2 TESALONIKE 3

1Ti hunzi na ni, a-ita, ala sambela ndali ti e si tënë ti Kota Gbia angba ti hon na ndo kue si azo agonda tënë ni tongana ti so azo ayeke gonda ni na ndo ti ala, a-ita. 2Ala sambela nga si Nzapa azi e na maboko ti azo ti kirikiri na azo ti sioni. Biani, azo kue laa ama na be pepe. 3Me Kota Gbia ayeke sara ye alingbi na tënë ti yanga ti lo: fade lo yeke sara titene ala kpengba, lo yeke bata ala si Sioni wato asara sioni na ala pepe. 4Na lege ti gango so e ga oko na Kota Gbia, e zia be ti e na ndö ti ala: ye so e mu yanga na ala ti sarango ni, ala yeke sara ni si ala yeke ngba ande ti sara ni. 5Ayeke nzoni Kota Gbia azia na be ti ala ti ye Nzapa, lo fa na ala lege ti kanga be ti ala legeoko tongana ti Christ! 6A-ita, e hunda na ala na iri ti Kota Gbia Jésus Christ ti kpe lege ti a-ita so kue ayeke azo ti sopo, so sarango ye ti ala ayeke nde na tënë so e fa na ala kozoni so. 7Tia ala, ala hinga lege ti sarango ye tongana ti e awe. So e duti ando na popo ti ala, e sara sopo pepe. 8Kobe so e te, e hunda ni na mbeni zo pepe ti mu na e senge senge. Me bi na lâ, e sara kua ngangu, na gbiki ti li ti e si e ga kungba na ndö ti mbeni zo oko na popo ti ala pepe. 9Biani, e lingbi fade ti hunda ye na maboko ti ala, me e hunda ni pepe; e sara kua titene e ga tapande si ala sara nga tongana e. 10Biani, so lani e yeke na ndo ti ala, e mu yanga na ala, e tene: “Tongana mbeni zo aye ti sara kua pepe, alingbi lo te nga kobe pepe.” 11Andaa e yeke ma atene, ambeni zo na popo ti ala ayeke azo ti sopo, ala yeke sara kua oko pepe, me ala yeke yoro yanga ti ala na ya ti atënë ti azo. 12Azo tongaso, e mu yanga na ala si e mu wango na ala na iri ti Kota Gbia Jésus Christ: ala duti kpoo, ala sara kua ti ala si ala te kobe ti peko ti kua ti ala wani. 13Ti ala, a-ita, be ti ala awoko na lege ti sarango nzoni ye pepe. 14Tongana mbeni zo ake ti ma tënë so e tene na ya ti mbeti so, ala su iri ti lo na mbeti, ala sara songo na lo pepe, tongaso si kamene agbu lo. 15Ye oko, ala baa lo tongana wato ti ala pepe, me ala mu wango na lo tongana ti so ala yeke sara fade na mbeni ita, zo ti Christ. 16Ayeke nzoni Kota Gbia wani, so siriri alondo na lo, amu na ala siriri lakue na ya ti aye kue! Ayeke nzoni Kota Gbia aduti na ala kue! 17Mbi Paul, mbi wani, mbi su atënë so: mbi bara ala. Lege so mbi yeke su maboko na gbe ti ambeti ni oko oko kue laa; lege ti sungo mbeti ti mbi laa. 18Ayeke nzoni Kota Gbia ti e Jésus Christ asara nzoni be na ala kue!

will be added

X\