2 KORENTE 6

1So e na Nzapa e yeke sara kua oko so, e voro ala, e tene: “Nzoni be so Nzapa asara na ala, ala zia ni angba senge pepe.” 2Biani, Nzapa atene: “So ngoi ni alingbi, mbi sara na mo ye so mo hunda. So lango ti songo azo na kuâ alingbi, mbi mu na mo maboko.” Baa, taa nzoni ngoi ni alingbi awe, taa lango ti songo azo na kuâ alingbi awe. 3E ye titene azo awara mbeni sioni tënë ti tene na ndö ti kua ti e pepe, nilaa e sara kue titene mbeni zo ati ndali ti e pepe. 4Me na ya ti aye kue, e yeke fa so e yeke taa azo ti kua ti Nzapa. Tongaso, e yeke kanga be ti e ti sara kua na ya ti pasi, na ya ti aye ti ngangu, na ya ti aye ti dongo be; 5azo apika e, ala bi e na da ti kanga, ala tomboka na tere ti e, e woko na peko ti sarango kua, e lango pepe, e duti na nzara. 6E fa nga so e yeke azo ti kua ti Nzapa na lege ti dutingo ti e na vuru be, na lege ti hingango ndo ti e, na lege ti kangango be ti e, na lege ti nzoni be ti e, na lege ti Yingo-Vuru, na lege ti taa yengo tere na popo ti e, 7na lege ti taa-tënë so e yeke fa nga na lege ti ngangu ti Nzapa. Ye ti bira ti e na ye ti batango tere ti e ayeke sarango ye so ayeke mbirimbiri. 8Ambeni zo ayeke ne e si ambeni ayeke zia kamene na le ti e; ambeni zo ayeke tene nzoni tënë na iri ti e si ambeni ayeke tene sioni tënë na iri ti e. Azo abaa e tongana azo ti mvene, andaa e yeke tene taa-tënë, 9azo abaa e tongana azo so ala hinga ala pepe, andaa ala hinga e kue; azo abaa e tongana azo so ayeke kui kuingo, andaa e ngba na fini; ala pika e, me ala fâ e pepe. 10Azo azia vundu na be ti e, me e yeke lakue na ngia; azo abaa e tongana azo ti mawa, me e yeke sara titene azo mingi aga azo ti mosoro; azo abaa e tongana azo so ayeke na ye oko pepe, me e yeke na ye kue. 11A-ita azo ti Korente, e tene tënë na ala polele awe, e zi be ti e kue na ala. 12E ke ti zi be ti e na ala pepe, me ala laa ake ti zi be ti ala na e. 13Tongaso, mbi yeke tene tënë na ala tongana ti so ala yeke fade amolenge ti mbi: ala nga, ala zi be ti ala kue na e! 14Azo so ama na be pepe, ala bongbi oko na ala ti sara kua pepe. Ye ti mbirimbiri na ye ti sioni ayeke bongbi oko tongana nyen? Zango ndo na vukongo ndo ayeke duti na ndo oko? 15Christ na Zabolo alingbi ti ma tere? Zo so ama na be na zo so ama na be pepe, nyen laa abongbi ala, nyen? 16Nyen laa abongbi da ti Nzapa na anzapa nde, nyen? E yeke tongana da ti Nzapa, lo so lo yeke na fini. Nzapa wani atene: “Fade mbi yeke duti na popo ti azo ni si mbi yeke tambula na popo ti ala; mbi yeke duti Nzapa ti ala si ala yeke duti azo ti mbi.” 17Ndani laa Kota Gbia Nzapa atene: “Ala sigigi na popo ti azo ni, ala duti yongoro! Ala ndu mbeni ye ti sioni oko pepe, tongaso, fade mbi yeke yamba ala.” 18Kota Gbia so ngangu ti lo ahon angangu kue atene: “Mbi yeke duti Babâ ti ala si ala yeke duti amolenge ti mbi ti koli na ti wali.”

will be added

X\