2 TESALONIKE 2

1A-ita, Kota Gbia ti e Jésus Christ ayeke kiri ti ga si e yeke bongbi na tere ti lo. Na ndö ti tënë so, e hunda na ala: 2tongana mbeni zo atene, lango ti Kota Gbia asi awe, li ti ala aga kirikiri hio pepe, ala sara nga mbeto pepe. Ataa azo ni atene, tënë ni alondo na yanga ti Nzapa, wala tënë ni alondo na e, wala e laa e tokua mbeti ni na ala, ala yeda na ni pepe. 3Ala zia zo oko ahanda ala na mbeni tënë pepe. Biani, kozoni si lango so alingbi, fade ambeni ye ayeke si: gba ti azo ayeke zia lege ti Nzapa, Zo ti sioni ayeke si, lo so a yeke buba ande lo na ndo so wâ ayeke gbi daa lakue. 4Zo ti sioni so ayeke londo ti tiri bira na aye so kue azo ayeke baa ni tongana anzapa, na aye so kue azo ayeke voro ni. Lo yeke gue ande ngbii ti duti na ya ti kota da ti Nzapa si lo yeke tene, ni wani laa ni yeke Nzapa. 5Mbi tene tënë so na ala na ndembe so mbi de lani na popo ti ala; ala girisa ni awe? 6Me fadeso, ye so agbanzi lo titene lo si, ala hinga ni awe. Tongana ngoi ti lo alingbi, fade lo yeke si. 7Ngangu ti Zo ti sioni ato nda ti sara kua ti lo awe; e lingbi ti ma ya ni, ngbanga ti so Nzapa afa ni na e awe. Tongana lo so ayeke gbanzi lege na Zo ti sioni ahon awe, fade ye ni ayeke si. 8Fade Zo ti sioni ayeke si, Kota Gbia Jésus ayeke fâ lo biani biani na pupu ti yanga ti lo. Lo yeke mingo lo biani biani na lege ti zango ndo ti gango ti lo. 9Na gango ti Zo ti sioni so, fade Satan ayeke sara aye ti ngangu nde nde: Zo ti sioni ayeke sara akota ye, aye ti kpene na aye ti dongo be ti handa na azo. 10Fade lo yeke sara aye ti sioni nde nde ti handa na azo so ayeke mu lege ti kuâ. Ala yeke na lege ti kuâ, ngbanga ti so ala ke ti yamba taa-tënë so alingbi fade ti soo ala na kuâ, ala ke nga ti ye taa-tënë ni. 11Ndani laa Nzapa ayeke tokua na ala mbeni ngangu ye ti sara si ala girisa lege si ala zia be ti ala na ndö ti tënë ti mvene. 12Tongaso, ala so kue ama na be na taa-tënë pepe si be ti ala ayeke nzere na sarango sioni ye, fade Nzapa ayeke fâ ngbanga na li ti ala. 13Ti e, alingbi e ngba ti mu singila lakue na Nzapa ndali ti ala, a-ita, ala so Kota Gbia aye ala. Biani, ti londo na ndembe so dunia abaa gigi, Nzapa asoro ala titene ala soo kuâ na lege ti Yingo-Vuru so azia ala nde ndali ti Nzapa, ala soo nga kuâ na lege so ala ma na be na taa-tënë. 14Ye so lo iri ala ndali ni laa; lo iri ala na lege ti Nzoni Tënë so e fa ni na ala titene ala wara gonda ti Kota Gbia ti e Jésus Christ. 15Tongaso, a-ita, ala gbu ngangu, ala bata tënë so e fa na ala kozoni na yanga ti e wani, wala na ya ti mbeti so e tokua na ala. 16Nzapa Babâ ti e aye e. Na lege ti nzoni be ti lo, lo mu ngangu na be ti e si angba lakue lakue, lo mu na e nzoni ye so e zia be ti e daa ti ku. E hunda na lo nga na Kota Gbia ti e Jésus Christ 17ti mu ngangu na be ti ala, ti sara si ala kpengba na ya ti aye so kue ala yeke sara, nga na lege ti atënë so ala yeke tene ti sara nzoni na azo!

will be added

X\