2 KORENTE 8

1A-ita, e ye ti fa na ala tënë ti nzoni be so Nzapa asara na a-Eglize so ayeke na sese ti Masedoane. 2A-Eglize ni ayeke na ya ti pasi mingi, me be ti azo ni asi singo na ngia; ataa so ala yeke na ya ti kota mawa, ala mu ye ahon ndoni. 3Mbi wani mbi baa na le ti mbi, ala mu ye so alingbi na kate ti ala si ala kiri amu ye ni ahon ti so alingbi na kate ti ala. Na be ti ala wani, 4ala voro e mingi titene e zia nga na ala lege ti mu nginza ndali ti azo ti Nzapa so ayeke na Judée. 5Ye so ala sara ayeke kota ahon ye so e zia be ti e fade ti ku titene ala sara ni: ala mu tere ti ala wani kozoni na Kota Gbia si na pekoni, ala mu tere ti ala na e tongana ti so Nzapa aye. 6Ndani laa e mu wango mingi na Tite titene lo hunzi kua ti nzoni be so lo to nda ni na ndo ti ala, azo ti Eglize ti Korente. 7E hinga so ala yeke na ye kue gbani gbani: ala yeke na mabe, ala hinga ti tene tënë nzoni, ala hinga ye, ala yeke na nzara ti sarango kua si ala ye e. Tongaso, ala fa atene, ala yeke na ye mingi na lege ti mungo ye na nzoni be. 8Mbi yeke tene tënë so ti mu yanga na ala pepe; me mbi yeke tene na ala tënë ti azo ti ambeni Eglize so nzara ti kua ayeke na be ti ala. Mbi yeke sara so ti baa wala ala azo ti Korente, ala ye amba ti ala biani. 9Biani, ala hinga nzoni be ti Kota Gbia ti e Jésus Christ: lo yeke lani zo ti mosoro, me lo yeda ti ga zo ti mawa ndali ti ala titene na lege ti mawa ti lo, ala ga azo ti mosoro. 10Mbi ye ti fa na ala tënë ti be ti mbi na ndö ti tënë so: ye so ayeke nzoni ndali ti ala ayeke so, na ngu so ahon, ala yeke akozo zo so aleke na be ti ala ti mu ye si ala yeke nga akozo zo so amu ye ni. 11Tongaso, ye so ala to nda ni lani so, ala hunzi ni fadeso alingbi na ye so ala yeke na ni. Na ndembe so ala leke lani na be ti ala ti sara ni, ala yeke na nzara mingi na be ti ala. Na oko nzara so lani ayeke na be ti ala, ala sara ye ni ngbii asi na ndani. 12Biani, tongana zo ayeke na nzara ti mu ye si lo mu ni alingbi na ye so lo yeke na ni, Nzapa ayeke yamba ye ni; me ye so zo ayeke na ni pepe, Nzapa ayeke hunda ni pepe. 13Mbi hunda na ala titene na mungo maboko na a-ita ti ala, ala ga awayere pepe, me alingbi lege ti mungo ye alingbi tere. 14Ti fadeso, ala azo ti Korente, ala yeke na ye gbani. Ayeke nzoni ala mu mbage ni ti mu maboko na azo so ye atia ala. Mbeni lâ, tongana azo ni ayeke na ye mingi si ye atia ala, azo ti Korente, fade azo ni ayeke mu nga maboko na ala. Tongaso laa lege ti mungo ye ayeke lingbi tere. 15Tongana ti so Mbeti ti Nzapa atene: Zo so abongbi ye mingi, lo yeke na ye ahon ndoni pepe; zo so abongbi ye kete, ye oko atia lo pepe. 16E mu singila na Nzapa so azia na be ti Tite nzara ti sara na ala tongana ti so e nga, e yeke na nzara ti sara na ala. 17Lo yeda ti sara ye so e hunda na lo; me ye so lo sara, lo sara ni ahon ti so e hunda na lo: lo wani na be ti lo laa lo mu lege, lo gue na ala ndo ti ala. 18E tokua nga ita so azo ti a-Eglize kue ayeke tene nzoni tënë ti lo ndali ti kua so lo sara ndali ti Nzoni Tënë; e tokua lo titene lo na Tite ague. 19Gi so oko pepe, me azo ti a-Eglize asoro lo titene e na lo, e tambula ti gue na aye so ala mu na nzoni be. Kua so e yeke sara, e yeke sara ni ti gonda na Kota Gbia wani; e yeke sara nga ni ti fa nzara ti be ti e. 20E yeke sara kue titene azo akasa e pepe ndali ti lege so e yeke sara ye na kota nginza so a zia na maboko ti e. 21Ye so agbu be ti e ayeke titene e sara ye mbirimbiri gi na le ti Kota Gbia oko pepe, me nga na le ti azo. 22Na tere ti azo so, e tokua nga ita ti e so fani mingi na lege ti aye nde nde, e baa nzara ti kua so ayeke na be ti lo. Fadeso, nzara ti kua ni ahon ndö ti lo, ngbanga ti so lo zia be ti lo kue na ndö ti ala. 23Ti Tite, lo yeke zo so mbi na lo e yeke tambula, lo yeke mba ti mbi so mbi na lo, e yeke sara kua ndali ti ala. Ti a-ita so lo na ala ayeke gue so, ala yeke azo so a-Eglize atokua ala, ala yeke sara kua ndali ti gonda ti Christ. 24Tongaso a-ita, ala fa na azo ni na le ti a-Eglize atene, ala ye azo ni biani. Tongaso, fade azo ahinga atene, e yeke gonda tere ti e na legeni ndali ti ala, azo ti Korente.

will be added

X\