jérusalem. 14Ala londo na Perze si ala gue asi na Antioshe, na sese ti Pisidii. Na lango ti wungo tere, ala li na ya ti da ti sambelango Nzapa si ala duti. 15So a diko ambeti ti Ndia na ti awayanga-Nzapa awe, amakonzi ti da ti sambelango Nzapa atokua na ala, atene: “A-ita, tongana ala yeke na mbeni tënë ti mu ngangu na be ti azo ni, ala tene tënë!” 16Paul alondo, lo sara maboko ti lo si lo tene: “Azo ti Israel na azo so kue ayeke voro Nzapa, ala ma mbi! 17Nzapa ti azo ti Israel asoro akotara ti e. Lo sara si li ti azo ni awu mingi na ndembe so ala yeke wande na kodro ti Ezipte. Na pekoni, na lege ti ngangu ti lo, lo sara si ala londo na Ezipte asigigi. 18Nduru na ngu baleosio, lo bata ala na ya ti benyama. 19Na pekoni, lo fâ azo ti ambeni mara mbarambara so kue ayeke na sese ti Kanaan si lo mu sese ti ala ni ti ga ye ti azo ti lo. 20Ye ni kue asara nduru na ngu ngbangbo osio na baleoku. “Na pekoni, Nzapa amu na ala awafango-ngbanga ngbii asi na ngoi ti wayanga-Nzapa Samuel. 21Na ndembe so ala hunda ti wara mbeni gbia, Nzapa amu na ala Saul, molenge ti Kish, zo ti mara ti Benjamin; lo le-gbia na ya ti ngu baleosio. 22So Nzapa azi lo awe, lo mu David, lo zia lo gbia na ndö ti ala. Nzapa atene tënë ti lo, atene: ‘Mbi wara David, molenge ti Yese, zo so be ti mbi aye lo, fade lo yeke sara aye so kue be ti mbi aye.’ 23Na lege ti mbeni hale ti David laa Nzapa asara si Jésus aga Wasongo azo ti Israel alingbi na zendo ti lo. 24Kozoni si Jésus aga, Jean afa tënë na azo ti Israel atene, ayeke nzoni ala zia ngbene lege ti sarango ye ti ala, ala wara bateme. 25Na ndembe so Jean aga nduru ti hunzi kua ti lo, lo tene: ‘Ala baa ti ala atene, mbi yeke zo wa? Zo so ala yeke ku lo so ayeke mbi pepe. Ala ma: lo yeke ga na peko ti mbi, mbi lingbi ti zi aporo ti gere ti lo pepe.’ 26“A-ita, ala so ayeke ahale ti Abraham na ala, azo so ayeke ge si ayeke voro Nzapa so, e laa Nzapa atokua tënë ti songo zo na kuâ na e! 27Biani, azo ti Jérusalem na amakonzi ti gbata ni ake ti hinga Jésus, ala fâ ngbanga ti kuâ na li ti lo; tënë ti awayanga-Nzapa so ala yeke diko lakue na lango ti wungo tere so aga taa-tënë. 28Ataa so ala wara mbeni tënë na li ti lo pepe so alingbi na ngbanga ti kuâ, ala hunda na Pilate ti fâ lo. 29Na peko ti so ala sara ye so kue Mbeti ti Nzapa atene tënë ni na ndö ti lo awe, ala zi lo na ndö ti keke ti kroa si ala zia lo na ya ti du ti kuâ. 30Me Nzapa azingo lo na kuâ. 31Na ya ti alango mingi, lo si na azo so lo na ala alondo na Galile ague ngbii asi na Jérusalem. Fadeso, azo ni laa aga azo ti fango peko ti aye so ala hinga na ndö ti lo na azo ti Israel. 32E nga, e yeke fa na ala Nzoni Tënë so: Nzoni Tënë so Nzapa amu zendo ni na akotara ti e. 33Nzapa asara ye ni biani na e, ahale ti ala, na ndembe so lo zingo Jésus na kuâ. Lo sara ye ni alingbi na tënë so a su na ya ti mbeti ti Abia, na ya ti use bia ni, atene: ‘Mo yeke Molenge ti mbi, laso mbi ga Babâ ti mo awe.’ 34Nzapa azingo lo na kuâ si lo lingbi ti kiri ti fun pepe. Lo tene tënë ni lani, lo tene: ‘Fade mbi yeke mu na ala aye so mbi mu zendo ni na David: aye so ayeke taa ye, a zia ni nde si ayeke nzoni kue.’ 35Ndani laa lo kiri lo tene na ya ti mbeni mbeti, lo tene: ‘Fade mo yeke zia zo ti mo titene lo fun na ya ti du ti kuâ pepe.’ 36Na ngoi so David angba na fini, lo sara ye so kue Nzapa aye lo ti sara. Na pekoni lo kui, a lu lo na tere ti akotara ti lo si lo fun. 37Me lo so Nzapa azingo lo na kuâ, lo fun pepe. 38A-ita, ayeke nzoni ala hinga ye so: na lege ti Jésus laa Nzapa afa na ala tënë ti zingo siokpari na li ti zo; siokpari so Ndia ti Moïse alingbi ti zi ni oko pepe. 39Na lege ti Jésus laa azo so kue ama na be, a zi siokpari na li ti ala. 40Ala sara hange si ye so awayanga-Nzapa atene tënë ni ando so asi na ala pepe. Ala tene: 41‘Azo so abaa tënë ti Nzapa tongana buba ye so, ala baa! Ala sara mbeto si ala kpe ahon! Biani, na ngoi so ala de na fini, mbi yeke sara mbeni ye, ye so, ataa mbeni zo atene peko ni na ala, ala yeke yeda na ni pepe.’ ” 42So Paul na Barnabas ayeke sigigi na ya ti da ti sambelango Nzapa, azo ni ahunda ala mingi ti kiri na lango ti wungo tere ti peko ti fa na ala tënë na ndö ti ye so. 43So azo akangbi na peko ti bongbi ni awe, azuife mingi na ambeni zo ti amara nde so ayeke bata ndia ti Moïse amu peko ti Paul na Barnabas. Paul na Barnabas ayeke tene tënë na azo ni si ala yeke mu wango na ala titene ala ngba lakue ti zia be ti ala na ndö ti nzoni be ti Nzapa. 44Na lango ti wungo tere ti peko, angba kete ka azo ti gbata ni kue laa abongbi ti ma tënë ti Kota Gbia. 45So azuife abaa gba ti azo ni, kota be asara ala; ala yeke tene tënë ti buba ya ti atënë ti Paul si ala yeke zonga lo. 46Tongaso Paul na Barnabas akiri atene na ala polele, atene: “Ala fade laa, e lingbi ti fa tënë ti Nzapa na ala kozoni. Me ndali ti so ala ke ni awe si ala wani abaa tere ti ala atene, fini so angba lakue lakue, ala lingbi na ni pepe, e yeke zia ala ti gue na mbage ti azo ti amara nde. 47Biani, Kota Gbia amu yanga na e, atene: ‘Mbi sara si mo ga lumiere ti amara kue, tongaso si mo gue, mo fa na azo ti dunia kue tënë so alingbi ti sara si ala soo kuâ.’ ” 48So azo ti amara nde ama tënë so, be ti ala asi na ngia si ala gonda tënë ti Kota Gbia. Ala so a soro ala ti wara fini so angba lakue lakue, ala ma na be. 49Tënë ti Kota Gbia amu ya ti sese ni kue. 50Me azuife apusu awali so ayeke na kota ndo si ala yeke voro Nzapa, ala na akota zo ti gbata ni titene ala sara ngangu na Paul na Barnabas si atumba ala na sese ti ala. 51Tongaso awatokua apika sese ti gbe ti gere ti ala na azo ni, na pekoni, ala hon ti gue na Ikoniom. 52Me ti adisiple so ayeke na Antioshe, be ti ala asi na ngia na Yingo-Vuru.

will be added

X\