2 PIERRE 1

1Mbi Simon Pierre, zo ti kua nga na watokua ti Jésus Christ, mbi tokua mbeti so na azo so awara gi oko mabe ti kota ngere tongana e. Ala wara ni na lege ti mbirimbiri ti Jésus Christ, lo so lo yeke Nzapa ti e na Wasongo e. 2Ayeke nzoni Nzapa asara nzoni be na ala, lo mu na ala siriri gbani gbani na lege so ala hinga Nzapa nga na Jésus, Kota Gbia ti e. 3Na lege ti ngangu ti lo, Christ amu na e aye so kue alingbi na e titene e duti na fini si e ngba ti gbu tënë ti Nzapa ngangu. Christ afa na e ti hinga Nzapa so airi e ti wara mbage ti gonda ti lo na ti nzoni ye so lo sara. 4Na lege ti aye ni, Nzapa amu na e anzoni ye ti kota ngere so lo mu ando zendo ni na e. Tongaso, ala yeke kpe lege ti sioni nzara ti sarango aye ti dunia so, asioni ye so ayeke buba azo ti dunia so si dutingo ti ala akpa ti Nzapa. 5Ndani laa, ala sara kue titene ala zia na ndö ti mabe ti ala, sarango nzoni ye; na ndö ti sarango nzoni ye, ala zia hingango ndo; 6na ndö ti hingango ndo, ala zia kangango nzara ti tere; na ndö ti kangango nzara ti tere, ala zia kangango be; na ndö ti kangango be, ala zia gbungo tënë ti Nzapa ngangu; 7na ndö ti gbungo tënë ti Nzapa ngangu, ala zia yengo amba ti ala; na ndö ti yengo amba ti ala, ala zia ndoye. 8So ayeke anzoni ye so ala lingbi ti duti na ni laa. Tongana ala yeke na ni gbani gbani, fade ayeke sara si ala duti senge senge pepe si hingango so ala hinga na Kota Gbia ti e Jésus Christ ayeke gue lakue gi na nduzu. 9Me zo so ayeke na anzoni ye so pepe, lo yeke tongana waziba so ayeke tatara ndo tatarango; lo girisa so Nzapa asukula angbene siokpari ti lo awe. 10Ndani laa, a-ita, ayeke nzoni ala kiri asara ngangu ahon ti kozoni ti ngba na lege ti iringo so Nzapa airi ala, nga na lege ti sorongo so lo soro ala. Tongana ala sara tongaso, mbeni ye ti sara si ala ti ande ayeke daa oko pepe. 11Tongaso, fade a yeke zi lege na ala polele ti li na ya ti Kodro ti Kota Gbia ti e na Wasongo e, Jésus Christ; kodro so ayeke ngba kpu na kpu. 12Mbi ye lakue ti dabe ti ala na aye so, ataa so ala hinga ni awe si ala ngba lakue ti luti ngangu na ndö ti taa-tënë so ala hinga ni fadeso. 13Na ndembe so mbi de na ndö ti sese so, mbi baa mbi tene, ayeke nzoni na lege ti atënë so, mbi yeke dabe ti ala titene ala lango pepe. 14Mbi hinga so, mbi ga nduru ti zia sese so awe tongana ti so Kota Gbia ti e Jésus Christ afa ni na mbi. 15Me mbi yeke sara kue titene na peko ti mbi, ala wara lege ti dabe ti ala lakue na aye so mbi fa na ala. 16Biani, na lege ti ambeni tere ti li ti azo wani, atere so ala sigigi na ni na lege ti kode laa e fa tënë ti ngangu ti Kota Gbia ti e Jésus Christ na tënë ti gango ti lo pepe. Me e baa kota gonda ti lo kue na le ti e wani. 17Biani, Nzapa Babâ ane lo si agonda lo, na ndembe so Nzapa so ayeke na ya ti gonda ti lo so ahon gonda kue, atene: “So ayeke Molenge ti mbi so mbi ye lo mingi, be ti mbi anzere na lo mingi.” 18Go so alondo na yayu so, e wani e ma ni na ndembe so, e na Christ, e yeke na li ti hoto so ayeke nde si ayeke nzoni kue. 19Na ndö ni kue, tënë so awayanga-Nzapa atene so ayeke taa kpengbango tënë; tënë ni ayeke tongana lamba so ayeke za na ya ti vukongo ndo. So ayeke na legeni titene le ti ala angba na ndö ni ngbii ndo ahan si tongoro ti ndaperere aza na be ti ala. 20Kozo ye so ala lingbi ti hinga ayeke so: mbeni tënë oko ti peko ti yanga ti Nzapa so a su na Mbeti ti Nzapa, zo alingbi ti fa nda ni gi na li ti lo wani pepe. 21Biani, zo alondo na be ti lo wani ti tene peko ti tënë ti yanga ti Nzapa pepe, me Yingo-Vuru laa ayeke fa lege na azo titene ala tene tënë na iri ti Nzapa.

will be added

X\