2 PIERRE 3

1A-ita ti mbi so mbi ye ala mingi, use mbeti so mbi su ti tokua na ala laa. Na ya ti ambeti ni use kue, mbi ye ti dabe ti ala na ndö ti aye so ala hinga awe si ala duti azo so tënë ti be ti ala ayeke na legeni. 2Mbi ye si ala dabe ti ala na atënë so ando awayanga-Nzapa so ayeke nde si ayeke nzoni kue, atene na ala. Mbi ye nga si ala dabe ti ala na tënë ti yanga ti Kota Gbia ti e na Wasongo e, so awatokua afa ni na ala. 3Kozo ye so mbi ye ala hinga ayeke so: na ya ti alango ti ndani, azo so ayeke sara ye na lege ti asioni nzara ti be ti ala wani ayeke ga. Azo ni ayeke he ala, 4atene: “Jésus amu ando zendo atene, ni yeke ga; ka lo yeke na ndo wa? Akotara ti e akui aninga awe, ala zia mê ti e! Ti londo na ngoi so dunia abaa gigi, nyen laa asanze nyen?” 5Ala girisa na mbana ti be ti ala wani so yayu na sese ayeke ando daa giriri: yayu na sese abaa gigi na lege ti tënë ti yanga ti Nzapa. Lo sara si sese na ngu akangbi si kuru sese asigigi na ya ti ngu. 6Na lege ti ngu nga, so ti tene ngu so asuku amu ndo kue laa, dunia ti giriri abuba biani. 7Me gi na lege ti oko tënë ti yanga ti Nzapa laa, lo yeke bata yayu na sese so e yeke baa fadeso ti gbi ni na wâ. Lo yeke bata ni ti ku lango ti fango ngbanga na li ti azo ti sioni, lango so ala yeke kui biani biani. 8A-ita ti mbi so mbi ye ala mingi, mbeni tënë ayeke daa so alingbi ala girisa ni pepe: na le ti Kota Gbia, lango oko ayeke tongana ngu saki oko si ngu saki oko ayeke tongana lango oko. 9Ye so Kota Gbia amu zendo ni, lo yeke ninga ti sara ni pepe. Me ambeni zo ayeke tene, lo ngba ti ku gi kungo. Andaa lo ngba ti ku, ngbanga ti so lo ye pepe titene zo oko akui, me lo ye titene azo kue azia ngbene lege ti sarango ye ti ala. 10Lango ti gango ti Kota Gbia ayeke duti tongana gango ti zo ti nzi. Na lango ni so, nduzu ayeke hon si toto ni ayeke duti ngangu mingi; wâ ayeke gbi aye so ayeke na le ti nduzu, sese na aye so kue ayeke na ndö ni ayeke ngba pepe. 11So aye ni kue ayeke hon ande hongo so, fade ala yeke duti tongana nyen? Alingbi dutingo ti ala ayeke nde, ayeke nzoni kue si ala kpe mbeto ti Nzapa. 12Ala so ala yeke ku lango ti gango ti Nzapa si ala ye titene aga hio so, lango ni ayeke lango so wâ ayeke gbi nduzu si ayeke buba ni kue. Ndali ti ngangu ti wâ ni, aye so kue ayeke na le ti nduzu ayeke ga ngu. 13Me e yeke ku fini yayu na fini sese so Nzapa amu zendo ni; fade sarango ye ti mbirimbiri laa ayeke duti kâ. 14Ndani laa, a-ita ti mbi so mbi ye ala mingi, na ngoi so ala yeke ku lango ni so, ala sara kue titene lo ga lo wara ala na mbeni sioni ye na be ti ala pepe, mbeni tënë ayeke na li ti ala pepe, ala duti nga na siriri na Nzapa. 15Ala hinga atene, tongana Kota Gbia angba ti kanga be ti lo ti ku ngbii, andaa lo yeke zia na ala ngoi titene ala soo kuâ. Ita ti e Paul so e ye lo mingi, asu nga na ala tënë so na mbeti na lege ti ndara so Nzapa amu na lo. 16Na ya ti ambeti so kue lo su na ndö ti tënë so, gi oko tënë so laa lo tene. Na ya ti ambeti ni, ambeni tënë ni ayeke ngangu na zo ti ma ya ni; azo so ahinga ndo pepe si ade ti kpengba na lege ti tënë ti Nzapa pepe, ala yeke buba ya ti atënë ni, tongana ti so ala yeke sara na tanga ti atënë ti Mbeti ti Nzapa kue. Na sarango ye tongaso, ala yeke buba lege ti fini ti ala wani. 17Ti ala, a-ita ti mbi so mbi ye ala mingi, ala ma tënë ni kue awe. Le ti ala akpengba, tongaso si azo ti sioni ahanda ala ti gue kirikiri pepe si lege ti Nzapa so ala kpengba daa so, ala zia ni pepe. 18Me alingbi nzoni be ti Kota Gbia Jésus Christ, Wasongo e angba ti mai na be ti ala si ala ngba ti mai na lege ti hingango lo. Gonda ayeke ti lo fadeso si angba ti lo kpu na kpu! Amen.

will be added

X\