2 TESALONIKE 1

1Mbi Paul, mbi na Silas na Timothée si e tokua mbeti so na azo ti Eglize so ayeke na gbata ti Tesalonike. Ala yeke azo ti Nzapa Babâ ti e na ti Kota Gbia Jésus Christ. 2Ayeke nzoni Nzapa Babâ na Kota Gbia Jésus Christ asara nzoni be na ala si amu na ala siriri. 3A-ita, alingbi e ngba ti mu singila lakue na Nzapa ndali ti ala. So ayeke na legeni, ngbanga ti so mabe ti ala ayeke gue lakue na nduzu si yengo so ala ye tere na popo ti ala ayeke mai lakue. 4Ndani laa, e yeke pika kate ti e ngbanga ti ala na ya ti a-Eglize ti Nzapa, ngbanga ti so ala ngba ti kanga be ti ala si ala ngba ti bata mabe ti ala na ya ti pasi nga na ya ti aye ti ngangu so kue ayeke si na ala. 5Ye so kue afa atene, fango ngbanga ti Nzapa ayeke mbirimbiri. Biani, ye ni ayeke sara titene ala lingbi na Kodro-gbia ti Nzapa so ala yeke baa pasi ndali ni. 6Taa-tënë, Nzapa ayeke mbirimbiri: fade lo yeke kiri na peko ti pasi na azo so asara pasi na ala. 7Ala so ayeke baa pasi, fade lo yeke mu na ala lege ti wungo tere, e na ala kue. Lo yeke sara ye ni tongaso na ndembe so Kota Gbia Jésus ayeke londo na yayu ti si, lo na angangu ange ti lo; 8lo yeke ga ande na ya ti menga ti wâ. Biani, azo so ahinga Nzapa pepe si ala ke Nzoni Tënë ti Kota Gbia ti e Jésus so, lo yeke kiri na peko ti sioni ti ala na ala. 9Ngbanga so a yeke fâ na li ti azo ni ayeke so: Nzapa ayeke buba ande ala lakue lakue, ala yeke duti yongoro na le ti Kota Gbia nga na kota gonda ti lo 10na ndembe so lo yeke ga. Fade azo ti lo ayeke gonda lo, azo so kue ama na be ayeke baa lo na ngia. Ala nga, a-ita, fade ala yeke duti na popo ti azo ni, ngbanga ti so ala ma na be na tënë so e fa. 11Ndani laa e yeke sambela lakue ndali ti ala titene Nzapa ti e asara si ala lingbi na iringo so lo iri ala. E hunda titene na lege ti ngangu ti lo, ala sara aye ti nzoni so kue ala yeke na nzara ti sarango ni si kua so ala yeke sara na lege ti mabe asi na ndani. 12Tongaso, fade ala yeke sara si iri ti Kota Gbia ti e Jésus awara gonda, lo yeke sara si ala nga awara gonda. Ye so nzoni be ti Nzapa ti e na ti Kota Gbia Jésus Christ ayeke sara laa.

will be added

X\