2 KORENTE 11

1Ala kanga be ti ala na mbi tongana mbi ga tongana zo so mbeni ye asara li ti lo! Biani, ala kanga be ti ala na mbi ma! 2Mbi ye ala mingi, nilaa mbi yeke sara mbanda ti ala; yengo so mbi ye na ala so alondo na Nzapa. Biani, ala yeke tongana maseka-wali so ade ti hinga koli pepe; mbi mu zendo ti mu ala gi na koli oko, koli ni ayeke Christ. 3Me ala dabe ti ala na ye so: ngbo ahanda ando Eve na lege ti mayere ti lo si Eve agirisa lege. Mbeto asara mbi titene be ti ala ague kirikiri si ala zia peko ti Christ so ala mu lani tere ti ala kue na lo na vurungo be so. 4Biani, ala yeke kanga be ti ala titene mbeni zo kirikiri aga afa na ala mbeni Jésus nde na Jésus so e fa tënë ti lo na ala. Ala yeke lakue nduru ti yamba mbeni yingo nde na Yingo so ala wara kozoni, ala yeke yeda nga na mbeni nzoni tënë nde na Nzoni Tënë so ala ma kozoni! 5Ti akota kota watokua ti ala ni so, mbi baa ti mbi mbeni ye so ala hon mbi na ni pepe. 6Mbi hinga ti tene tënë nzoni pepe, so mbi hinga; me tongana ayeke tënë ti hingango ndo, so ayeke mbeni tënë nde: e fa ni na ala polele na ya ti aye kue. 7So mbi sara tere ti mbi kete ti fa Nzoni Tënë ti Nzapa na ala gi senge senge ti sara si ala ga akota zo so, andaa sioni laa mbi sara so? 8Mbi hunzi aye kue ti ambeni Eglize nde na lege so a-Eglize ni afuta mbi si mbi sara kua na popo ti ala, azo ti Korente. 9Na ngoi so mbi yeke lani na popo ti ala kâ, tongana mbeni ye atia mbi, mbi te ye ti mbeni zo senge senge pepe. A-ita so alondo na Masedoane si aga, ala mu na mbi aye so kue alingbi na mbi. Na ya ti aye kue, mbi bata tere ti mbi titene mbi ga tongana kungba na ndö ti zo oko pepe, mbi yeke ngba ti bata tere ti mbi lakue tongaso. 10Na lege ti taa-tënë ti Christ so ayeke na yanga ti mbi, mbi tene: fade mbeni zo alingbi ti kanga lege na mbi pepe ti gonda tere ti mbi na sese ti Akayi kue. 11Mbi tene tënë so ngbanga ti nyen? Mbi tene tënë so, ngbanga ti so mbi ye ala pepe? Nzapa ahinga so mbi ye ala! 12Ye so mbi yeke sara laso so, fade mbi yeke ngba lakue ti sara ni, tongaso si azo so aye ti wara mbeni ye ti luti na ndö ni ti gonda tere ti ala tongana ti so e yeke gonda tere ti e, fade ala wara ye ni pepe. 13Azo ni so ayeke awatokua ti mvene; ala yeke tene mvene na ndo ti kua so ala yeke sara si ala yeke sara tere ti ala tongana awatokua ti Christ. 14So ayeke mbeni fini ye pepe: Satan wani ayeke sara tere ti lo tongana ange ti lumiere. 15Tongaso, azo ti kua so asara tere ti ala tongana azo so ayeke sara ye ti mbirimbiri, so ayeke fini ye pepe. Ye so ayeke si ande na ala na nda ti gigi ti ala ayeke lingbi gi na aye so ala sara. 16Mbi kiri mbi tene: ayeke nzoni mbeni zo abaa mbi pepe tongana zo so mbeni ye asara li ti lo. Wala, tongana ala baa mbi tongaso, ayeke nzoni ala yeda si mbi nga, mbi gonda tere ti mbi kete. 17Tënë so mbi ye ti tene so, ti be ti Kota Gbia laa pepe, me mbi yeke tene tënë ni tongana zo so mbeni ye ayeke sara li ti lo. Mbi hinga biani so, mbi yeke na ye so mbi lingbi ti gonda tere ti mbi ndali ni. 18So azo mingi ayeke gonda tere ti ala ndali ti ye so ayeke ti zo, mbi nga, mbi ye ti gonda tere ti mbi. 19Ala azo ti Korente, ala yeke azo so li ti ala ayeke daa. Ataa so kue, ala yeda ti kanga be ti ala ti ma azo so mbeni ye asara li ti ala! 20Azo ayeke sara ala na ngbaa, azo ayeke te ye ti ala, azo ayeke nzi ala, azo ayeke baa ala tongana ambumbuse zo, azo ayeke pika le ti ala, me ala yeke kanga be ti ala na ya ti aye so kue! 21Kamene ahon ndö ti mbi ti tene tënë so eên: mo baa mo tene, e sara ye tongana akoli pepe! Tongana mbeni zo akpa ti gonda tere ti lo ndali ti mbeni ye, mbi nga, mbi kpa ti gonda tere ti mbi. – Mbi yeke tene tënë so tongana zo so mbeni ye asara li ti lo –. 22Azo ni ayeke azo ti mara ti Hebro? Mbi nga! Ala yeke azo ti mara ti Israel? Mbi nga! Ala yeke ahale ti Abraham? Mbi nga! 23Ala yeke azo ti kua ti Christ? So nzoni, me mbi hon ala! – Mbi yeke tene tënë so tongana zo so mbeni ye asara li ti lo –. Mbi sara kua mbi hon ala kue, mbi sara kanga mbi hon ala kue, azo apika mbi, mara ni use pepe, lege mingi, mbi kui kue. 24Fani oku, azuife apika mbi lege baleota na gumbaya. 25Fani ota, azo ti Rome apika mbi na fimbo, fani oko, azo abo mbi na têne ti fâ mbi; fani ota, mangboko alinda ngu na mbi, mbi sara lango oko na bi oko na ya ti ngu. 26Mbi tambula na gere mingi, aye ti sioni ahara mbi lege mingi: abale asuku amu ndo kue, asioni zo, azo ti mara ti mbi na azo ti amara nde aye ti sara sioni na mbi; na ya ti agbata, na ya ti abenyama nga na le ti kota ngu-ingo, aye ti sioni aye ti si na mbi, a-ita ti mvene aye ti sara sioni na mbi. 27Mbi sara angangu kua mingi, aye ti ngangu asi na mbi mingi, lege mingi lango akpe na le ti mbi; nzara ti kobe na ti ngu asara mbi; lege mingi mbi lango nzara; lege mingi de asara mbi, bongo atia mbi. 28Mbi lingbi ti diko tanga ti aye ni kue pepe. Tënë so agbu be ti mbi si mbi yeke gi be ti mbi na ndö ni bi na lâ, ayeke tënë ti a-Eglize kue. 29Tongana mbeni zo ayeke na ngangu pepe, mbi nga, mbi yeke na ngangu pepe. Tongana mbeni zo asara si mba ti lo ati na ya ti siokpari, tënë ni aso be ti mbi mingi. 30Tongana ayeke tënë ti gondango tere, mbi yeke gonda tere ti mbi, ngbanga ti so mbi yeke na ngangu pepe. 31Nzapa, Babâ ti Kota Gbia Jésus ahinga so, mbi yeke tene mvene pepe. Gonda ayeke ti lo kpu na kpu! 32Na ngoi so mbi yeke ando na Damas, govoronere so ayeke sara kua ndali ti gbia Aretas azia aturugu na ayanga ti gbata ni kue titene ala gbu mbi. 33Me a zia mbi na ya ti sakpa si a yoro mbi na mbeni du so ayeke na tere ti gbagba ni, a zu mbi na sese si mbi kpe na maboko ti aturugu ni, mbi hon.

will be added

X\