2 TIMOTHÉE 1

1Mbi Paul, so Nzapa ayeda ti mu mbi tongana watokua ti Jésus Christ titene mbi fa tënë ti fini so Nzapa amu zendo ni na e si e wara ni na lege so e ga oko na Jésus Christ. 2Mbi tokua mbeti so na mo Timothée, molenge ti mbi so mbi ye mo mingi. Ayeke nzoni Nzapa Babâ na Kota Gbia ti e Jésus Christ asara nzoni be na mo, abaa mawa ti mo si amu na mo siriri! 3Mbi mu singila mingi na Nzapa so mbi yeke sara na lo na vuru be tongana ti so akotara ti mbi asara ando. Bi na lâ, mbi yeke zia mo lakue na ya ti asambela ti mbi. 4Tongana mbi yeke dabe ti mbi na ngu ti le ti mo so ayuru, mbi yeke na nzara ti kiri ti baa mo si be ti mbi asi singo na ngia. 5Mbi dabe ti mbi na taa mabe so mo yeke na ni. Gi mabe so Lois, ata ti mo ti wali, lo na Enis, mama ti mo ayeke na ni kozoni laa. Mbi hinga so gi mabe ni so laa mo yeke na ni. 6Ndani laa, mbi dabe ti mo: mo sara si matabisi so Nzapa amu na mo angba lakue ti mai, matabisi so mo wara ando na ndembe so mbi zia maboko na ndö ti mo. 7Biani, Yingo so Nzapa amu na e ayeke Yingo ti mbeto pepe, me ayeke Yingo ti ngangu, ti mabe na ti kangango nzara ti tere. 8Tongaso, ye so mo hinga na ndö ti Kota Gbia ti e, ayeke nzoni mo sara kamene ti fa peko ni na azo pepe; mo sara nga kamene ti mbi pepe, mbi so mbi yeke na da ti kanga ndali ti lo so. Me mo baa pasi ndali ti Nzoni Tënë tongana ti so mbi yeke baa pasi so, mo zia be ti mo na ndö ti ngangu ti Nzapa. 9Nzapa asoo e na kuâ, lo iri e ti ga azo so lo zia e nde ndali ti lo si e yeke nzoni kue. Mbeni ye ti nzoni so e sara titene lo soo e si lo iri e ndali ni ayeke daa pepe, me lo sara ni ndali ti so lo leke na be ti lo wani awe na lege ti nzoni be ti lo. Kozoni titene aye kue abaa gigi, Nzapa aleke na be ti lo ti sara nzoni be na e na lege ti Jésus Christ. 10Nzapa afa nzoni be ti lo ni fadeso na lege ti gango ti Jésus Christ, Wasongo e. Lo hon ndö ti kuâ na ngangu awe si na lege ti Nzoni Tënë, lo fa polele na azo fini so angba lakue lakue. 11Ndali ti fango Nzoni Tënë so laa Nzapa azia mbi watokua na zo ti fango nda ti tënë ti lo na azo. 12Ndani laa, mbi yeke baa pasi so, me kamene ayeke sara mbi pepe, ngbanga ti so mbi hinga zo so mbi zia be ti mbi na ndö ti lo. Mbi hinga nga so, zo ni ayeke na ngangu ti bata ye so lo zia na maboko ti mbi so ngbii asi na lango ti ndani. 13Sara ye alingbi gi na tapande ti atënë so ayeke na legeni so mo ma na yanga ti mbi. Sara ye ni na lege ti mabe, na lege ti ndoye, na lege ti gango so e ga oko na Jésus Christ. 14Nzoni ye so Nzapa azia na maboko ti mo, mo bata ni nzoni na lege ti Yingo-Vuru so ayeke na ya ti e. 15Mo hinga so azo ti sese ti Azii kue azia mbi awe; Fizele na Hermozene ayeke nga na popo ti ala. 16Ayeke nzoni Kota Gbia asara nzoni be ti lo na azo ti sewa ti Onezifore, ngbanga ti so fani mingi, lo mu ngangu na be ti mbi. Kamene ti so mbi yeke na da ti kanga asara lo pepe; 17me gi so lo si na Rome, lo gi lege ti mbi ngangu ngbii si lo wara mbi. 18Ayeke nzoni Kota Gbia asara nzoni be na lo na lango ti ndani. Anzoni ye so lo sara na mbi na gbata ti Efeze, mo hinga tënë ni ahon tanga ti azo kue.

will be added

X\